Lucas 19 - Wuj Pa K'ubultzij

I Jesús xaq i ma Zaqueo

¹ I Jesús xok pa tinimit Jericó, are ktijin rik'awik chupam i tinimit le.

² Are uri che i tinimit le o jun achi ma Zaqueo ub'i, i upatan ire are kaj-atzil i je ajtz'onol alkawal pa Roma; xaq ire lik b'eyom.

³ Kraj ire kretamaj uwach i Jesús, xwiri lik naj ti rij, rumali ktiki ti chrilik man lik je k'i i winaq.

⁴ Rumali pa'anem xnab'ej b'ik, i xel b'i puwi jun che' chi ub'i sicómoro o xukut b'e pa kik'aw wi i Jesús.

⁵ Are ktijin rik'awik i Jesús chila, xtzun an chikaj xaq xub'ij che i achi le: —Ma Zaqueo, chatqaj la loq; man wo'or lik o uchak kinkanaj ni kan chi awachoch —xcha.

⁶ Are uri i ma Zaqueo juntir xqaj loq, lik kkikotik xuk'am b'i i Jesús chi rachoch.

⁷ I winaq, are xkil ile, xe'ok chuch'ach'axik i Jesús, man x-e chi rachoch jun utz ti laj winaq.

⁸ Chila pa ja, i ma Zaqueo xtak'i anoq i xub'ij che i Ajwal: —Nim laj winaq, ni'pa o wu', kinya ni nik'aj chke i nib'a'ib'. We o taq inmajom che i jun, kintzalijsaj chik kajmul uri che —xcha.

⁹ I Jesús xub'ij che: —Wo'or, yet junam ku' awalk'uwal iriqom chik tob'al iwe chwach i Dios —xcha. Te'uri xub'ij i tziji: —Ire xaq umuq uxikin kan i mam Abraham pacha yix.

¹⁰ Yin chi Xinalaxoq chwach Ulew pacha Winaq, in k'unnaq chkitzukuxik i je sachnaq elsab'al ni ke chupam i kimak —xcha chke.

I tijojb'al tzij chrij pwaq

¹¹ I Jesús tz'aqat ketijin i winaq chutayik utzij, xub'ij jun tijojb'al tzij chke. Keje xu'an ile chke man ya kok pa tinimit Jerusalén. Xwiri i winaq kkich'ob'o, chi we xok ire chila, ya kujeq i nim laj ajawinik re i Dios pkiwi.

¹² Rumali, ire xub'ij i tziji chke: —O jun achi, nim u'ij upatan, chi x-e che jun tinimit k'a naj, chuk'amik upatan re ajawinel puwi utinimit; are o chik pu'ab', ktzalij loq.

¹³ Are k'amaja k-ek, xeusik'ij lajuj rajchakib' ru', xaq xuya kan jujun saqpwaq chke chi nimaq uwach. Xub'ij chke: “Chixch'akan ru' i pwaqi tz'aqat kink'un li yin.” Xcha chke.

¹⁴ I rach aj tinimit tzel kkilo, xaq xekitaq b'i jub'an ajtaqon chub'ixkil: “Kqaj ti yoj i achi le, we are Ire kkanaj kan re ajawinel pqawi”.

¹⁵ Xwiri Ire xya' pu'ab' chi are ajawinel pkiwi, te'uri xtzalij chaloq putinimit. Are xuponik, xeusik'ij i rajchakib' ru' chi uya'om kan i pwaq chke. Are uri xujeq utz'onoxik chke chkijujunal ni'pa i kich'akom chik chrij i pwaq chi xya' kan chke.

¹⁶ I nab'e xupon ru' i xub'ij che: —Nim laj winaq, i apwaqi, inch'akom chik lajuj tant puwi —xcha.

¹⁷ I ajawinel xub'ij che: “Lik utz ni a'anom; at utz laj ajchak. A'anom ni utz ru' i jub'i' chi inya'om chawe, rumali katinya pkiwi lajuj tinimit”, xcha che.

¹⁸ Te'uri i ukab' rajchak xtejeb' ru', xaq xub'ij che: “Nim laj winaq, riy apwaqi inch'akom chik jo'ob' tant puwi.” Xcha.

¹⁹ I ajawinel xub'ij chik che ire: “Xaq yet, katinya ni pkiwi jo'ob' tinimit”, xcha.

²⁰ Xwiri jun chke i lajuj le xtejeb' pan ru' xaq xub'ij che: Nim laj winaq, riy apwaqi; ink'olom kan chupam jun sut.

²¹ Xink'olo man kinxij wib' chawe; weta'am chi at k'an laj achi. At pacha jun chi kuchapo wach i uk'olom taj, o xaq kumol uwach i tikon chi xutik taj; xcha che.

²² Are uri i ajawinel xuyajo. “At utz ti laj ajchak; xcha che. ¡Lik yet atukel ru' i atzij xatzukuj ni amak! We aweta'am chi lik in k'an laj winaq, chi kinchapo wach ink'olom taj, o xaq kinmol uwach i tikon chi intikom taj,

²³ we keje kin-an ile ¿B'uchak uri xaya ti inpwaq ku' i kkitoj i alaj che?” Wetene keje ile xa'ano, are xink'unik o teneri inpwaq xaq i alaj. Xcha che.

