Marcos 10 - Wuj Pa K'ubultzij

I Jesús kk'utun chrij ujachik kib' i je k'ulinaq

¹ I Jesús xel chila Capernaum, x-e che i ulew Judea, che ulew chi o ch'aqap che i raqana Jordán. Chila lik je k'i i winaq xkimol tan chik kib' ru', are uri xok chik chuk'utik utzij i Dios chke pacha ax ku'an wi.

² Are uri je o jujun aj fariseo xetejeb' pan ru' i Jesús, xki'an jun tz'onb'enik che, xwiri xa re k'amb'al upam: —¿Yatal nawi che jun achi chi kujach rixoqil? —Xecha.

³ Are uri i Jesús xula' uwach chke: —¿Wach xixutaq mam Moisés che chi ki'ano?

⁴ Ike xkib'ij: —I mam Moisés xuya che jun achi chi kujach rixoqil ru' jun wuj re jachb'al kib'.

⁵ Are uri i Jesús xub'ij chke: —I mam Moisés xuya i taqanik le chiwe man lik ix b'uy laj taq winaq.

⁶ Xwiri chuxeb'al u'anik ronojel I Dios xu'an achi xaq ixoq.

⁷ Rumali, jun achi keuya kan uqajaw uchuch man kkok'aj kib' ru' i rixoqil.

⁸ Ke'el uri chi je keb' keu'an xa jun ch'akulaj. Rumali chi ke'eloq xa je jun chik.

⁹ Rumali konojel ni'pa xkok'aj kib' pub'i i Dios nti pu'ab' jun winaq kujach kipam, man are i Dios x-anaw chke chi xkok'aj kib' —keje ile xub'ij i Jesús chke.

¹⁰ Are je o chik ru' ja, are uri i utijoxelab' xkitz'onoj chik che puwi i tzij le.

¹¹ Are uri i Jesús xub'ij chke: —Jun we kujach rixoqil man kk'uli ru' jun chik ixoq, lik o umak uri i achi le chwach i nab'e rixoqil.

¹² Xaq keje jun ixoq, we kujach i rachijil man kk'uli ru' jun chik achi, xaq ixoq le lik o umak uri chwach i nab'e rachijil —keje ile xub'ij i Jesús chke.

I Jesús kuya utzil chomal pkiwi ak'alab'

¹³ I winaq xekik'am li ak'alab' ru' i Jesús, man kuya u'ab' pkiwi re kuyab'ej utzil chomal chke, xwiri i utijoxelab' xkijeq ki'atixik i je k'amawnaq li ak'alab'.

¹⁴ I Jesús are xril ile, lik xpe roywal, rumali xub'ij chke: —Chiya chke i ak'alab' chi kepe wu', mei'atij; man ike le o ke che i ajawinik re i Dios.

¹⁵ Lik saq laj tzij kinb'ij chiwe: Mijun kok che i ajawinik re i Dios, we ku'an ti che rib' pacha jun ak'al.

¹⁶ Te'uri xeu'aluj i ak'alab' xaq xuya u'ab' pkiwi, yab'al utzil chomal chke.

Jun achi b'eyom klapan ru' i Jesús

¹⁷ I Jesús are kumaj te chub'i ub'e, are uri xupon jun achi pa'anem ru', xxuki chwach xaq xutz'onoj che: —Utz laj Tijonel, ¿Wach nawi kin-ano, man kinriqb'ej re ink'aslemal chi nti uk'isik? —Xcha.

¹⁸ I Jesús xula' uwach che: —¿B'uchak kab'ij chwe chi in utz? I utz xa jun olik, ile are i Dios.

¹⁹ Yet aweta'am wach kub'ij utzij upixab' i Dios: Matkamsanik, mamin awib' ru' jun ixoq chi awixoqil taj; ma'an ela'; manuk' tzij chrij jun chik, matt'oronik; chakojo ki'ij aqajaw achuch.

²⁰ I achi xub'ij che i Jesús: —Tijonel, ronojel ile is kintijin chu'anik, injeqom li u'anik iri are k'a in k'ojol ala —xcha.

