Jueces 9 - Wuj Pa K'ubultzij

Ma Abimelec

¹ Ma Abimelec chi rak'al ma Jerobaal x-e pa Siquem che i lapanik ru' i ralk'uwal rumal uchuch, xub'ij chke:

² —Pkib'i konojel i qalk'uwal, kintz'onoj utzil chiwe chi chib'ij chke i winaq aj Siquem chi mas utz kel chke we xa jun ku'at tzij pkiwi chwach we je lajuj oxwinaq (70) rak'al ma Jerobaal ke'ataw tzij.

³ I ma Abimelec le kachalal ike, rumali xkiya kiwach ru', i xe'e chub'ixkil chke winaq aj Siquem chi kkiya kiwach ku' ike.

⁴ Xwi ta la ile, xaq xkik'am lajuj oxwinaq (70) saqpwaq chi o chila prachoch i tiox Baal-berit, xkiya che ma Abimelec. Ru' i mer le ma Abimelec xeumok b'i jub'an achiyab' ajkamsanel man ke'e ru'. Are uri i achiyab' le xe'e ru' ma Abimelec,

⁵ pa Ofra ipa xjeqi wi te'eq uqajaw chi ma Jerobaal, chila chwach jun ab'aj xekamsax wi lajuj oxwinaq (70) ratz ucha' ma Abimelec. Xwi a Jotam xkam taj man xruwaj rib', chi cha'xel chke rak'al ma Jerobaal.

⁶ Chrijil chik ile konojel i winaq aj Siquem xaq i winaq aj Bet-milo, xkimol kib' chila chuxe' i sik'al chi o chila ru' i lo'laj ab'aj chi o chila Siquem, are uri xkiya kan ma Abimelec pa ajawinel.

⁷ Are xretamaj ma Jotam, xel b'i puwi i jyub' Gerizim, chila ko ksik'in wi loq, man keje ile kkita konojel: ¡Lik chita ub'e, winaq aj Siquem, man keje ile i Dios xaq kixuta yix!

⁸ Xuk'ulmaj juyak chi i che' xkaj te'eq jun kajawinel, xkib'ij che i che' olivo chi kkanaj kan pkajawinel.

⁹ Xwiri i che' olivo xraj taj, xaq xub'ij chke: ¿Xatab'a kinmayij uya'ik aceite chi lik kuriq uchak re kojb'al u'ij i Dios, chi xaq lik kuriq uchak chke i winaq?

¹⁰ Are uri konojel i che' xkib'ij che uche'lal i higo chi kkanaj kan pkajawinel.

¹¹ Xwiri uche'lal higo xraj taj xaq xub'ij chke: ¿Xatab'a kinmayij uya'ik uk'iyal wecha'il rumal kinkanaj pa ajawinel piwi yix?

¹² Are uri konojel i che' le xkib'ij che uraxk'amil i uva chi kkanaj kan pkajawinel.

¹³ Xwiri i uraxk'amil i uva xraj taj xaq xub'ij chke: ¿Xatab'a kinmayij kan uya'ik i uwa'al uva muqb'am, chi lik kikot i Dios ru' xaq lik kekikot i winaq ru' rumal kinkanaj pa ajawinel piwi yix?

¹⁴ Pa k'isb'al re, konojel i che' le xkib'ij che i k'ix chi kkanaj kan pkajawinel.

¹⁵ I k'ix le xub'ij chke, we lik qatzij kkaj chi are ire kkanaj kan pkajawinel, rajwaxik uri chi konojel kek'iji chuxe' umuj, xwiri we kkaj taj chi are ire kkanaj pkajawinel, kel nu b'i uri jun a' che chi kuchup uwach ronojel i che' chakalte' chwach i jyub' Líbano.

¹⁶ Wo'or yin kintz'onoj chiwe: ¿Utz xi'ano kina yix chi xikanaj kan ma Abimelec piwajawinel? ¿Lik xi'an uk'exel i utz che i ma Jerobaal xaq chke i ralk'uwal pacha xu'an ire chiwe yix?

¹⁷ Man inqajaw lik xuya uk'aslemal pu'ab' i kamik iwumal yix are xu'an ch'oj elsab'al iwe pki'ab' aj Madián.

