Lucas 20 - Wuj Pa K'ubultzij

I atb'al tzij chi o pu'ab' i Jesús

¹ X-on panoq, i Jesús o prachoch i Dios, ktijin chuk'utik chke i winaq, xaq ktijin chub'ixkil chke wach i kelb'al chupam i kimak. Are uri xeupon i kaj-atzil i rajpatan i Dios, junam ku' i je tijonel re i ujer atb'al tzij xaq i nimaq taq winaq.

² Xkib'ij che: —¿B'i chi atb'al tzijal o pa'ab' chi keje ka'an ile? ¿Pachin xyaw ile pa'ab' chi kattijin chu'ankil? —Xecha che.

³ Are uri i Jesús xula' uwach chke: —Yin xaq kintz'onoj jun tz'onb'al chiwe. Chib'ij chwe:

⁴ ¿Pachin xyaw pu'ab' i ma Wan kuqajsaj ya pkiwi i winaq? ¿Are i Dios xyaw che, o xa winaq xyaw che? —Xub'ij i Jesús chke.

⁵ Ike xe'ok chub'ixkil chkiwach: “¿Wach nawi kqab'ij che? We kqab'ij chi are i Dios xyaw ile pu'ab' i ma Wan, ire kub'ij ni chqe: ¿B'uchak uri xikoj taj wach i xub'ij?

⁶ We xaq kqab'ij chi xa ru' winaq petnaq wi wach i xub'ij i ma Wan, i winaq kojkikamsaj uri che ab'aj, man konojel kkib'ij chi ma Wan are jun profeta chi lik ru' i Dios petnaq wi wach i ub'im.” Keje ile xkib'ij chkiwach.

⁷ Rumali xkib'ij che i Jesús: —Qeta'am taj pachin xyaw che —xecha.

⁸ —Xaq yin kinb'ij ti uri chiwe wach i atb'al tzij o pin-ab' chi kin-an taq iri —xub'ij i Jesús chke.

I tijojb'al tzij chkij i utz ti laj taq ajchak

⁹ Te'uri i Jesús xok chub'ixkil jun tijojb'al tzij chke i winaq. Xub'ij chke: —O jun achi o uk'iyal uva utikom. Ire rajwaxik k-e che jun tinimit, rumali xuya kan pki'ab' i ajpamey. Ire x-ek, xaq naj xsachik.

¹⁰ Are xuriq i ij re i molonik, xutaq b'i jun umokom chutz'onoxik i re ire, chke i rajpamey. Are xupon umokom, xkich'ayo, lik xki'an k'ax che, xaq xkitaq b'ik nti xkiya b'i che.

¹¹ Te'uri i rajaw i tikon xutaq chal jun chik mokom; xaq keje xki'an chik che, xkib'ij k'ax che, xkich'ayo, xaq xkitaq chub'ik, nti xkiya b'i che.

¹² I rajaw i tikon xutaq chal jun chik; i ajpamey xaq xki'an chik k'ax che, xaq xkesaj chaloq.

¹³ Are uri i rajaw ulew xub'ij: “¿Wach i kin-ano? Kintaq nu b'i ink'ojol chi lik k'ax kinna'o; are kkil uwach, moqxa kekojon ni che”; xub'ij.

¹⁴ I ajpamey are xkilo, xkib'ij chkiwach: “Ire le are i rajaw i ulew k-on panoq. Chqakamsaj man kkanaj kan i ulew pqa'ab' yoj”; xkib'ij.

¹⁵ Are uri xkesaj li pa tikon xaq xkikamsaj. Te'uri xutz'onoj chke: —I rajaw i chak, ¿Wach nawi ku'an chke i utz ti laj taq ajchakib' le?

¹⁶ Ire kk'un na, xaq keukamsaj i ajchakib'; te'uri kuya ni ulew pki'ab' jub'an chik ajchakib'. I winaq, are xkita ile, xkib'ij: —¡Ay, chu'atij i Dios ile! —Xecha.

¹⁷ Te'uri i Jesús xeutaqej xaq xuk'unsaj utzij i Dios chke wach ku'an na. —Qatzij, keje ile k-antaj na. We k-antaj taj, ¿Wach usuk' uri i tziji chi tz'ib'tal kan chupam uwuj i Dios? Man kub'ij: I ab'aj chi xkaj ti xkikoj i je aj-anol ja, are i ab'aj le chi xe'eloq lik nim ni uchak che i ukub'ib'al ja. Keje ile tz'ib'tal kanoq.

¹⁸ I ab'aj le, we o jun ktzaq puwi, ku'an ni ch'aqa taq che. Xaq i ab'aj le, we ktzaq chrij jun, lik ku'an k'ajk'aj che —xcha i Jesús chke.

¹⁹ I kaj-atzil i rajpatan i Dios, xaq i tijonel re i ujer atb'al tzij xkita ub'e chi xa are ike keulap na. Rumali lik kkaj uchapik, xwiri xkixij kib' chke i winaq.

I tz'onb'enik chrij i alkawal

²⁰ Te'uri xekitaq b'i jub'an achiyab' ru' i Jesús kkik'amb'ej upam. Xekitaq b'i ru' pacha je utz laj taq winaq kkitz'onb'ej jub'an tzij che, xa tzaqsab'al re kki'ano. Kkaj ike kchap ni kumal i raqan u'ab' i atb'al tzij, xaq kjach ni pu'ab' i Aj-ok'al utzam i jalajuj taq i tinimit.

²¹ Are xeupon ru' i Jesús, xkib'ij che: —Tijonel, qeta'am chi yet wach i kab'ij xaq wach kak'utu lik pusuk' ka'ano. Man yet lik is junam ka'an chkitayik konojel, jun we o u'ij o we nti u'ij, lik kab'ij i saq laj tzij chke wach kraj i Dios.