²¹ Xwiri i Jesús xumaj utaqexik ru' nim laj k'axnab'al uk'ux xaq xub'ij che: —Xa jun chik b'iroxik chi rajwaxik ka'ano: Jat, chak'ayij ronojel ni'pa o awu' te'uri chajacha i pwaq chke i nib'a'ib'. Keje ile kariq ni uri saqil laj b'eyomal chikaj. Te'uri chatpetoq i chatterej chwij —xcha i Jesús che.

²² I achi lik xok il are xuta ile, xaq lik kb'isonik x-ek man lik b'eyom.

²³ Are uri i Jesús xtaqen chrij chwach, xaq xub'ij chke utijoxelab': —¡Lik k'ax kokik i b'eyomab' pa ajawinik re i Dios! —Xcha.

²⁴ I tzij le chi xub'ij i Jesús lik xeukoj il i tijoxelab', xwiri i Jesús xub'ij chik chke: —Wak'al, lik k'ax okik pa ajawinik re i Dios.

²⁵ K'ax teneri rik'awik jun kamey che i tel re jun akuxa, chwach rokik jun b'eyom che i ajawinik re i Dios —xcha i Jesús chke.

²⁶ I tijoxelab' are xkita chik i tzij le, lik xe'ok il, te'uri xkitz'onoj chkiwach: —We keje ile ¿Pachin jun uri ktiki chuto'ik rib' chwach i kamik?

²⁷ Are uri i Jesús xumaj kitaqexik xaq xub'ij chke: —I winaq ketikar ti chu'anik, xwiri i Dios ronojel is ktiki che man ire nti jun b'iroxik we ktiki ti chu'anik.

²⁸ Are uri i ma Pedro xub'ij che: “Yoj ronojel ni'pa i o te qu' xqakanaj kanoq man lik xojterej chawij.” —Xcha.

²⁹ I Jesús xula' uwach: —Saq laj tzij kinb'ij chiwe, chi xapachin kuya kan rachoch, ratz ucha', ranab', uqajaw uchuch, rak'al xaq we rulew wumal yin, xaq rumal utz laj tzij k'ak' re i Dios,

³⁰ lik kuch'ak ni uri jo'winaq (100) mul puwi ile che i k'aslemal waral chwach i jyub' ta'aj chi rachoch, ratz ucha', ranab', uqajaw uchuch, rak'al xaq i rulew, tupu kutij ni jalajuj taq k'ax xwiri k-on panoq kuriq ni uk'aslemal chi nti uk'isik.

³¹ Man lik je k'i ile chi wo'or je o chunab'eyal xwiri kekanaj ni pa k'isb'al re; xaq je k'i ile chi wo'or je o pa k'isb'al re xwiri ke'e ni chunab'eyal —keje ile xub'ij i Jesús chke.

I Jesús xuroxmulij ub'ixkil ukamik

³² Are xe'e pa Jerusalén i Jesús xnab'ej b'i chkiwach utijoxelab', ike le lik je oknaq il xaq konojel ni'pa je teren b'i chkij lik xkixij kib' man ktijin ki'enam pa Jerusalén. Are uri i Jesús xeusik'ij chik i kab'lajuj utijoxelab' ru', are kitukel chik, xok chub'ixkil chke, wach kuk'ulmaj ni ire.

³³ Lik pacha i kiwilo ri, chi wo'or enam qe pa Jerusalén. Are kojupon chila, Yin chi Xinalaxoq chwach Ulew pacha Winaq, kinjachi ni pki'ab' i kaj-atzil i ajsujul sipon xaq pki'ab' i tijonelab' re i atb'al tzij. Kki'at ni tzij pinwi, kkib'ij na chi o uchak kinkamsaxik, xaq kinkijach ni pki'ab' i winaq chi aj Judío taj.

³⁴ Lik kinkiyo'ya na, kkik'aq nu b'i in-ij, kinkichub'aj na, kki'an ni k'ax chwe xaq kinkikamsaj na. Xwiri, churox ij kinwalij ni che i kamik. Keje ile xub'ij i Jesús chke.

I Jesús kula' uwach chke i ma Santiago xaq i ma Wan

³⁵ Are uri ma Santiago xaq i ma Wan chi je uk'ojol mam Zebedeo, xetejeb' pan ru' i Jesús, xkib'ij che: —Tijonel, yoj kqaj kqatz'onoj chawe chi ka'an jun utzil chqe —xecha.

