Lucas 24 - Wuj Pa K'ubultzij

Uwalijik i Jesús che i kamik chkixol i kamnaq

¹ Xwiri che i nab'e ij re i seman, lik we' tan i ixoqib' le xe'e chik pa muqtal wi i Jesús; xkik'am b'i i kunb'al muy chi kiyijb'am.

² Are xeuponik, xkilo chi i ab'aj tz'apb'al re uchi' i jul lik elsam chik puk'ijib'al.

³ Are uri, xe'ok b'i chupam, xwiri xkiriq ti uch'akul i Ajwal Jesús.

⁴ Lik xe'ok il rumal, lik kkiriq taj wach kki'ano. Xaqte'et xekil keb' achiyab' je tak'al chila ku', lik kwalch'in ki'u'.

⁵ Mas xe'ok il che, xaq xkilukb'a kipalaj pulew. Xwiri i keb' achiyab' le xkib'ij chke: —¿B'uchak kitzukuj jun k'aslik chkixol i kamnaq?

⁶ Ire chi ti chik o wi; walijnaq chub'ik. Chk'un chik'ux wach xub'ij chiwe are k'a ix o pa Galilea.

⁷ Xub'ij chiwe chi pacha Winaq chi Xolalaxoq chwach Ulew o uchak kjach ni pki'ab' i ajmakib' laj taq winaq, lik ktz'aw na xaq krip ni chwach i krus, xaq kk'un ni saq chwach churox ij.

⁸ Are uri xk'un utzij i Jesús chkik'ux.

⁹ Te'uri xetzalij li chila ipa muqtal wi, xaq xkiya utzijol chke i julajuj apostolab', xaq chke i jub'an chik.

¹⁰ I ixoqib' chi xkiya utzijol chke i apostolab' le je are ati Mariy Magdalena, xaq ati Wan, xaq i ati Mariy chi uchuch i ma Jacobo. Ike le ku' i jub'an chik ixoqib'.

¹¹ I kitzij ixoqib' le, xa ch'uj laj tzij xkita i apostolab'; ike lik xkikoj taj.

¹² Xwiri, i ma Pedro xwalijik, x-e pa'anem chila ipa xmuq wi i Jesús. Are xtzun pan chupam, xrilo chi xwi chik i sawan o kanoq. Te'uri x-e chi rachoch; lik xub'isoj wach i x-anik.

B'e chi k-e pa Emaús

¹³ Che i ij le, je keb' chke utijoxelab' i Jesús ke'e che jun komon, Emaús ub'i; kolo oxib' lew unajtil che i Jerusalén.

¹⁴ Are ketijin che i b'e, ketijin chuch'ach'axik ni'pa i xk'ulmax pa Jerusalén.

¹⁵ Are kkilap ile, k'a ketijin ne chitzij, are uri i Jesús lik xtejeb' pan ku', xaq xe'e junam.

¹⁶ Ike tupu lik kkitaqej xwiri xketamaj ti uwach; xa pacha taq ch'uqtal kib'a'wach.

¹⁷ I Jesús xutz'onoj chke: —¿Wach kixtijin chulapik are kixtijin che i b'e? Are uri ike lik juntir xetak'i'ik, lik xeb'isonik.

¹⁸ Jun chke, ma Cleofas ub'i; ire xula' uwach che xaq xub'ij: —Konojel i winaq is keta'am wach i x-ani pa Jerusalén che taq i iji. Konojel i ajsolinel chila keta'am chik, ¿Xwi b'ari yet aweta'am taj? —Xcha.

¹⁹ —Are uri i Jesús xutz'onoj chke: ¿Wach taq xk'ulmaxik? —Chi xki'an ut che i Jesús aj Nazaret. Ire are jun nim laj profeta. Ni'pa i xu'ano, ni'pa i xub'ij, lik nim xril i Dios, xaq lik nim xkil konojel i winaq.

²⁰ Are x-ani man i kaj-atzil i rajpatan i Dios junam ku' i qawi qajolom xkijach ni pu'ab' i atb'al tzij. Xki'at tzij puwi chi kkamsaxik; xaq xtz'aw ni chwach i krus xaq xkamsaxik.

²¹ Kqab'ij te'eq yoj, moq are ire koj-elsaw te'eq chisaq chi yoj oj aj Israel winaq, xwiri xkikamsaj; are urox ij iri u'ankil ile.

²² Tupu o jujun ixoqib' je qachi'ilam, xojkikoj il, man are lik k'a we' na xeupon ipa muqtal wi,

²³ xaq xkiriq ti kamnaq. Xek'un qu' xaq xkib'ij chqe chi xkil keb' ángel chila; xb'ix chke chi ire k'aslik.

²⁴ O jujun chke i qachi'il xe'e ipa muqtal wi; lik xkiriqa i jul lik pacha i xkib'ij ixoqib', xwiri xkil ti uwach i Jesús. Keje xkib'ij i keb' achiyab' ile che i Jesús.

²⁵ Are uri i Jesús xub'ij chke: —¡Yix lik kixch'ob'on taj! ¿Junpa nawi kikoj piwanima ni'pa i xkib'ij i profeta?

²⁶ ¿Iweta'am ti b'ari, chi i Cristo o uchak kutij ni uyej nab'e, te'uri koksax ni u'ij? —Xub'ij chke.

