Marcos 16 - Wuj Pa K'ubultzij

Uwalijik i Jesús che i kamik chkixol i kamnaq

¹ Are xik'aw i ij sábado, i ati Mariy Magdalena, ati Mariy chi uchuch ma Santiago, i ati Salomé, xkilo' kunb'al muy re kb'ak che uch'akul i Jesús.

² Rumali lik we' che i nab'e ij re seman xe'e chila ipa xmuq wi i Jesús.

³ I ixoqib' ketijin chub'ixkil chkiwach: —¿Pachin nawi k-anaw utzil chqe chi kojuto chrelsaxik ab'aj chuchi' i jul? —Xecha.

⁴ Xwiri, are xkitaqej, xkil pan i nim laj ab'aj chi kojtal kan chuchi' i jul, nti chik chila puk'ijib'al.

⁵ Are xe'ok pa jul xkil jun k'ojol ala kul puwiqab'im; i u'u' naj raqan xaq lik saq. I ixoqib' le lik xkixij kib'.

⁶ Xwiri i k'ojol ala le xub'ij chke: —Mixij iwib', yix kitzukuj i Jesús aj Nazaret chi xripik xaq xtz'aw chwach i krus. Ire nti chik chi, walijnaq chub'ik; chiwila pe i k'ijib'al le ipa xya' wi kanoq.

⁷ Jix, jib'ij chke utijoxelab' xaq jib'ij che ma Pedro, i Jesús nab'e ne kupon chiwach yix pa Galilea. Chila kiwil wi uwach pacha ub'im kan chiwe.

⁸ Are uri ixoqib' pa'anem xe'el chila chuchi' ijul; man lik keb'arb'at rumal kixib'rikil. Xwiri lik mijun xkilap wi man lik kixim kib'.

I Jesús xuk'ut rib' che ati Mariy Magdalena

⁹ Chrijil chik uwalijik i Jesús chkixol i kamnaq, che usaqirb'al re i nab'e ij che i seman, are uri nab'e xuk'ut rib' che i ati Mariy Magdalena, chi xelsax wuqub' itzel taq tew che rumal i Jesús.

¹⁰ I ati Mariy Magdalena x-e la chub'ixkil chke i je terejnaq chrij i Jesús, are xupon ku', xeuriqa chi lik keb'isonik xaq ke'o'ik.

¹¹ Ike are xkita chi i Jesús k'aslik, chi xaq x-iltaj uwach lik xkikoj taj.

I Jesús xuk'ut rib' chke i keb' utijoxelab'

¹² Chrijil chik ile i Jesús junwi tan chik uk'utik rib' xu'an chke i keb' utijoxelab' are ketijin che i b'e enam ke pa taq es.

¹³ Xaq i keb' le xe'e la chub'ixkil chke i jub'an chik tijoxelab', xwiri ike xaq xkikoj taj.

I taqanik chi xuya kan i Jesús chkiqul utijoxelab'

¹⁴ Te'uri i Jesús xuk'ut chik rib' chke i julajuj taq utijoxelab', are ketijin ike chwa'im chi mexa. Are uri xeuyajo man nti ukub'ib'al kik'ux xaq lik je b'uy, man xekojon ti chke i xe'ilaw uwach chi walijnaq chik che i kamik.

¹⁵ Are uri i Jesús xub'ij chke: Jix chub'ixkil i utz laj tzij k'ak' re i Dios chke i winaq chwach ronojel i jyub' ta'aj.

¹⁶ Pachin jun kukojo xaq we kqajsax ya puwi, ktotaj ni uri. Xwiri pachin jun kukoj taj, lik kpe ni tojpen puwi.

¹⁷ Konojel ni'pa kekojon che intzij ketiki ni chu'anik jalajuj nimaq taq il pacha iri: Pinb'i yin kkesaj ni itzel taq tew, xaq kech'aw ni pa k'ak' ch'ab'al;

¹⁸ tupu kkichap ni kumatz, xaq we kkitu' ni jun b'iroxik chi o b'enen che lik nti kkik'ulmaj. Xaq keutzir ni iwab'ib' are kkiya ki'ab' pkiwi; xcha.

Relik b'i Jesús chikaj

¹⁹ Chrijil chik ulapanik ku' utijoxelab', i Jesús xyak b'i chikaj, are uri xkub'i puwiqab'im i Dios.

²⁰ Are uri, i utijoxelab' i Jesús xe'e chub'ixkil i utz laj tzij re i Dios pa jalajuj taq tinimit. I Ajwal keuto chub'ixkil i utz laj tzij k'ak' re i Dios, ru' nimaq taq il. Amén qatzij.