Lucas 9 - Wuj Pa K'ubultzij

I Jesús xeutaq b'i utijoxelab' chub'ixkil i ajawinik re i Dios

¹ I Jesús xeumol i kab'lajuj utijoxelab' ru' xaq xuya kicho'ab', xuya pki'ab' kkesaj itzel taq tew, kekutzirsaj iwab'ib'.

² Te'uri xeutaq b'i chub'ixkil i utz laj tzij k'ak' re i ajawinik re i Dios, xaq chkutzirsaxik iwab'ib'.

³ Xub'ij chke: —Are kix-ek lik nti kik'am b'ik re ib'e, mitene ich'amiy, xaq mitene i teb', mitene iwa, mitene pwaq, xaq mitene i'u' re kijalo.

⁴ Xa pachike ja kixupon wi, chixkanaj kan chila, k'ate kiya kanoq are kixel ni che i k'ijib'al le.

⁵ We o tinimit kixkik'ulaj taj, chixel chila. Xwiri are kixel che i tinimit le, chipupa kan ulew che iwaqan k'utb'al re chke chi o k'ax kpe ni pkiwi.

⁶ Ike xkimaj b'i kib'e; xe'e pa taq komon re i ulew le. Xkiya utzijol i utz laj tzij re i Dios, xaq xekikunaj iwab'ib'.

Uk'achirik ma Herodes

⁷ I ma Herodes, chi ajawinel, xuta utzijol ronojel ni'pa i ktijin uk'ulmaxik. Rumali chi lik kuriq taj wach taq ku'ano, man je o jujun kkib'ij chi are i etz ma Wan Ajqajsanel Ya xk'un chik saq chwach.

⁸ Xaq o jub'an chik kkib'ij chi are i profeta mam Elías xwinaqir chik; xaq o jub'an chik kkib'ij chi are jun chik profeta chi xk'un chik saq chwach.

⁹ Xwiri i ma Herodes xub'ij: —Lik yin xintaq relsaxik ujolom i ma Wan. ¿Pachin uri i achi le chi wo'or kinta chi lik k'i i nimaq taq anik u'anom? Rumali chi ma Herodes lik kutzukuj wach rilik i Jesús ku'ano.

Jesús xeutzuq lajujwinaq kab'lajujmo' (5,000) achiyab'

¹⁰ I apostolab' re i Jesús are xetzalij chaloq lik xkilap che i Jesús ronojel wach i xki'ano. Te'uri ire xeuk'am b'i k'a chunaqaj i tinimit Betsaida.

¹¹ Xwiri are xkita uk'iyal winaq xaq xeterej b'i chkij. Ire xeuk'ulaj ru' xaq xok chub'ixkil i ajawinik re i Dios chke, xaq xerutzirsaj ni'pa i iwab'ib'.

¹² Are ya kqaj i ij i kab'lajuj utijoxelab' i Jesús xetejeb' pan ru', i xkib'ij che: —Chea'ijla b'i i winaqi, man ke'e pa uxlanem xaq che'oj chutzukuxik wach i kkitijo pa taq komon xaq pa taq k'ijib'al naqaj, man waral ipa oj o wi lik nti olik.

¹³ I Jesús xub'ij: —Chiya yix chke wach i kkitijo Ike xkila' uwach: —Yoj lik nti o qu', xwi jo'ob' wa re trigo ru' keb' kar olik. ¿O kawaj yet ke qalo'o wach i kkitij ni'pa i winaqi? —Xkib'ij.

¹⁴ Kolo je lajujwinaq kab'lajujmo' (5,000) uk'iyal achiyab' je moltajnaq. Xwiri i Jesús xub'ij chke utijoxelab': —Cheikub'a pa taq tzob'ajil, lajuj kawinaq (50) winaq pa taq tzob'ajil chi'ana chke —xub'ij.

¹⁵ Keje xki'an ile, xekub'i konojel.

¹⁶ I Jesús xuchap i jo'ob' wa re trigo ru' i keb' kar; are uri xtzun chikaj xaq xutioxij che i Dios puwi. Te'uri xupiro xaq xuya chke utijoxelab', re kkijachb'ej chke i winaq.

¹⁷ Konojel xkitijo, lik k'a xenoj na. Are xkelej xkimol i ch'aqa taq, xaq k'a xnoj kab'lajuj kub'an che i xk'is taj.

I ma Pedro xusaqij chi Jesús are i Cristo

¹⁸ O jun ij i Jesús ktijin chutz'onoxik che i Dios utukel, i utijoxelab' je o ru'. Te'uri xutz'onoj ire chke: —¿In pachin yin kkib'ij i winaq? —Xub'ij.

¹⁹ Ike xkila' uwach che: —O jujun kkib'ij chi yet at ma Wan Ajqajsanel Ya, kkib'ij. Xaq o jujun kkib'ij chi yet at mam Elías; xaq o jub'an kkib'ij moq at jun chik ujer profeta, i xk'un chik saq chawach —xkib'ij che.

