Marcos 12 - Wuj Pa K'ubultzij

I tijojb'al tzij chkij i utz ti laj taq ajchakib'

¹ I Jesús xujeq lapanik ku' i winaq ru' tijojb'al taq tzij, xub'ij chke: Jun achi xutik jub'an uva prulew xaq xukoj koral chrij, xuyijb'a jun k'ijib'al ipa kkiyitz' wi uwa'al i uva le, xaq xuyijb'a jun ja tak'tik chupam i tikon le, chajb'al re ronojel i tikon. Te'uri xeukoj jujun ajchakib' ajpamey ru'; ire x-e che jun tinimit naj.

² Are xuriq i ij re i molonik, i rajaw i tikon le xutaq b'i jun umokom chutz'onoxik urasion ire chke i achiyab'.

³ Xwiri are xupon i mokom le, i achiyab' xkichapo, xkich'ayo, xaq xkitzalijsaj b'ik, lik nti xkiya b'i che.

⁴ Te'uri i rajaw i tikon le xutaq b'i jun chik umokom. Xwiri i umokom le are xuponik xkisok che ujolom xaq xkiyo'ya u'ij.

⁵ I rajaw i tikon le xutaq b'i jun chik umokom, xwiri i mokom le xkamsaxik. Te'uri xeutaq chub'i jub'an chik umokom. Xwiri o jujun x-an k'ax chke xaq o jujun xekamsaxik.

⁶ Xek'is b'i umokom nti chik keutaqo, xwi chik uk'ojol chi lik k'ax kuna'o, xub'ij: Wo'or kintaq b'i wak'al ku'. Man xuch'ob'o chi lik kekojon ni che are kkil uwach; keje ile xub'ij i rajaw i tikon, are u'ankil uri chi xutaq b'i uk'ojol ku' i achiyab' le.

⁷ Xwiri, i ajchakib' are xkil uwach uk'ojol i rajaw ulew, xkib'ij chkiwach: Ire le are i rajaw ulew k-on panoq, rumali su' chqakamsaj man keje ile kkanaj ni kan ulew pqa'ab' yoj; xecha.

⁸ Rumali xkichapo, xkikamsaj xaq xkik'aq b'i uch'akul chrij i koral. Keje ile xub'ij i Jesús chke.

⁹ Are uri xutz'onoj chke: ¿Wach nawi uri ku'an i rajaw ulew le kich'ob' yix? Lik k-e ni uri chkikamsaxik konojel i ajchakib' le; te'uri kuya ni ulew le chke jub'an chik.

¹⁰ ¿Iwajlam ti b'ari uwach uwuj i Dios yix? Chi keje iri kub'ij: I ab'aj chi xkik'aq b'i u'ij ajyakol ja, are i ab'aj ile chi lik nim uchak xe'eloq.

¹¹ Keje ile xu'an i Ajwal Dios, rumali chi lik kojkikotik. Xcha i Jesús.

¹² Are uri xkaj utz'apixik i Jesús pa prexil, man keta'am chi tijojb'al tzij chi xub'ij re kojb'al kimak ike xu'ano. Xwiri rumal kkixij kib' chke i winaq, xkiya kanoq te'uri xe'ek.

Tz'onb'enik chrij utojik alkawal

¹³ Te'uri xetaq b'i jub'an aj fariseo, xaq jub'an chke utzob'ajil ma Herodes ru' i Jesús, man kkaj ike chi kub'ij jun tzij chke re tzaqsab'al re.

¹⁴ Are xeupon ru' i Jesús, xkib'ij i tziji che: —Tijonel, qeta'am chi arewi kab'ij i saq laj tzij, man kaya ti awib' chke i winaq wach kkib'ij. Man yet ka'at ti tzij puwi jun winaq rumal wach ktzunik, yet lik kak'utu wach rok'axik qak'aslemal kqa'an chwach i Dios. Chab'ij uri chqe: —¿Utz nawi we kqatoj alkawal che i ma César aj Roma? ¿Rajwaxik nawi kqatojo o rajwaxik taj?

¹⁵ Xwiri i Jesús reta'am chi xa k'amb'al upam kki'ano, man ike le xa keb' kipalaj, xub'ij chke: —¿B'uchak chi kitzukuj tzaqsab'al we? Chik'ama pe li jun saqpwaq chwe, man kwilo —xcha.

