Marcos 14 - Wuj Pa K'ubultzij

I je ajch'oj chrij i Jesús xkich'ob' uchapik

¹ Keb' ij chuxe'el i nima'ij Pascua, are ktijaw i wa re trigo chi nti kunb'al ru' re kuwalijsaj upam. Are uri i kaj-atzil i rajpatan i Dios xaq i tijonelab' re i atb'al tzij kkitzukuj wach uchapik i Jesús kki'ano ru' jun t'oronik kamsab'al re.

² Xwiri, xkib'ij chkiwach: —Mqachap pa nima'ij, moqxa kech'oqow i uk'iyal winaq rumal —xecha.

Jun ixoq xukoj kunb'al muy puwi i Jesús

³ I Jesús x-e pa komon Betania chi rachoch ma Simón, chi o te'eq yob'il che utz'umalil kecha che. Are je kul chi mexa xok b'i jun ixoq ku' rok'am b'i jun b'axo antal che ab'aj pacha saqcho', nojnaq che i kunb'al chi lik muy xaq lik paqal rajil. I kunb'al muy le che i kotz'ij nardo elsam wi. Xu'upij uqul i b'axo te'uri xujam i kunb'al muy che ujolom i Jesús.

⁴ Je o jujun chke i je o chila xpe koywal, xkib'ij chkiwach: —¿B'uchak xu'an k'ax che i kunb'al muy le?

⁵ Utz teneri ile wetene xuk'ayij kolo ktoj neri pacha ktoj jun junab' chak tob'al ke i nib'a'ib' —xecha. Lik xkich'ach'a ixoq le.

⁶ Xwiri i Jesús xub'ij chke: —Sta ile, ¿B'uchak kich'ich'a? Man i xu'an ixoq chwe le, lik utz.

⁷ Man i nib'a'ib' lik arewi je o ni iwu', are kiwaj u'anik i utz chke chi'ana uri, xwiri yin ronojel ti ij in o iwu'.

⁸ I ixoqi xu'ano wach i xtiki chu'anik, xukoj kunb'al muy chwij, ke'eloq chi xuyijb'a inch'akul chuxe'el inmuqik.

⁹ Lik saq laj tzij kinb'ij chiwe, wach xu'an ixoqi lik kkuxtax ni chila xaipa kb'ix wi utz laj tzij k'ak' re i Dios chwach ronojel i jyub' ta'aj —keje ile xub'ij i Jesús.

Ma Judas xuk'ayij i Jesús

¹⁰ I ma Judas Iscariote chi jun chke i kab'lajuj utijoxelab' i Jesús, x-e chusujuxik i Jesús chke i kaj-atzil i rajpatan i Dios jachb'al re pki'ab'.

¹¹ I kaj-atzil ajsujul sipon are xkita wach xub'ij ma Judas, lik xekikotik xaq xkib'ij che chi kkiya pwaq che. Are uri ma Judas xok chutzukuxik wach ujachik i Jesús ku'an chke.

Uwa'im i Jesús ku' utijoxelab'

¹² I nab'e ij re i nima'ij chi ktijaw i wa re trigo chi nti kunb'al ru' chi xaq are ij ile chi kkamsax i chij re i nima'ij Pascua. Are uri utijoxelab' i Jesús xkitz'onoj che: —¿Ipa kawaj wi yet chi kqayijb'a wi i awa'im re i nima'ij Pascua? —Xecha.

¹³ Are uri i Jesús xeutaq b'i keb' chke utijoxelab' pa tinimit xaq xub'ij chke: —Jix pa tinimit, chila kik'ulaj wi jun achi reqam jun eqb'ala ya. Chiterb'ej b'ik.

¹⁴ Xaq chixok che i ja ipa kok wi achi le, chib'ij iri che i rajaw ja: I Tijonel kraj kretamaj: Ipa o wi i k'ijib'al chi kintij wi i ral chij re Pascua ku' intijoxelab'; keje ile xub'ij loq.

¹⁵ I rajaw ja le kuk'ut ni jun nim laj k'ijib'al chiwe, chi o che ukab' le, i k'ijib'al le lik chom uyijb'axik antal che, chila uri chiyijb'a wi ral qachij —xcha i Jesús chke.

¹⁶ Are uri i tijoxelab' xe'e pa tinimit; are xeupon chila xkiriqa ronojel pacha ub'im i Jesús chke. Te'uri ike xkiyijb'a i wa re i nima'ij Pascua.

