Lucas 18 - Wuj Pa K'ubultzij

I tijojb'al tzij chrij jun ixoq malkan xaq i aj-atol tzij

¹ I Jesús xub'ij chik jun tijojb'al tzij chke, k'utb'al re chke chi o uchak kkimayij ti lapanik ru' i Dios, xaq mb'a'krij kik'ux.

² Xub'ij chke: “Che jun tinimit o jun atol tzij kuxij ti rib' che i Dios, xaq kukoj ti ki'ij i winaq.

³ Xaq che i tinimit le o jun ixoq malkan. Ire kupon ru' i atol tzij, kutz'onoj atb'al tzij puwi jun ajch'oj chrij.

⁴ Lik o tan chi ij i atol tzij kraj ti ku'an i atb'al tzij che, xwiri xuriq i ij chi xub'ij puk'ux: Qatzij yin kinxij ti wib' che i Dios xaq kinkoj ti ki'ij i winaq,

⁵ xwiri i ixoq malkan le kumayij ti k'unik wu', rumali kin-an ni atb'al tzij che, keje ile kk'un ti chik xaq krix ti chik ink'ux che, xcha.”

⁶ Xaq xub'ij chke: “Chita ut wach xub'ij i utz ti laj atol tzij.

⁷ B'ay, ¿Xatab'a i Dios keuto ti je re ire chipa'ij, chicha'ab' chi are kkitz'onoj i kitob'al che? ¿Xatab'a kb'aytaj ni uri chu'ankil wach kkitz'onoj che?

⁸ Kinb'ij chiwe: I Dios lik kb'aytaj ti chkito'ik; Ire lik ku'an la i atb'al tzij chke. Xwiri are kk'un i pacha Winaq chi Xolalaxoq chwach Ulew ¿K'a o nawi uri jujun chwach ulew chi k'a kul kik'ux che i Dios?” Keje ile xcha i Jesús chke.

I tijojb'al tzij chrij i aj fariseo xaq chrij i ajtz'onol alkawal

⁹ Je o jujun winaq kkib'ij chi lik je utz, xwiri xa kkiqajsaj ki'ij i jub'an chik. Kumal i winaq le, i Jesús xub'ij i tijojb'al tziji:

¹⁰ —Je o keb' achiyab' xe'e chutz'onoxik prachoch i Dios. Jun aj fariseo i jun chik ajtz'onol alkawal.

¹¹ I aj fariseo tak'alik keje iri ktijin chub'ixkil: Dios, kintioxij chawe, man yin in keje taj pacha i jub'an winaq. Ike xa je ili'omab', je utz ti laj taq winaq, xaq i jub'an chi to' kkimin kib' ru' i jun chi je k'ulinaq ti ru'. Lik kintioxij chawe in keje taj pacha i ajtz'onol alkawali.

¹² Kamul kinmayij wa'im pa seman. Ni'pa i kinch'ako, kinya jun tant re i lajuj chawe.

¹³ I ajtz'onol alkawal keje ti xu'an ire ile. Ire, naj xkanaj wi i xtzun ti chikaj. Xwiri are i xu'ano, xuch'ay uwach uk'ux xaq xub'ij: “¡Dios, chawila tob'al inwach, xa in ajmak laj winaq!”

¹⁴ Yin kinb'ij chiwe, i ajtz'onol alkawal xtzalij chi rachoch lik kuytajnaq chik umak chwach i Dios; kumaj taj pacha i aj fariseo. Keje ile xe'eloq, man pachin ku'on nim che rib', ire ut xa kqajsax ni u'ij; xaq pachin ku'on ch'utin che rib', are knimarsax ni uri u'ij. Keje i tijojb'al tzij ile xub'ij i Jesús chke.

I Jesús kuya utzil chomal pkiwi ak'alab'

¹⁵ O i winaq xekik'am li ral taq kak'al ru' i Jesús man kuya ni u'ab' pkiwi. I utijoxelab' are xkilo, xe'ok chi ki'atixik i je k'amawnaq b'i i ak'alab'.

¹⁶ Xwiri, i Jesús xeusik'ij i ak'alab' ru' i xub'ij: —Chiya chke i ak'alab' kek'un wu', mei'atij man ni'pa i je pacha ak'alab' pkik'ux, o ke ike che i ajawinik re i Dios.

¹⁷ Saq laj tzij kinb'ij chiwe, jun we kukoj ti utzij i Dios, we ku'an ti che uk'ux pacha uk'ux jun ak'al, kok ti uri che i ajawinik re i Dios —xcha chke.

Jun achi b'eyom klapan ru' i Jesús

¹⁸ Jun aj-atzil ke i Judío, xupon ru' i Jesús i xutz'onoj che: —Nim laj winaq, at utz laj Tijonel, ¿Wach i kin-an na re kinriqb'ej ink'aslemal chi nti uk'isik? —Xcha.

¹⁹ I Jesús xula' uwach che: —¿B'uchak kab'ij chwe chi in utz? Nti jun utz chi, xwi Dios —xcha.