¹⁶ Are uri ike xkik'am b'i saqpwaq, i Jesús xub'ij chke: —¿Pachin taq uk'exwach iri chi o chwach i saqpwaqi xaq i b'iyaj chi o che? Ike xkib'ij: —Re i ma César.

¹⁷ Are uri i Jesús xub'ij chke: —Chiya uri che i ma César ni'pa re i ire; xaq chiya che i Dios ni'pa i re ire —xcha i Jesús chke. I la'b'al uwach le chi xu'an i Jesús, lik xkib'isoj.

Tz'onb'enik chrij uwalijik i Jesús che i kamik chkixol i kamnaq

¹⁸ Are uri o jujun chke aj Saduceo xeupon chutz'onoxik che i Jesús wach usuk' i kiwalijik i kamnaq, man ike kkikoj taj we kewalij i kamnaq. Rumali xki'an i tz'onb'eniki che i Jesús:

¹⁹ —Tijonel, i mam Moisés utz'ib'am kanoq, we xkam jun achi k'ulanik, xwiri we nti kan rak'al ru' rixoqil, rajwaxik uri chi jun ucha' i kamnaq le kk'uli ru' ixoq malkan, man keje ile kealax ni rak'al ru' puk'exel achi chi xkamik.

²⁰ Ile xuk'ulmaj juyak ku' wuqub' achiyab' katz kicha' kib'. I atz xk'uli nab'e, xwiri xkamik, nti rak'al xealax kan ru' i rixoqil.

²¹ I ukab' cha'xel xk'uli ru' ixoq malkan, xwiri xaq xkamik, xaq nti rak'al xealax kan ru' ixoq le; xaq keje xu'an ru' urox cha'xel.

²² Keje xki'an ile konojel i je wuqub', is xek'uli ru' i ixoq le; xwiri nti kak'al xealax kan ru' ixoq malkan. Pa k'isb'al re xkam b'i ixoq le.

²³ Are kuriq i ij chi kewalij i kamnaq, ¿Pachin uri chke i wuqub' achiyab' le lik saqil rachijil i ixoq? Man che wuqub' achiyab' le xek'uli ru' —xecha che i Jesús.

²⁴ I Jesús xula' uwach chke: —Yix lik ix sachnaq, man iweta'am taj wach tz'ib'tal kan chupam uwuj i Dios, xaq iweta'am taj wach i nim laj ucho'ab' i Dios.

²⁵ Man are kewalij i kamnaq, i achiyab' xaq i ixoqib' kek'uli ti chik, ke'eloq pacha i ángel chi je o chikaj.

²⁶ I kiwalijik i kamnaq chi kitz'onoj le, ¿Iwajlam ti b'ari wach kub'ij uwuj mam Moisés, chi klapan chrij i k'ix chi ktoqow pa a'? I Dios xub'ij che mam Moisés: “Yin in u-Dios mam Abraham, in u-Dios mam Isaac xaq in u-Dios mam Jacob.”

²⁷ ¡I Dios are ti jun Dios ke i kamnaq, Ire are jun Dios ke i je k'aslik! Rumali yix lik ix sachnaq; keje ile xub'ij i Jesús chke.

I tzij pixab' re i Dios chi lik mas o u'ij

²⁸ Are xkita xaq xkilo chi Jesús lik utz ula'ik uwach xu'an chke, jun chke i tijonelab' re i atb'al tzij, chi xeuta are kichapom kib' chitzij; xtejeb' pan ru' i Jesús, xutz'onoj che: —¿Pachike lik nab'e chke i utzij upixab' i Dios?

²⁹ I Jesús xula' uwach che: —Chita pe', ix aj Israel: I tzij upixab' i Dios chi lik o u'ij are iri: I Ajwal Dios, xwi ire Ajwal.

³⁰ Lik k'ax chana ni Ajwal Dios ru' ronojel ak'ux, ru' ronojel awanima, ru' ronojel anojb'al, xaq ru' ronojel acho'ab', are i tzij pixab' ile chi rajwaxik chi lik kixkojon che.