¹⁷ Are xok a'ab' xupon i Jesús junam ku' i kab'lajuj utijoxelab'.

¹⁸ Tz'aqat are ketijin chwa'im chwi mexa are uri i Jesús xub'ij chke: —Lik saq laj tzij kinb'ij chiwe, chi jun chiwe yix chi kixtijin chwa'im wu' kinujach ni pki'ab' i je ajch'oj chwij —xcha i Jesús chke.

¹⁹ I tijoxelab' are xkita ile, lik xe'ok che i b'is xaq chkijujunal xe'ok chutz'onoxik che: —¿Moqxa yin? —Xecha.

²⁰ I Jesús xula' uwach chke: —Jun chiwe yix, chi ix kab'lajuj, are i jun chi kumu uwa wu' pa laq.

²¹ I pacha Winaq chi Xolalaxoq chwach Ulew kik'aw ni chupam ronojel ni'pa tz'ib'tal kan chupam uwuj i Dios. Xwiri ¡To' uwach i jun chi kujach pki'ab' i ajch'oj chrij! Lik utz te'eq che i achi le matiji xalaxik —xcha i Jesús chke.

²² Tz'aqat are ketijin chwa'im, i Jesús xuk'am pan jun wa re trigo, xutioxij che i Dios, te'uri xupiro xaq xuya chke utijoxelab', xub'ij: —Chichapa i wa re trigo ri; iri are inch'akul.

²³ Te'uri xuk'am pan i tu'b'al uwa'al uva muqb'am, xutioxij che i Dios, te'uri xuya chke, are uri konojel xkitu'u.

²⁴ —Iri are inkik'el chi kyijb'aw i k'ak' trat ru' i Dios, chi xaq kturuw na re tob'al kiwach konojel i winaq.

²⁵ Lik saq laj tzij kinb'ij chiwe, chi kintu' ti chik uwa'al uva, k'a kuriqa ni ij chi kintu' tan chik i k'ak' uwa'al uva muqb'am chila pa ajawinik re i Dios —xcha i Jesús chke.

I Jesús xusaqij chi k-uwax ni uwach rumal i ma Pedro

²⁶ Are xeutzin chub'ixaxik i b'ix Salmos, xe'e chwi jyub' Olivos.

²⁷ I Jesús xub'ij chke: —Iwonojel yix ksach ni ukub'ib'al ik'ux chwe man keje ile kub'ij uwuj i Dios: Kinkamsaj ni ajyu'ul chij, are uri konojel i chij kekicher nu b'ik.

²⁸ Xwiri, are kinwalij che i kamik, nab'e kin-e yin pa Galilea chiwach yix —xcha i Jesús chke.

²⁹ Are uri ma Pedro xub'ij che i Jesús: —Tupu konojel kkisach ukub'ib'al kik'ux chawe, xwiri yin kinsach taj —xcha.

³⁰ Are uri i Jesús xula' uwach che ma Pedro: —Lik saq laj tzij kinb'ij chawe, che i a'ab'i, are k'amaja kch'aw ukamul i teren oxmul kawuwaj ni inwach.

³¹ Xwiri i ma Pedro lik xub'ij chik: —Tupu kinkam ni awu', yin lik kwuwaj ti awach —xcha. Xaq keje ile xkib'ij konojel.

I Jesús klapan ru' i Dios chila Getsemaní

³² I Jesús junam ku' utijoxelab' xe'e che jun k'ijib'al chi Getsemaní ub'i. Are je o chik chila i Jesús xub'ij chke: —Chixkul kan chi, tz'aqat kin-e yin chutz'onoxik che i Dios —xcha.

³³ Te'uri xuk'am b'i ma Pedro, ma Santiago, xaq i ma Wan, are uri i Jesús xuna jun nim laj b'is xaq jun nim laj k'ax puk'ux.

³⁴ Rumali xub'ij chke: —Kinna jun b'is pwanima chi laj kinkam rumal. Chixkanaj kan chi, xaq chixk'ask'atoq —xcha i Jesús chke.

³⁵ Are uri i Jesús x-e pan naj jub'i', xxuki'ik, xuqajsaj upalaj k'a chwach ulew, te'uri xok chutz'onoxik che i Dios chi matiji kuriqa i or re i k'ax.