³⁶ Are uri i Jesús xutz'onoj chke: —¿Wach utzil kiwaj chi kin-an chiwe?

³⁷ Ike xkib'ij che: —Are at o chik che awajawinik chi lik nim u'ij uchomal, kqaj yoj kaya ni chqe chi kojkub'i ni awu' patzal: Jun pawiqab'im xaq i jun pamoxim —xecha.

³⁸ Are uri i Jesús xula' uwach chke: —Yix iweta'am taj wach kitz'onoj. ¿Xatab'a kixtiki yix chuch'ijik i k'ax pacha i k'ax chi kinik'aw wi yin? ¿Xaq xatab'a kixtiki yix chuch'ijik uyej pacha uyej chi kinik'aw wi yin? —Xcha.

³⁹ Ike xkila' uwach: —Kojtiki'ik. I Jesús xub'ij chke: —Qatzij neri chi yix kixik'aw chupam i k'ax le xaq kitij ni uyej le, pacha kinik'aw wi yin,

⁴⁰ xwiri pin-ab' ti yin o wi ub'ixkil pachin taq kkub'i pinwiqab'im xaq pinmoxim. I k'ijib'al le kya' ni chke pachin lik ke ike yijb'am rumal i Dios —keje ile xub'ij i Jesús chke.

⁴¹ I lajuj chik tijoxelab' are xkita i tzij le lik xpe koywal che ma Jacobo xaq che ma Wan.

⁴² Xwiri i Jesús xeusik'ij ru', xub'ij chke: —Yix iweta'am, chi chkixol i to' winaq i je atol tzij chi je o pkiwi i tinimit, kki'an che kib' pacha je kajaw i winaq; xaq i winaq chi nimaq kipatan ke'ajawin pkiwi i kach winaq.

⁴³ Xwiri chixol yix keje ti ile, lik junwi man we o jun chiwe kraj chi k-on nim u'ij rajwaxik uri chi ajchak na chkij i rachi'il.

⁴⁴ Xaq pachin jun chi kraj kuya rib' chunab'eyal, chu'ana uri ajtaqon che rib' chkij konojel.

⁴⁵ Man mitene i pacha Winaq chi Xolalaxoq chwach Ulew, lik nti o xchakun taq chrij ire; are ne ire kchakun chkij konojel i winaq xaq xujach ni uk'aslemal pa kamik, tojb'al re i elb'al pa k'ax ke konojel —xcha.

I Jesús xukunaj jun mawach chi ma Bartimeo ub'i

⁴⁶ I Jesús junam ku' utijoxelab' xeupon pa tinimit Jericó, are xe'el chik chila lik je k'i i winaq xeterej b'i chkij. O jun mawach chi ma Bartimeo ub'i, uk'ojol ma Timeo kul chi b'e, kutz'onoj upwaq chke i winaq.

⁴⁷ I mawach le are xuta chi are i Jesús aj Nazaret ktijin rik'awik chila ipa o wi ire, are uri xsik'in chub'ixkil i tziji: —¡Jesús, chi at umuq uxikin kan mam David, chawila tob'al inwach! —Xcha.

⁴⁸ Lik je k'i i winaq xeyajawik man kkaj kumayij sik'inik, xwiri ire xa xukowij ub'ixkil che i Jesús: —¡Yet, chi at umuq uxikin kan i mam David, chawila tob'al inwach! —Xub'ij.

⁴⁹ Are uri i Jesús xtak'i'ik, xaq xub'ij: —Chisik'ij. Te'uri xkisik'ij i mawach xaq xkib'ij che: —Chakowij ak'ux, chatwalijoq man katusik'ij —xecha che.

⁵⁰ Are uri i mawach le juntir xuk'aq kan i k'ul chi ulik'om chrij, xaq xsak'lin chikaj. Te'uri x-e ru' i Jesús.

⁵¹ I Jesús xutz'onoj che: —¿Wach kawaj chi kin-an chawe? I mawach le xub'ij: —Tijonel, kwaj kintzunik.

⁵² I Jesús xub'ij che: —Utz kat-ek; at utzirnaq chik rumal ukub'ib'al ak'ux. Are uri i mawach le juntir xtzunik xaq xterej b'i chrij i Jesús.