²⁰ Yet aweta'am i lajuj tzij pixab': “Mamin awib' ru' jun chi at k'ulinaq ti ru'; matkamsanik; ma'an ela'; matt'oron chrij jun winaq, chakojo ki'ij aqajaw achuch.” —Xcha i Jesús che.

²¹ —Ronojel ile is in-anom loq k'a are in ch'utin —xcha i achi che.

²² I Jesús are xuta ile, xub'ij: —K'a o ni rajwaxik chawe. Chak'ayij ronojel ub'itaq awe xaq chaya i pwaq chke i nib'a'ib'; keje ile kariq uri ab'eyomal chikaj. Te'uri chatpetoq xaq chatterej chwij —xcha che.

²³ I achi are xuta ile, xok chi b'is man lik b'eyom.

²⁴ I Jesús are xrilo chi kb'isonik, xub'ij: —I b'eyomab', lik k'ax kokik pa ajawinik re i Dios.

²⁵ K'ax teneri rik'awik jun kamey che i tel re jun akuxa, chwach rokik jun b'eyom che i ajawinik re i Dios —xcha i Jesús chke.

²⁶ Are uri, ni'pa i xkita ile xkitz'onoj: —¿Pachin jun uri ktiki chuto'ik rib' chwach i kamik? —Xecha.

²⁷ I Jesús xula' uwach chke: —I Dios ktiki che wach i ketiki ti winaq chu'ankil —xcha.

²⁸ Te'uri i ma Pedro xub'ij che: —Ajwal, yoj qakanam kanoq ni'pa i o qu', xaq oj terejnaq chawij —xcha.

²⁹ I Jesús xub'ij chke: —Qatzij i kinb'ij chiwe, pachin jun ro'tam kan ub'itaq re man k'ax kuna i ajawinik re i Dios, nim ni kuch'ak na. We ukanam kan i rachoch, o we uchuch uqajaw, o we i ratz ucha', o we i rixoqil, xaq we i rak'al, rumal ni i ajawinik re i Dios,

³⁰ nim ni uri kuch'ak puwi ile waral chwach i jyub' ta'aj; xaq k-on panoq o ni uk'aslemal chi kk'is ti chik —xcha i Jesús chke.

I Jesús xuroxmulij ub'ixkil ukamik

³¹ I Jesús xeusik'ij i kab'lajuj utijoxelab' ru' are kitukel, xub'ij chke: “Chita pe', ya xqamaj b'i qab'e pa Jerusalén. Chila k-an ni che i pacha Winaq chi Xolalaxoq chwach Ulew, ronojel ni'pa i kitz'ib'am kan i profeta chrij.

³² Ire kjach ni pki'ab' i ne te aj Israel winaq. Ike kkiyo'ya na, kkib'ij ni k'ax che, xaq kkichub'aj ni upalaj.

³³ Kkijik ni ulo'xik, te'uri kkikamsaj na, xwiri churox ij kwalij chkixol i kamnaq.” Xcha i Jesús chke.

³⁴ I utijoxelab' xkita ti ub'e wach i xub'ij le. Xketamaj taj wach usuk' i xulapo; xkita ti ub'e wach i ke'eloq.

I Jesús xutzunsaj jun mawach aj Jericó

³⁵ I Jesús ktijin che i b'e naqaj chik o wi che i tinimit Jericó. O jun mawach kul pa b'e, ktijin chutz'onoxik pwaq chke i winaq.

³⁶ Are xuta chi je k'i i winaq ktijin kik'awik, ¿Wach kopis ile? Xcha.

³⁷ Xkib'ij che chi are i Jesús aj Nazaret ktijin rik'awik.

³⁸ Are uri xsik'in che: —¡Ajwal Jesús! ¡Yet chi at umuq uxikin kan i mam David! ¡Chawila tob'al inwach! —Xcha che.

³⁹ I winaq chi je nab'e b'i chwach i Jesús, xkiyajo man kkaj taj chi ksik'inik. Xwiri ire xa xukowij mas ub'ixkil che i Jesús: —¡Yet chi at umuq uxikin kan i mam David, chawila tob'al inwach! —Xcha.

⁴⁰ Are uri i Jesús xtak'i'ik xaq xutaq uk'amik. Are xtejeb' li ru', xutz'onoj che:

⁴¹ —¿Wach kawaj kin-an chawe? —Xcha. I mawach xub'ij che: —Nim laj winaq, kwaj yin kinatzunsaj —xcha che.

⁴² I Jesús xub'ij che: —¡Chattzunoq! Xatutzirik man xakub'a ak'ux che i Dios —Xcha che.

⁴³ Juntir xtzun i mawach xaq xterej b'i chrij i Jesús, ktijin chuk'amwaxik xaq ktijin chutioxixik che i Dios. Xaq ni'pa i winaq chi xeilaw ile xaq lik xkikoj u'ij i Dios.