²⁰ Are uri ire xutz'onoj chke: —I yix, ¿Wach i kib'ij, in pachin yin? I ma Pedro xula' uwach: —Yet at Cristo chi at petnaq ru' i Dios —xub'ij che.

I Jesús xutzijoj ukamik

²¹ Xwiri i Jesús lik xub'ij chke chi lik mkilap taq che jun.

²² Xaq xub'ij chke: —Yin chi Xinalaxoq chwach Ulew pacha Winaq o uchak kintij ni k'ax. Kinkixutuj ni nimaq taq winaq, junam ku' i kaj-atzil i rajpatan i Dios, xaq i je tijonelab' re i ujer atb'al tzij. Lik kinkikamsaj na, xwiri churox ij kinwalij tan chik.

²³ Te'uri i Jesús xub'ij chke konojel i winaq: —Jun, we kraj kterej chwij, o uchak much'ob' chik rib', xwiri ij ij kterej ni chwij tupu kkam ni rumal ile.

²⁴ Man jun we k'ax kuna uk'aslemal waral, kusach uri uk'aslemal chi saqil. Xwiri, we o jun ksach ni uwach uk'aslemal xa wumal yin, kya' uri uk'aslemal saqil che.

²⁵ ¿Wach taq wa kraj i winaq che we kuch'ak ronojel uwach i jyub' ta'aj, we xa ku'an k'ax che rib' o xaq kusachsaj taq rib' utukel?

²⁶ We o jun xa kk'ix che wumal yin, we kk'ix che intzij, xaq yin kink'ix ni che ire are kink'un tan chik. Yin chi Xinalaxoq chwach Ulew pacha Winaq, lik kink'un chik ru' u'ij uchomal Inqajaw xaq ru' ki'ij kichomal i lo'laj ángel.

²⁷ Qatzij i kinb'ij chiwe, chi je o jujun waral kekam ti tan, k'a kkil ni ujeqanik i ajawinik re i Dios waral —xub'ij i Jesús chke.

Uyojtajik uwach utzunb'al i Jesús

²⁸ Kolo wajxaqib' ij rik'awik ub'ixkil ile, i Jesús xel b'i puwi jun jyub' chutz'onoxik che i Dios. Je rachi'ilam b'i ma Pedro, ma Jacobo, xaq i ma Wan.

²⁹ Tz'aqat ktijin chutz'onoxik che i Dios i upalaj lik xyojtajik; i u'u' xu'an saq lik kwalch'inik.

³⁰ Xaqte'et xewinaqir keb' achiyab', kelapan ru'; je are i mam Moisés xaq i mam Elías.

³¹ Lik sutim kij rumal jun a' chi lik kwalch'inik xaq ketijin chulapik wach i kamik kik'aw wi i Jesús pa tinimit Jerusalén.

³² I ma Pedro ku' i rachi'il lik kkaj waram, xwiri, lik xek'ask'atik xaq xkil i uchomal i Jesús xaq i keb' achiyab' chi je o ru'.

³³ I keb' achiyab' le are xkitikb'a enam, are uri i ma Pedro xub'ij che i Jesús: —Qatijonel, ¡Utz xu'ano chi oj o waral! Kqa'an oxib' mujb'al: Jun awe yet, jun re i mam Moisés, xaq jun chik re i mam Elías —xub'ij. Xwiri i ma Pedro reta'am taj wach i xub'ij.

³⁴ Are ktijin che i lapanik, xqaj li jutzob'aj sutz' pkiwi. Lik xkixij kib' are xesach chupam i sutz' le.

³⁵ Chupam i sutz' le xkita jun ch'awb'al chi keje iri kub'ij: —Iri are Ink'ojol chi lik k'ax kinna'o; xaq lik kul ink'ux che, chita wach i kub'ij —xb'ix chke.

³⁶ Are xk'is utayik i tzij le, xkil ike chi Jesús utukel chik. Wach i xkil chila ike xkilap taj, lik che taq i ij le lik che mijun jun xkilap wi.

I Jesús xrutzirsaj jun ala chi o te'eq itzel tew che

³⁷ Chukab' ij, are xeqaj li tzam jyub', lik je k'i winaq xe'el chuk'ulaxik i Jesús.

³⁸ O jun achi chkixol i winaq xsik'in chub'ixkil che i Jesús: —Tijonel, cha'ana utzil chomal chwe, chawila ni wak'al. Man lik xwi wak'al ile olik.

³⁹ O jun itzel tew che chi xaqte'et ksik'in anoq; kok chi siksatik xaq kwoqow uk'axaj rumal. Ku'an k'ax che xaq lik kraj ti kro'taj.

⁴⁰ Lik xintz'onoj utzil chke i atijoxelab' chi kkesaj itzel tew che, xwiri xetiki ti che.

⁴¹ I Jesús xula' uwach: —¡To' iwach yix chi kikoj ti i Dios xaq lik ix sachnaq chupam i utz taj! ¿Ni'pa nawi chik ij k'a kraj chi kink'iji iwu' chi xaq lik kinch'ij ni ni'pa i ki'ano le? —Xub'ij chke. Te'uri xub'ij che i achi: —Chak'ama li awak'al.