³¹ I ukab' tzij pixab' are iri: K'ax cheana ni alok'anij pacha k'ax una'ik awib' yet ka'ano. Mijun tzij pixab' chi lik nim u'ij chwach i keb' le —xcha i Jesús che.

³² I tijonel re u'atb'al tzij mam Moisés, xub'ij che i Jesús: —Lik keje ile tijonel, i xab'ij le lik qatzij, man xa jun i Dios olik, nti chik jun chik.

³³ I k'ax una'ik i Dios ru' ronojel qak'ux, ru' ronojel qanojb'al, ru' ronojel qanima, ru' ronojel qacho'ab', xaq i k'ax una'ik qalok'anij pacha k'ax una'ik qib' yoj, ni'pa taq ile lik mas utz ni chwach uporoxik i jalajuj taq chikop chwach i Dios, xaq usujuxik i jalajuj taq sipon puwi i porb'al sipon —keje ile xub'ij i tijonel che i Jesús.

³⁴ I Jesús are xuta chi i tijonel le lik utz ula'ik uwach xu'ano, xub'ij che: —Lik naj taj at o wi che i ajawinik re i Dios —xcha. Are uri lik mijun winaq xukowij chik u'anik jun tz'onb'enik che i Jesús.

¿Pachin chke winaqirnaq wa li i Cristo?

³⁵ I Jesús ktijin chuk'utik utzij i Dios chke i winaq chila prachoch i Dios, xutz'onoj chke: —¿B'uchak kkib'ij i tijonelab' re u'atb'al tzij mam Moisés, chi i Cristo are jun umuq uxikin mam David?

³⁶ I mam David ub'im kan i tziji rumal i Lo'laj Utewal i Dios, xub'ij: I Ajwal Dios xub'ij che i Wajwal Cristo: Chatkul pinwiqab'im k'a kuriq ni ij chi ni'pa je ajch'oj chawij, keinya ni pawaqan. Xub'ij.

³⁷ —Xwiri, ¿Wach u'ankil uri ile chi i Cristo umuq uxikin mam David; man are mam David le xub'ij Ajwal che i Cristo? —Xcha. I uk'iyal winaq chi je o chila lik xekikot chutayik i tzij le chi xub'ij i Jesús.

I Jesús kukoj kimak i tijonelab' re ujer atb'al tzij

³⁸ I Jesús xub'ij i tziji are ktijin che i k'utunik: Chi'ana kwent iwib' chke i tijonelab' re i atb'al tzij man ike le lik kkaj ukojik ki'u' charchaq; xaq qus kkita are kya' rutzil kiwach kumal konojel i winaq pa taq k'eb'al kojb'al ki'ij.

³⁹ Kkitzukuj i kub'ib'al chi lik o u'ij pa ja re molb'al ib' ke i judío, xaq are ke'e pa wa'im che jun nima'ij lik are kkitzukuj i kub'ib'al chi o u'ij.

⁴⁰ Xaq kkimaj i kachoch ixoqib' malkanib', xwiri kki'an che kib' pacha taq nti kimak kki'ano rumali naj kelapan taq ru' i Dios. Xwiri ike le lik kya' ni jun nim laj tojpen pkiwi. Xcha i Jesús chke.

Usipon jun ixoq malkan

⁴¹ Chrijil chik ile i Jesús xkub'i pan chwach i kaxa ipa kya' wi pwaq prachoch i Dios, keutaqej konojel i winaq chi kkiya kipwaq chupam i kaxa le, je k'i i b'eyomab' chi lik k'i i pwaq kkiya'o.

⁴² Are uri xupon pan jun ixoq malkan xaq lik nib'a', xuya keb' upwaq chi nti qas rajil, chupam jun chke i kaxa chi o chila.

⁴³ Te'uri i Jesús xeusik'ij utijoxelab' ru', xub'ij chke: —Lik saq laj tzij kinb'ij chiwe, chi ixoq malkan le lik k'i ne i pwaq xuya chkiwach konojel ni'pa i winaq chi xkiya kipwaq chupam i kaxa.

⁴⁴ Man konojel i winaq kiya'om ni'pa to' uwi chik che i kipwaq, xwiri ixoq le chi lik nib'a' xuya ronojel ni'pa o ru'; lik nti chik xkanaj kan ru' —keje ile xub'ij i Jesús chke.