²⁴ Te'uri xub'ij chke i je o chila ru': “Chimaja i pwaq che; chiya ni che i jun chi xuch'ak lajuj tant” xcha.

²⁵ Xwiri ike xkib'ij che, “Nim laj winaq ¡Ya o chik lajuj ru'!” Xecha.

²⁶ I ajawinel xula' uwach chke: Kinb'ij chiwe, jun we o ni chik o ru', kya' ni mas uri che; i jun chi nti qas o ru' kelsax ni jub'i' chi o ru', xcha chke.

²⁷ Te'uri xub'ij chke: “Ni'pa i winaq chi tzel kinkilo, chi kkaj ti in o pkiwi, cheik'ama loq, xaq cheikamsaj chinwach”. Xcha i ajawinel.

I Jesús kok pa tinimit Jerusalén

²⁸ Are xb'itaj ile rumal i Jesús, xumaj chub'i ub'e pa Jerusalén, nab'e chkiwach i utijoxelab'.

²⁹ Are xeupon chunaqaj i keb' komon, Betfagé xaq i Betania, pa o wi i ral jyub' Olivos. Are uri xeunab'saj b'i keb' utijoxelab'.

³⁰ Xub'ij chke: —Jix che i komon chi o pan chqawach le. Are kixuponik, kiriq ni uri jun b'uru yuqulik, chi k'amaja k-an eqan chrij. Chikira xaq chik'ama loq.

³¹ We o i ktz'onow chiwe wach uchak kixtijin chukirik, chib'ija uri che chi kuriq uchak che i Ajwal.

³² Ike xe'ek, are uri xkiriq i ral b'uru yuqulik pacha ub'im b'i Jesús chke.

³³ Are ketijin chukirik xeupon i rajaw xkitz'onoj chke: —¿B'uchak kitor b'i ral b'uru? —Xecha.

³⁴ I tijoxelab' xkila' uwach: —Man kuriq uchak che i Ajwal —xecha.

³⁵ I tijoxelab' le, xkik'am li ral b'uru ru' i Jesús; are uri xkilik' ki'u' chrij, te'uri xkito i Jesús are x-an b'i chrij i ral b'uru.

³⁶ Are ktijin u'enam i Jesús pa Jerusalén, i winaq xkilik' ki'u' pub'e.

³⁷ Are ya keupon chunaqaj i Jerusalén, ipa o wi i qajb'al loq re i jyub' Olivos, konojel ni'pa i je teren chrij xe'ok chi sik' rumal i kikotemal. Lik xkikoj u'ij i Dios rumal uk'iyal nimaq taq il chi u'anom i Jesús chkiwach.

³⁸ Kkib'ij: —¡Lik nim u'ij i Ajawinel chi utaqom li Ajwal Dios! ¡K'amori che i Dios chikaj! ¡Lik choksax ni u'ij i Dios! Keje ile xesik'in chub'ixkil.

³⁹ Xaq je o jub'an aj fariseo chkixol i winaq; are xkilo wach kki'an i uk'iyal winaq, xkib'ij che i Jesús: —Tijonel, chea'atij atijoxelab' —xecha.

⁴⁰ I Jesús xula' uwach chke: —Chita pe', we kein-atij, i ab'aji kesik'in ni uri pkik'exel ike —xcha.

⁴¹ I Jesús ku' i je teren chrij are xeupon chunaqaj i tinimit Jerusalén. Ire are xril i tinimit le, lik k'ax xuna uk'ux, xaq xo'ik.

⁴² Xub'ij: “¡To' iwach yix ix aj Jerusalén! Wetene wo'or kiwetamaj usuk' wach uriqik i saqil laj uxlanb'al k'uxij, utz te'eq iwe; xwiri kiwil taj, man xa pacha ch'uqtal uwach chiwe.

⁴³ Ya kuriq i ij chi kitij ni uyej. I ajch'oj chiwij kkikoj ni tapial chrij itinimit man keje ile nti chik ipa kixel wi. Te'uri kkisutij ni iwij re kki'anb'ej ch'oj chiwij.

⁴⁴ Kkisach ni uri uwach itinimit, xaq kekikamsaj ni ni'pa i je jeqel chupam. Are kutzinik, mitene jun ab'aj kkanaj puwi i rachi'il. Keje ni ile ke'eloq, man xita ti usuk' are xupon i Dios iwu' tob'al iwe.”

I Jesús xeresaj b'i ajk'ay prachoch i Dios

⁴⁵ I Jesús xok prachoch i Dios; are uri xujeq li kelsaxik i ajk'ayinel xaq i ajlo'onel chi je o chila.

⁴⁶ Xub'ij chke: —I Dios, chupam uwuj ub'im kan i tziji: “Wachoch, lik are jun ja re kitz'onb'al i winaq chwe”, xwiri yix i'anom kijul ili'omab' che —xcha i Jesús chke.

⁴⁷ Ij ij i Jesús ktijin chuk'utik chke i winaq prachoch i Dios. I kaj-atzil i rajpatan i Dios junam ku' i tijonelab' re i ujer atb'al tzij xaq kiwi kijolom i aj Judío, kkitzukuj wach ukamsaxik i Jesús kki'ano.

⁴⁸ Xwiri kkiriq taj wach u'anik kki'ano, man konojel i winaq lik kiya'om kik'ux chutayik utzij.