Lucas 14 - Wuj Pa K'ubultzij

I Jesús xukunaj jun achi sipol pa uxlanb'al ij

¹ Xuk'ulmaj che jun ij sábado, i Jesús x-e pa wa'im chi rachoch jun chke i kaj-atzil aj fariseo, xaq je o jub'an chik aj fariseo ketijin chuk'ak'alixik i Jesús.

² Xaq chila o jun achi chwach i Jesús, chi sipojnaq uch'akul.

³ Are uri i Jesús o jun tzij xutz'onoj chke i je tijonelab' re i ujer atb'al tzij xaq chke i aj fariseo. Xub'ij chke: —I atb'al tzij tz'ib'tal kan rumal i mam Moisés ¿Kuya nawi chqe kqakunaj jun iwab' che i ij sábado, o kuya taj? —Xcha.

⁴ Ike xech'aw taj. Are uri i Jesús xuchap i achi, xaq xrutzirsaj, xaq xutaq b'i chi rachoch.

⁵ Te'uri xub'ij chke i aj fariseo: —Pachin taq wa chiwe yix, we i rak'al o we ub'oyex ktzaq b'i pa jun jul. ¿Xatab'a kresaj ta loq? Rumal sábado.

⁶ Ike xkiriq ti chik ula'ik uwach che.

I je sik'im che jun nim laj wa'im

⁷ Te'uri i Jesús xrilo chi o jujun chke i je sik'im chwa'im, xa kkitzukuj i kub'ib'al chi o u'ij are kekub'i chi mexa. Rumali xub'ij i jun pixb'aniki chke:

⁸ —Yet, we o jun winaq katusik'ij che jun nima'ij re k'ulankil, matkub'i che i kub'ib'al mas o u'ij. Man moq o jun kk'un na chi mas o u'ij chawach yet.

⁹ Te'uri kk'un i rajaw ja, chi ix usik'im chixkeb'; moq kub'ij chawe: “Chaya akub'ib'al che i jun le”; te'uri yet to' katk'ix che, xaq kat-e chutzukuxik jun ak'ijib'al chi nti u'ij.

¹⁰ Rumali, we o jun katusik'ij che jun nima'ij, yet chatkul che i k'ijib'al chi nti u'ij. Man we keje k-an ile, i rajaw ja kk'un uri awu' xaq kub'ij chawe: “Wachalal, sa'aj ni jewa ri che jun k'ijib'ali chi mas o u'ij.” Keje ile koksax ni a'ij chkiwach konojel i je kul awu' chi mexa.

¹¹ Man pachin jun ku'an nim che rib', xa kqajsax ni u'ij; xwiri pachin k-on ch'utin che rib', knimarsax ni uri u'ij —xcha i Jesús chke.

¹² Te'uri xub'ij che i achi chi sik'iwnaq che i wa'im: —Yet, are k-an jun nima'ij, o xaq we kaya jun wa'im re uqajb'al ij, measik'ij i je awamiy man ike at kisik'im yet, xaq mitene awatz acha'; xaq mitene i je awachalal, xaq mitene alok'anij chi je b'eyom, man ike xa katkisik'ij tan chik ku' chwa'im, rumali xa ke'eloq chi kitojom ni chawe wach i xkitij awu'.

¹³ Are i ka'ano, are ka'an jun nim laj nima'ij, cheasik'ij i nib'a'ib', cheasik'ij i je sik, i je klis, xaq i je mawach.

¹⁴ Keje ile katkikot na. Ike ketiki ti chutojik chawe, xwiri i Dios kutoj ni chawe are kuriq i ij chi kewalij ni'pa i je utz chi je kamnaq. Keje ile xub'ij i Jesús chke.

Tijojb'al tzij chrij i nim laj wa'im

¹⁵ Jun chke i je kul chi mexa, are xuta i tzij le, xub'ij che i Jesús: —¡Utz ke ike chi ke'ok che i nim laj wa'im che i ajawinik re i Dios!

¹⁶ I Jesús xub'ij che: —O jun achi xuyijb'a jun nim laj wa'im re uqajb'al ij, xaq xeusik'ij uk'iyal taq winaq ru'.

¹⁷ Are xuriq i or, xutaq umokom chub'ixkil chke chi is yij chik wach i kkitijo. “Chixpetoq, man ronojel is yij chik”; xub'ij chke.