²² Chab'ij uri chqe: ¿Utz nawi kqatoj alkawal che i ma César aj Roma, o utz taj? —Xecha.

²³ I Jesús reta'am chi xa tzaqsab'al re kkaj; xa k'amb'al upam kki'ano. Xub'ij chke: —¿B'uchak kitzukuj tzaqsab'al we?

²⁴ Chik'utu jun saqpwaq chwe. ¿Pachin uk'exwach iri o chwach? ¿Pachin ub'i iri tz'ib'tal chwach? —Xcha Are uri ike xkib'ij: —Re ma César, xecha che.

²⁵ —B'ay —xub'ij i Jesús chke. —Chiya uri che i ma César ni'pa re i ma César le; xaq chiya che i Dios ni'pa re i Dios —xub'ij chke.

²⁶ Ike xkiriq taj wach tzaqsab'al re kki'an chkiwach i winaq. Xwiri are xkita utzij, lik xkib'isoj xaq lik xkiriq ti chik wach i kkib'ij.

Tz'onb'enik chrij i walijik chkixol i kamnaq

²⁷ Te'uri o jujun chke aj Saduceo xe'e ru' i Jesús. I aj Saduceo kkib'ij chi i je kamnaq kewalij ti chik. Rumali are xeuponik, xkib'ij che i Jesús:

²⁸ —Tijonel, i mam Moisés utz'ib'am kanoq chi we jun achi k'ulinaq kkamik, we nti rak'al ru' kan i rixoqil, o uchak uri kk'uli i ratz ucha' i achi le ru' i ixoq malkan le. Keje ile kalax ni uri rak'al ire ru' i ixoq puk'exel i kamnaq. Keje ile ub'im kanoq.

²⁹ B'ay, u'onom loq, je o wuqub' achiyab' katz kicha' kib'. I nab'e chke xk'uli'ik, x-on panoq, xkamik, nti rak'al kanoq.

³⁰ Te'uri i ukab' cha'xel xk'uli ru' ixoq malkan. X-on panoq, xkam chik ire, nti rak'al.

³¹ Te'uri i urox xk'uli chik ru' i ixoq, xaq keje xki'an ile konojel. I je wuqub' le is xekam chwach i ixoq, nti kak'al kanoq ru'.

³² Xaq pa k'isb'al re, xkam i ixoq.

³³ B'ay, are kuriq i ij kewalij i kamnaq, ¿Pachin chke i wuqub' le ke'eloq lik rachijil? Man konojel i je wuqub' xek'uli ru'.

³⁴ I Jesús, keje iri xula' uwach chke: —Waral chwach i jyub' ta'aj, qatzij kek'uli i achiyab' i ixoqib';

³⁵ xwiri k-on panoq kki'an ti chik. Ni'pa i kmajaw chke chi kewalij chkixol i kamnaq xaq ke'ok chila chikaj, ike kek'uli ti chik.

³⁶ Man kekam ti chik, ike ke'eloq je pacha i ángel, chi je rak'al chik i Dios, man je walijnaq chik.

³⁷ I tzij chi utz'ib'am kan i mam Moisés kuk'ut chiwe chi kewalij ni kamnaq. Xutz'ib'aj ire wach utzij i Dios che are xu'ijla chupam i a' chi kjuluw che i ral che' lokej. Xub'ij i Dios chi ire are ki-Dios i mam Abraham, i mam Isaac, xaq i mam Jacob.

³⁸ I Dios are ti ki-Dios i je kamnaq, are i ki-Dios i je k'aslik. Chwach ire, lik is je k'as konojel —xub'ij i Jesús chke.

³⁹ Are uri o jujun chke i tijonel re i ujer atb'al tzij xkib'ij: —Tijonel, utz i xab'ij —xecha.

⁴⁰ Keje ile xkib'ij, man i aj Saduceo winaq nti chik mas ukowil kik'ux chutz'onoxik che.

¿Je pachin i ratit umam i Cristo?

⁴¹ I Jesús xutz'onoj chke: —¿B'uchak kkib'ij i winaq chi i Cristo we xk'unik, are ni umuq uxikin i mam David?

⁴² ¿B'uchak kkib'ij ile? Man lik are i mam David ub'im kan i tziji chupam i wuj ub'i Salmos: I Ajwal Dios xub'ij che i Wajwal Cristo: Chatkul ni pinwiqab'im

⁴³ k'a kuriq ni ij keinya ni pawaqan ni'pa i je ajch'oj chawij; xcha.

⁴⁴ ¿Wach u'ankil uri chi Cristo xa umuq uxikin i mam David? ¿Wach u'ankil ile? Man lik are i mam David xub'ij “Ajwal” che i Cristo.

I Jesús kukoj kimak i tijonelab' re ujer atb'al tzij

⁴⁵ Konojel i winaq ketijin chutayik, are uri i Jesús xub'ij chke utijoxelab'. Xub'ij:

⁴⁶ —Chichajij iwib' chke i tijonelab' re i ujer atb'al tzij, chi xa qus kkil i malkatik pa taq b'e ru' i ki'u' naj raqan; chi xaq qus kkita are kya' rutzil kiwach kumal i winaq pa taq k'eb'al oksab'al re ki'ij. Are ke'ok pa ja re molb'al ib' ke i judío, xa kkitzukuj kikub'ib'al o u'ij; xaq keje kki'ano are ke'e pa wa'im re taq nima'ij.

⁴⁷ Ike kkimaj i kachoch ixoqib' malkanib'; te'uri kki'an nimaq taq tz'onb'al che i Dios. Ike ut lik kya' ni tojpen chke chi lik mas nim ni chkiwach i jub'an —xcha i Jesús chke.