Marcos 1 - Wuj Pa K'ubultzij

Ma Wan chi Ajqajsanel Ya o pa tz'inilik jyub' chaqij

¹ Are iri are i jeqb'al i utz laj tzij k'ak' chrij i Jesucristo, chi uk'ojol i Dios.

² Utz'ib'am kan mam Isaías chi profeta. Ire xutz'ib'aj i tziji chi xub'ij i Dios che Uk'ojol: “Chata pe', xub'ij che, kintaq b'i jun intaqon chi knab'ej b'i chawach, man kuyijb'a pan i b'e chawach.

³ Ktataj jun ch'awb'al chi ksik'in chub'ixkil i tziji pa tz'inilik jyub' chaqij: Chiyijb'a ub'e i Ajwal, chib'ut'u ni'pa i jul xaq chiwesaj ni'pa i tanalaq.” Keje ile tz'ib'tal kanoq.

⁴ Lik keje ile xe'eloq, man xk'un jun achi chi ma Wan ub'i Ajqajsanel Ya, xok chkipixb'axik i winaq chila pa tz'inilik jyub' chaqij xaq xuqajsaj ya pkiwi, xub'ij chke: “Chijalwachij inojb'al, xaq chitz'onoj uqajsaxik ya piwi, man i Dios kukuy ni imak”; chiwe xcha.

⁵ Che taq i ij le lik je k'i ni i winaq xeupon ru' chila chutayik utzij ma Wan le; xeupon i aj Jerusalén, xaq konojel jub'an tinimit re i jyub' Judea. Chila xkijach wi kimak, te'uri i ma Wan xuqajsaj ya pkiwi chila chupam i raqana Jordán.

⁶ I ma Wan le, i u'u' antal che i rismal kamey; i ximb'al upam are jun ch'aqap tz'um, i uwa chi kutijo are i sak' xaq i uwa'al kab' chi aj pa taq es.

⁷ Are ktijin chub'ixkil utzij i Dios, xub'ij i tziji chke i winaq: “Chwijil yin kk'un chik jun chi lik nim u'ij chinwach yin, chi lik kmajaw ti chwe chi kinchakiqaj chutorik uwach uxajab' che, man lik nim u'ij.

⁸ Yin, xa ya xinqajsaj piwi, xwiri Ire kuqajsaj ni i Lo'laj Utewal i Dios piwi.” Keje ile xub'ij ma Wan chke i winaq.

Uqajsaxik ya puwi i Jesús

⁹ Che taq i ij le xel i Jesús pa Nazaret chi o chila che i ulew re Galilea, x-e chi raqana Jordán, are uri i ma Wan xuqajsaj ya puwi chupam i raqana le.

¹⁰ Are xel li Jesús pa ya xaqte'et xrilo chi xjaqtaj i kaj, xaq i Utewal i Dios xqaj li puwi Ire pacha jun palomax.

¹¹ Xaq xtataj jun ch'awb'al chikaj chi xub'ij i tziji: “Yet at Wak'al chi lik k'ax katinna'o, xaq lik kinkikot awumal.” Keje ile xub'ij i ch'awb'al.

Itzel kutzukuj wach tzaqsab'al re i Jesús

¹² Te'uri i Jesús xk'am b'i rumal Utewal i Dios che jun tz'inilik jyub' chaqij.

¹³ Chila xk'iji wi kawinaq (40) ij chkixol itzel taq chikop, are uri Itzel xuk'am upam i Jesús man xraj utzaqsaxik chupam i mak atzalal. Chrijil chik ile i ángel xeupon chuto'ik i Jesús.

I Jesús xujeq uchak pa Galilea

¹⁴ Chrijil chik utz'apixik ma Wan prexil, are uri i Jesús x-e pa Galilea chub'ixkil i utz laj tzij k'ak' re i Dios.

¹⁵ Xub'ij chke: “Ya xuriq i ij chi uch'ikom i Dios, chi kjeqan i ajawinik re Ire. ¡Chijalwachij inojb'al chi utz taj! ¡Chikub'a ik'ux che i utz laj tzij le!” Keje ile xub'ij i Jesús chke.

Jesús xeusik'ij kajib' ajchapol kar

¹⁶ I Jesús are ktijin chi b'e chuchi' i mar Galilea, are uri xeril keb' achiyab' katz kicha' kib', ma Simón xaq i ma Andrés. Ike le ajchapol kar rumali ketijin chuk'aqik i katraya pa ya.

¹⁷ I Jesús xub'ij chke: —Chixpetoq xaq chixterej chwij man Yin kin-an ni chiwe chi ix ajmolol winaq re keterej chwij —xcha.

¹⁸ Are uri i achiyab' le juntir xkiya la kan kitraya, xeterej b'i chrij i Jesús.

¹⁹ I Jesús xb'in chupan jub'i', are uri xril pan uwach ma Jacobo i ma Wan chi je uk'ojol mam Zebedeo; ike le je o chupam jun barco ch'utin, ketijin chuyijb'axik kitraya.

²⁰ Are uri i Jesús xeusik'ij ru'. Ike le juntir xkiya kan kiqajaw xaq i mokom chila chupam i barco, —xeterej b'i chrij i Jesús.

Achi chi o i tzel tew che

²¹ I Jesús xaq konojel ni'pa je enaq ru', xeupon pa tinimit Capernaum, are je o chik chila, xe'ok pa ja re molb'al ib' ke i Judío che jun ij sábado; are uri xujeq uk'utik utzij i Dios chila.