¹⁸ Are uri, konojel is xe'ok chutz'onoxik kuyb'al mak che. I nab'e xub'ij: “Yin k'a te inlo'om jub'an wulew, xaq o uchak kin-e chrilik; kintz'onoj chawe chi kakuy ni inmak” —xub'ij.

¹⁹ I jun chik xub'ij: “Yin k'a te inlo'om jo'ob' yunt inb'oyexab', xaq ke'ewila we je utz che i chak. Kintz'onoj chawe, chakuyu inmak.” Xcha.

²⁰ I jun chik xub'ij: “Yin k'a te in k'ulinaq, rumali kin-e taj”; xub'ij.

²¹ I mokom, are xtzalij ru' i rajaw uchak, is xub'ij ronojel ile che. Are uri i rajaw uchak xpe roywal, xaq xub'ij che umokom: “Chab'isoj, jat pa taq b'e re i tinimit, xaq pa taq ch'ut b'e; cheak'ama li i nib'a'ib', xaq ni'pa i je sik, xaq i je klis, xaq i je mawach”

²² Are xtzalij li mokom, xk'un chik ru' i rajaw uchak xaq xub'ij che: “Nim laj winaq, ya xin-ano pacha i xab'ij chwe, xaq k'a o i k'ijib'al nti rajaw.” Xcha.

²³ Are uri i rajaw uchak xub'ij chik che umokom: Jat tzam taq ja, chatzukuj pa taq b'e chila, xaq pa taq ch'ut b'e, xaq cha'ana li pen kik'amik i je o chila, man keje ile kinnojsaj ni wachoch.

²⁴ Man saq laj tzij kinb'ij ni chiwe chi ni'pa i xeintaq kisik'ixik nab'e, mijun chke kutij i nim laj wa'im chi inyijb'am.

K'ax i terejik chrij i Cristo

²⁵ Lik je k'i i winaq je teren chrij i Jesús. Ire xupiskilij rib' xaq xub'ij chke:

²⁶ —Jun, we kk'un wu' yin, xwiri we mas k'ax ti kinuna yin chwach uqajaw xaq chwach uchuch, chwach i rixoqil, chwach i ralk'uwal o chwach uxib'al xaq chwach i ranab', ktiki ti che i terejik chwij we mas k'ax kuna rib' ire chinwach yin.

²⁷ Jun we yin, o uchak kterej chwij, tupu kkam ni wumal. Pachin kraj ti u'anik ile, kmajaw ti uri che chi intijoxel yin.

²⁸ —We o jun chiwe kraj kuyak jun ja tak'tik, ¿Ire xatab'a kkub'i ti chuch'ob'ik ni'pa i pwaq rajwaxik che, krilb'ej re we k-ono re kuk'isb'ej re?

²⁹ Keje ile ku'an na, man moqxa xwi i ukub'ib'al kuyijb'a, xwiri kuk'is taj, ni'pa i keilawik ke'ok chuyo'yaxik,

³⁰ Kkib'ij na “I achi le xujeq u'anik i ja xwiri xtiki ti chuk'isik”; kecha.

³¹ We o jun ajawinel k-e pa ch'oj chrij jun chik ajawinel, ¿Xatab'a kkub'i ti nab'e chuch'ob'ik we ktiki che i ch'oj ru' jo'mo' juchiy (10,000) uwinaq chi je yij che i ch'oj; man i jun chi kolu'ana ch'oj, je rok'am li lajujmo' kachiy (20,000) uwinaq chi je yij che i ch'oj?

³² Xwiri we kuna ub'e chi ktiki ti che i ch'oj ru', keutaq b'i jub'an utaqon ru' i ajawinel chi ya kk'unik. Man tz'aqat k'a naj o wi loq kutz'onoj utzil che chi kkichomaj kib' chkiwach.

³³ Xaq keje uri: —Yix ile; man jun we kukanaj ti kan ronojel ni'pa i o ru', ktiki ti uri che i terejik chwij.

Are ksach utzayil atz'am

³⁴ I atz'am lik kuriq uchak chqe, xwiri we xsach i utzayil, ¿Wach u'ankil uri re ku'an tan chik tza?

³⁵ Lik nti chik uchak uri. Mitene re kuriq taq uchak pulew re xo'ol re orno, xaq mitene re kuya ucho'ab' uwach ulew. Lik nti chik uchak uri. Pachin o uxikin chutayik, lik chuta ub'e; xcha i Jesús chke.