²⁷ Te'uri xujeq usaqixik chke ronojel ni'pa i tz'ib'tal ujer chupam uwuj i Dios chrij ire; xujeq li ulapik chrij wach utz'ib'am kan i mam Moisés, te'uri, chrij ronojel wach kitz'ib'am kan konojel i profeta.

²⁸ Xeupon che i komon ipa ke'e wi. I Jesús xu'an che rib' chi pacha taq k-e pan jub'i' chik.

²⁹ Xwiri ike xkiya ti che k-ek. —Chatkanaj qu' yoj, ya xqaj i ij, ya kok equm —xecha. Are uri, i Jesús xok b'i ku' man kkanaj kan chila che i a'ab' le.

³⁰ Are je kul chi mexa, i Jesús xuchap i wa re trigo, xaq xutioxij che i Dios. Te'uri xupiro xaq xujach chke.

³¹ Are xu'an ire ile, pacha taq xjaqtaj kib'a'wach xaq xketamaj uwach; are uri ire xsach an chkiwach.

³² Te'uri xkib'ij chkiwach: —¿Wach xana yet pak'ux are xlapan ire qu' pa b'e? ¿Xana jun nim laj il? ¡Yin xinna'o! Are ktijin chusaqixik i ujer tzij chi tz'ib'tal kan chupam uwuj i Dios chqe —xecha chkiwach.

³³ Juntir xewalijik xaq xetzalij chik pa Jerusalén. Chila xekiriq wi i julajuj apostolab' kimolom kib' ku' jub'an chik kachi'il.

³⁴ Ike xkib'ij chke i keb': —¡Qatzij, i Ajwal xwalijik; xuk'ut rib' che i ma Simón! —Xecha.

³⁵ Te'uri i keb' xkilap chke wach xkik'ulmaj pa b'e, xaq wach i retamaxik uwach i Jesús xki'ano are xupir i wa re trigo.

Uk'utik rib' i Jesús chke utijoxelab'

³⁶ Lik k'a ketijin chuch'ach'axik ile, xaqte'et i Jesús xwinaqir an chkixol, xaq xuya rutzil kiwach, xub'ij. —¡Chuxlan ik'ux!

³⁷ Ike lik xe'ok il, lik xkixij kib'. Kkib'ij ike chi xa jun anima xkilo.

³⁸ Xwiri i Jesús xutz'onoj chke: —¿B'uchak kixij iwib'? ¿B'uchak chi lik kikoj taj chi xinwalij chik? —Xub'ij chke.

³⁹ —Chiwila in-ab', i waqan, ¡Chi lik are yin! Chinichapa i chiwila pe', man jun anima nti ub'aqil, nti uti'lal pacha kiwil chwe yini —xcha.

⁴⁰ Are xub'ij ire ile, xuk'ut u'ab' i raqan chke.

⁴¹ Xwiri i ike lik k'amaja kkikojo we are i Jesús o chkiwach. Rumal i nim laj kikikotemal xaq rumal i nim laj b'isb'al, rumali i Jesús xutz'onoj chke: —¿O tijawik re chi? —Xcha.

⁴² Te'uri xkiya ch'aqap b'olom kar che, ru' ch'aqap aqaj o kab' che.

⁴³ Ire xuchapo xaq xutij b'i chkiwach.

⁴⁴ Te'uri xub'ij chke: —Ni'pa ink'ulmam, ronojel ile are i xinb'ij chiwe are k'a in o te'eq iwu'. Chi lik rajwaxik chi kk'ulmax ni ronojel ni'pa i tz'ib'tal chwij yin chupam uwuj i mam Moisés, xaq ronojel ni'pa i tz'ib'tal kan chupam iwuj ke i profeta, xaq wach i tz'ib'tal kan chupam i wuj Salmos —xub'ij chke.

⁴⁵ Te'uri xuya kinojb'al, man kkita ub'e ni'pa i tz'ib'tal kan ujer chupam uwuj i Dios.

⁴⁶ Xub'ij chke: —Are i tz'ib'tal kanoq are iri: I Cristo o uchak kkamsaxik, te'uri churox ij, kk'un chik saq chwach.

⁴⁷ Xaq kpaxsax ni utzijol inb'i pa taq tinimit, man keje ile konojel ketzalij chik ru' i Dios xaq kkuy ni kimak. Kijeq li pa tinimit Jerusalén

⁴⁸ Yix iwilom wach in-anom, ix ajb'il re uri chke i winaq.

⁴⁹ Chita pe', yin kintaq li Jun piwi chi usujum Inqajaw chiwe. Xwiri yix chix-ol waral Jerusalén k'a kqaj na li ucho'ab' i Dios piwi, chi upetik chikaj. Keje xub'ij i Jesús ile chke i utijoxelab'.

Relik b'i Jesús chikaj

⁵⁰ Te'uri xe'el b'ik, xeuk'am b'i k'a che i komon Betania; are je o chila xuyak u'ab' chikaj xaq xuya utzil chomal pkiwi.

⁵¹ Tz'aqat are ktijin chuya'ik utzil chomal pkiwi, xel chkixol xaq xk'am b'i chikaj.

⁵² Are uri ike xkikoj u'ij, te'uri xetzalij pa Jerusalén, lik kekikotik.

⁵³ Ij ij je o prachoch i Dios, ketijin chukojik u'ij i Dios. Amén.