³⁶ Xub'ij: “Ta, yet ronojel is kattiki che, chinawesaj chupam i k'ax chi nab'e chinwach, xwiri are ti to' pacha kwaj yin; are cha'ana pacha i kawaj yet”. Keje ile xub'ij i Jesús che uqajaw.

³⁷ Te'uri xtzalij chik chila ipa je o wi kan utijoxelab', are uri xeuriqa kewarik. Xub'ij che ma Pedro: —A Simón, katwar chik, mitene jun or xach'ijo chi katk'ask'atik.

³⁸ Lik chixk'ask'atoq xaq chitz'onoj itob'al che i Dios man keje ile kixtzaq ti chupam i tzaqsab'al. Saq laj tzij, yix lik kiwaj utz'onoxik che i Dios, xwiri ich'akul lik nti ucho'ab'.

³⁹ Te'uri x-e chik chutz'onoxik che i Dios, xaq xukamulij chik ub'ixkil i tzij chi xub'ij nab'e.

⁴⁰ Are xtzalij chaloq, xeuriq tan chik utijoxelab' kewarik; man i kib'a'wach lik kumutz' rib' rumal i waram; rumali chi lik kkiriq taj wach kkib'ij che i Jesús.

⁴¹ Are xtzalij chali uroxmul, xub'ij chke: —K'a kixtijin yix che i waram xaq k'a ix uxlannaq, sta ile, chixwalijoq man xuriq i or chi i pacha Winaq chi Xolalaxoq chwach Ulew kjach ni pki'ab' i ajmakib'.

⁴² Chixwalijoq, jo'; man ya knaqajab' i jun chi kinjachaw pki'ab' ajch'oj chwij —keje ile xub'ij i Jesús chke.

Uchapik i Jesús kumal i ajch'oj chrij

⁴³ K'a ktijin ne i Jesús chitzij are xupon pan ma Judas, chi jun chke i kab'lajuj utijoxelab'; je rok'am b'i uk'iyal winaq chi kok'am ch'ich', xaq o kok'am che'. Ike le je taqtal b'i kumal kaj-atzil i rajpatan i Dios, kumal i tijonelab' re i atb'al tzij, xaq kumal unimaqil i tinimit.

⁴⁴ I ma Judas, chi ajjachanel re i Jesús, ub'im chik i tziji chke i ajchapol re i Jesús: “Are i jun chi kintz'ub'aj, are ire le; chichapa, chik'ama b'ik xaq lik miwo'taj chik”.

⁴⁵ Are uri xtejeb' pan ru' i Jesús xaq xub'ij che: —¡Tijonel! —Te'uri xutz'ub'aj.

⁴⁶ Are uri xkichap i Jesús xaq xkiyut'u.

⁴⁷ Xwiri, jun chke i utijoxelab' xresaj la li uch'ich', xuselij b'i uxikin utaqon i atz laj rajpatan i Dios.

⁴⁸ Are uri i Jesús xutz'onoj chke i winaq: —¿B'uchak chi xixk'un yix ru' ch'ich' xaq ru' che' chinchapik pacha taq jun ili'om?

⁴⁹ Ij ij xink'iji chixol prachoch i Dios chuk'utik utzij i Dios chke i winaq, xwiri xinichap taj, man keje ile k-antaj na pacha tz'ib'tal kan chupam uwuj i Dios —xcha i Jesús chke.

⁵⁰ Konojel i tijoxelab' xe'anmajik, xkiya kan i Jesús utukel.

⁵¹ Xwiri o jun ala chi xwi jun sawan ulik'om chrij, xuterb'ej b'i Jesús; xwiri i ala le xkichapo.

⁵² I ala le xujuruj b'i rib' chupam i sawan, lik keje ile ch'analik x-anmajik.

I Jesús o chwach i atb'al tzij re kki'at tzij unimaqil puwi

⁵³ Are uri xkik'am b'i Jesús chwach i atz laj rajpatan i Dios. Chila xkimol wi kib' konojel i kaj-atzil i rajpatan i Dios, konojel unimaqil i tinimit, xaq konojel i tijonelab' re i atb'al tzij.

⁵⁴ I ma Pedro xterej b'i chrij i Jesús chinaj, xok b'i k'a chwaja re i rachoch i atz laj rajpatan i Dios. Xkub'i chila ku' i chajinelab' re i rachoch i Dios, chi ketijin chumi'saxik kib' chi a'.