⁴² I ak'al xutikb'a utejeb'ik ru' i Jesús; are uri i itzel tew xutzaqsaj chik pulew xaq xusiksa tan chik; lik xk'achir pu'ab'. Xwiri i Jesús xuyaj i itzel tew, xrutzirsaj i ala xaq xujach b'i che uqajaw.

⁴³ Konojel i winaq lik xkib'isoj i nim laj utzil chomal re i Dios. Tz'aqat konojel xkib'isoj wach i nim laj anik xu'an i Jesús, ire xub'ij chke utijoxelab':

I Jesús xutzijoj ukamul chi kkamsax na

⁴⁴ —Lik chita ub'e wach i kinb'ij chiwe, Yin chi Xinalaxoq chwach Ulew pacha Winaq, kinkijach ni pki'ab' i winaq —xub'ij.

⁴⁵ Xwiri i utijoxelab' lik xkita ti ub'e wach usuk' i tzij le. K'amaja kya' chke kkita ub'e. Xaq xkixij kib' chutz'onoxik che wach ke'el usuk' i tzij le chi xub'ij.

¿Pachin lik mas nim u'ij pu'atb'al tzij i Dios?

⁴⁶ X-on panoq i utijoxelab' i Jesús xe'ok chuchapik kib' chitzij chrij retamaxik pachin lik mas nim u'ij chke.

⁴⁷ I Jesús xunab'ej wach ketijin chuch'ob'ik, rumali xuk'am pan jun ak'al xaq xuya putzal.

⁴⁸ Te'uri xub'ij chke: —Pachin jun kuk'ulaj i ak'ali ru' pinb'i yin, are yin uri kinuk'ulaj. Pachin kinuk'ulaj yin ru' xaq kuk'ulaj uri i Dios chi in taqawnaq loq. Pachin nti u'ij chixol yix are ire atz u'ij uri chkiwach i rachi'il —xub'ij chke.

Pachin ku'an ti ch'oj chqij lik uya'om uri uwach qu'

⁴⁹ Te'uri i ma Wan xub'ij che: —Qatijonel, xqil jun achi ktijin chrelsaxik itzel tew ru' ukuxtaxik ab'i yet. Yoj xqab'ij che chi chumayij, man qachi'il taj —xub'ij.

⁵⁰ Xwiri, i Jesús xub'ij che: —Ile mi'atij, man jun we ku'an ti ch'oj chqij, uya'om uri uwach qu' yoj —xub'ij che.

I Jesús xuyaj i ma Jacobo xaq i ma Wan

⁵¹ Are ya kuriq i ij re u'enb'al i Jesús chikaj, xukowirsaj uk'ux xaq xumaj b'i ub'e pa Jerusalén.

⁵² Xeunab'saj b'i jub'an ajtaqon kkitzukuj pan kiposar. Xe'e che jun komon ukwenta i ulew Samaria.

⁵³ Xwiri i winaq aj Samaria xkik'ulaj ti ku' man xkilo chi ike enam ke pa Jerusalén.

⁵⁴ I utijoxelab', chi ma Jacobo i ma Wan, are xkil ile, xkib'ij che i Jesús: —¿Ajwal, chaya ni chqe chi kqatz'onoj chi kqaj na li a' aj chikaj porb'al ke i winaq le? ¿Kqa'an na pacha xu'an i mam Elías ujer? —Xkib'ij.

⁵⁵ Xwiri i Jesús xupiskilij rib' i xeuyajo.

⁵⁶ Te'uri xe'ax che jun chik komon.

I jub'an chi kkaj te'eq terejik chrij i Jesús

⁵⁷ Are ketijin che i b'e, o jun achi xub'ij che i Jesús: —Nim laj winaq, kwaj enam awu' xaipa kat-e wi —xcha.

⁵⁸ I Jesús xula' uwach che: —I yak o kijul; xaq i tz'ikin o kisok, xwiri Yin chi Xinalaxoq chwach Ulew pacha Winaq, nti pa kinkotz'b'a wi injolom are kinuxlanik —xub'ij che.

⁵⁹ I Jesús xub'ij che jun chik: —Chatterej chwij, Xwiri i achi xub'ij: —Nim laj winaq, nab'e chaya ni chwe chi keinmuqu inqajaw —xcha.

⁶⁰ I Jesús xub'ij che: —Su' wo'or chatterej chwij. Ni'pa i je kamnaq, chaya chke chi kkimuq ni kikamnaq. Xwiri yet japaxsaj utzijol i ajawinik re i Dios —xub'ij che.

⁶¹ Te'uri o jun chik xub'ij che: —Nim laj winaq, yin kwaj kinterej chawij. Xwiri, nab'e chaya ni chwe kein-ijla kan i je o chi wachoch —xub'ij.

⁶² I Jesús xub'ij che: Yet aweta'am chi we o jun o rij ab'ixb'al, i xa ktaqen chrij, suk'ul ti uchak kelik. Xaq keje ile jun, we kok pa ajawinik re i Dios, utz taj we k'a kutaqej wach ukanam kanoq —xub'ij che.