²² I winaq lik xkib'isoj wach taq i k'utunik xu'an i Jesús chke, man Ire are ku'an i k'utunik ku' lik ko uwach chu'anik; keje taj pacha kki'an i tijonelab' re atb'al tzij.

²³ Xwiri o jun achi chila pa ja re molb'al ib' ke i Judío le chi o itzel tew che, ire xsik'in chub'ixkil i tziji:

²⁴ —¿Wach kawaj chqe yoj, Jesús aj Nazaret? ¿Xatab'a xatk'un chusachik qawach? Yin weta'am awach Yet, xaq weta'am chi at Lo'laj Rak'al i Dios —xcha i itzel tew.

²⁵ I Jesús lik xula' uwach che itzel tew, xub'ij che: —¡Match'aw chik! ¡Chawo'taj kan achi le!

²⁶ Are uri i itzel tew ko xub'arb'a i achi le, xaq lik ko xsik'inik are xel b'ik.

²⁷ Konojel i winaq lik xe'ok il xaq xe'ok chutz'onoxik chkiwach: —¿Wach taq usuk' ile? ¡Lik k'ak' i k'utunik ku'ano, xaq lik ko uwach chuk'utik! ¡Lik kuya i taqanik chke itzel taq tew xaq ike lik kekojon che! —Keje ile xkib'ij i winaq.

²⁸ Lik juntir xpax uwach u'ij i Jesús chwach ronojel i ulew Galilea.

I Jesús xrutzirsaj uchuch uji' ma Simón Pedro

²⁹ I Jesús junam ru' ma Jacobo xaq i ma Wan xe'el li pa ja re molb'al ib' ke i Judío, xe'e chi kachoch ma Simón xaq i ma Andrés.

³⁰ Are xeupon ru' ja i uchuch uji' ma Simón lik iwab', kotz'ol chwi ch'at rumal i a' tew chi o chrij, rumali xkib'ij che i Jesús.

³¹ Are uri i Jesús xtejeb' pan ru' ixoq, xuchap che u'ab' xaq xuwalijsaj, i ixoq le juntir xchup i a' tew chrij are uri xok chuya'ik wach kkitijo.

I Jesús k'i iwab'ib' xeukunaj

³² Are xok a'ab' i winaq xkitikb'a li uk'amik konojel iwab'ib' ru' i Jesús xaq xkik'am li ni'pa o itzel taq tew chke.

³³ Konojel i winaq re i tinimit xkiriq kib' chila tzam ja re i tinimit ipa o wi i Jesús.

³⁴ Are uri i Jesús xeukunaj iwab'ib' chi o jalajuj taq yob'il chke, xaq xeresaj b'i k'iyal itzel taq tew. Xwiri xuya ti chke itzel taq tew le chi kech'awik man ike keta'am uwach i Jesús.

I Jesús kutzijoj utzij i Dios pa taq ja re molb'al ib' ke i aj Judío

³⁵ Che jun chik ij i Jesús lik k'a equm xwalijik, xel pa tinimit x-e chutz'onoxik che i Dios che jun k'ijib'al tz'inilik.

³⁶ I ma Simón junam ku' i rachi'il xe'e chutzukuxik i Jesús.

³⁷ Are xkiriqo xkib'ij che: —Konojel i winaq ketijin chatzukuxik.

³⁸ Xwiri i Jesús xub'ij chke: —Jo' chik che jub'an komon chi naqaj je o wi, man rajwaxik xaq kinb'ij utzij i Dios chke i winaq chila, man are inchak ile in petnaq —xcha.

³⁹ Are uri i Jesús x-e che ronojel i ulew Galilea, chub'ixkil utzij i Dios chke i winaq pa ja re molb'al ib' ke i Judío chke i jalajuj taq tinimit xaq xeresaj itzel taq tew chke i winaq.

I Jesús xukunaj jun achi chi o yob'il che utz'umalil

⁴⁰ O jun achi chi o te'eq yob'il che utz'umalil xtejeb' pan ru' i Jesús, xxuki chwach xaq xub'ij che: —Ajwal, wetene kawaj kawesaj i yob'il chi o chwe —xcha.

⁴¹ Are uri i Jesús lik xril tob'al uwach, xuchapo xaq xub'ij che: —Kwaj, ¡Chatutziroq! —Keje ile xub'ij i Jesús che achi.

⁴² Are xb'itaj i tzij le rumal i Jesús, juntir xik'aw i yob'il che utz'umalil, i lik ch'am xkanajik.

⁴³ Te'uri i Jesús xu'ijla b'i achi le, lik xupixb'aj b'ik:

⁴⁴ —Chata pe', lik malap che jun winaq wach xin-an pak'aslemal; xwi jak'utu awib' che i rajpatan i Dios, k'utb'al re chi nti chik yob'il chawe. Xaq chak'ama b'i asipon pacha ub'im mam Moisés, tioxb'al re che i Dios rumal akuntajik. Keje ile kketamaj ni i rajpatan i Dios chi at utzirnaq chik che i k'ax chi o te'eq chawe —keje ile xub'ij i Jesús che achi.

⁴⁵ Xwiri i achi le are x-ek xok chulapik chke konojel i winaq wach xu'an i Jesús puk'aslemal. Rumali i Jesús xok ti chik pa taq tinimit, xa tzam taq ja chik xok wi ipa nti wi k'iyal winaq. Tupu i Jesús xuk'ut ti chik rib' chke i winaq xwiri lik je k'i xeupon chrilik chi je petnaq pa jalajuj taq k'ijib'al.