⁵⁵ I kaj-atzil i rajpatan i Dios le, xaq konojel i jutz'ob'aj unimaqil chi kki'at tzij pkitinimit aj Judío kkitzukuj wach ukojik umak i Jesús ki'ano re kamsab'al re, xwiri xkiriq taj.

⁵⁶ Tupu lik je k'i xkitzukuj umak i Jesús, xwiri xa kuch'ojij rib' kitzij chkiwach.

⁵⁷ Je o jujun xewalijik i xkinojij tzij chrij i Jesús:

⁵⁸ —Yoj xqata chi xub'ij, yin kinwulijsaj ni rachoch i Dios chi ki'anom i winaq; xwiri churox ij kinyak jun chik chi winaq taj ke'anawik.

⁵⁹ Xwiri ru' ti ile lik xjunamtaj ti kitzij.

⁶⁰ Are uri i atz laj rajpatan i Dios xwalij an chkixol konojel i winaq; xutz'onoj che i Jesús: —¿B'uchak kala' ti uwach? ¿Wach ile chi ketijin chub'ixkil chawij?

⁶¹ Xwiri i Jesús xaq xula' ti uwach che. Are uri i atz laj rajpatan i Dios xutz'onoj chik che: —¿Yet at Cristo, chi uk'ojol i lo'laj Dios?

⁶² I Jesús xub'ij: —Yin, yin ile chi xab'ij. Yix kiwil ni i pacha Winaq chi Xolalaxoq chwach Ulew kul puwiqab'im i nim laj Dios chi Ronojel Ktiki Che, xaq kk'un ni chikaj pa sutz' —xcha i Jesús chke.

⁶³ Are uri i atz laj rajpatan i Dios xuraqch'ij u'u', k'utb'al re chi lik o roywal; xub'ij: —Nti chik uchak we kek'un jub'an chik winaq chukojik umak.

⁶⁴ Man yix lik xita wach i tzij xub'ij, i tzij le utz ti laj taq tzij chrij i Dios. ¿Wach kib'ij yix che ile? —Xcha. Are uri konojel xkib'ij chi lik ajmak, rumali rajwaxik chi kkamsaxik.

⁶⁵ Je o jujun xkijeq uchub'axik upalaj, xaq xkich'uq upalaj che te'uri xkich'ayo. Are uri xkitz'onoj che: —Chab'ij pe ¿pachin taq xatch'ayawik? —Xecha. Xaq keje xki'an i chajinelab' re i rachoch i Dios xkich'ay i Jesús che upalaj ru' mo'lem ab'.

I ma Pedro kub'ij chi reta'am ti uwach i Jesús

⁶⁶ I ma Pedro o qaj chwaja ikem, are uri xpon pan jun ixoq chi ajchak prachoch i atz laj rajpatan i Dios.

⁶⁷ I ixoq le are xrilo chi ma Pedro ktijin chumi'saxik rib' chi a', lik xuk'am utaqexik, are uri xub'ij che: —Yet xaq at rachi'il i Jesús chi aj Nazaret —xcha.

⁶⁸ Xwiri i ma Pedro xruwaj uwach, xub'ij: —Yin lik weta'am ti uwach achi le; xaq weta'am teneri wach taq i kab'ij chwe le. Te'uri x-e pan chisaq che i elb'al b'ik, are uri xch'aw jun teren.

⁶⁹ Te'uri ixoq le xril chik uwach i ma Pedro ukamul, are uri xujeq ub'ixkil chke i winaq chi je o chila: —I achi le lik kachi'il i jub'an —xcha.

⁷⁰ Xwiri i ma Pedro xaq xub'ij chik chi reta'am ti uwach i Jesús. X-on chupan jub'i', i winaq chi je o chila xkib'ij chik che: —Qatzij, yet lik at kachi'il ike le; man at aj Galilea —xecha che.

⁷¹ Are uri ma Pedro xukuxtaj ub'i i Dios i xub'ij chke: —Minijek'ja ru' i achi le chi kib'ij, man lik saq laj tzij kinb'ij chi lik weta'am tene uwach —xcha.

⁷² Are uri xch'aw an i teren ukamul; i ma Pedro xk'un chuk'ux wach b'ital che rumal i Jesús: Chuxe'el uch'awik ukamul teren oxmul kawuwaj ni inwach; xb'ix che. Are uri ma Pedro lik xok che o'ej.