¹⁸ Xwiri yix, xane xixwalij chu'anik ch'oj chkij i ralk'uwal inqajaw, man xeikamsaj i lajuj oxwinaq (70) rak'al chwach jun nim laj ab'aj. Xwi ta la ile, xaq xiya taq kan ma Abimelec pa ajawinel chi rak'al qas ti mer rixoqil inqajaw, xa rumal taqi man ix alal ru'.

¹⁹ Xwiri yin kinb'ij chiwe wo'or: We lik qatzij xi'an uk'exel i utz che inqajaw ma Jerobaal xaq chke i ralk'uwal pacha xu'an ire chiwe yix, lik utz uri chixkikot ni ru' ma Abimelec xaq ire chkikot ni iwu' yix.

²⁰ Xwiri we xi'an ti uk'exel i utz le, chel na li uri jun a' che ma Abimelec chi kuchup b'i kiwach konojel i aj Siquem xaq konojel i aj Bet-milo, xaq chel na li jun a' chke aj Siquem xaq chke aj Bet-milo re kuchup b'i uwach ma Abimelec.

²¹ Chrijil chik ub'ixkil ile, ma Jotam x-anmajik x-e pa jeqelem chila pa Beer, man kuxij rib' che i ratz chi ma Abimelec.

²² Ma Abimelec le oxib' junab' x-ajawin pkiwi aj Israel,

²³ Xwiri i Dios xukoj jun utz ti laj nojb'al re ch'oj chkixol ma Abimelec ku' aj Siquem, man keje ile kkiqel ni ma Abimelec.

²⁴ Keje utojik k-on ni ma ajkamsanel laj ma Abimelec ile, man are ire xekamsaw i lajuj oxwinaq (70) rak'al ma Jerobaal, xaq keje kkik'ulmaj aj Siquem ile rumal xkito.

²⁵ I aj Siquem o jujun chke kkuwaj kib' pa taq es xukut taq b'e, man kkimaj ub'itaq ke konojel i winaq chi keik'aw chila. Ma Abimelec xretamaj ile.

²⁶ Xuk'ulmaj jun ij chi ma Gaal, chi uk'ojol ma Ebed, xeik'aw junam ku' i ratz ucha' chila Siquem, are uri xki'an chke i winaq re i tinimit le chi xe'on utz ku' ike.

²⁷ Are uri xe'e pa taq es chumolik i uva, te'uri xkiyijb'a uwa'al uva muqb'am, te'uri xki'an jun nim laj nima'ij, xe'ok chwa'im xaq xe'ok che i ab'arik prachoch i kitiox ike, xaq lik xe'ok chuk'oqoxik ma Abimelec.

²⁸ Are uri ma Gaal xub'ij: “¿Wach taq wa u'ij ma Abimelec le xcha? ¿Are ti b'awa rak'al ma Jerobaal ile, xaq are ti b'awa ma Zebul tol re? Yoj chi oj aj Siquem ¿B'uchak chi oj o pa k'ax pu'ab' ire? Nti k-ono we oj o pa k'ax pu'ab' ma Hamor man are ire xyakaw i tinimit Siquem, xwiri pu'ab' ti taq ma Abimelec.

²⁹ Wetene yin in aj-atzil piwi yix, ujer te'eqi wesam ti chub'i ma Abimelec waral”, xaq xub'ij chik: “Kinb'ij neri che: Ma Abimelec chamolo kichi' konojel awinaq chi je yij che i ch'oj, te'uri chatpet chu'anik ch'oj chwij yin, kincha neri che.”

³⁰ I ma Zebul, chi aj-atzil che i nim laj tinimit le, are xuta wach taq ktijin ma Gaal chub'ixkil, lik xpe jun nim laj roywal.

³¹ Rumali ani'al xutaq b'i ub'ixkil i tziji che ma Abimelec, chi o chila pa Arumá: “Ma Gaal, chi uk'ojol ma Ebed, xk'un pa Siquem, junam ku' i ratz ucha' ketijin chkitunik i winaq, re kech'ojin chawij yet.

³² Rumali chatpet ku' awinaq chi je yij che i ch'oj, i che a'ab'i lik chiwuwaj iwib' pa taq es,

³³ Are ksaqirik xaq kel li ij chixok pa tinimit chu'anik ch'oj chkij, are chi ma Gaal xaq i uwinaq chi je yij che i ch'oj kepe chu'anik ch'oj iwu', are uri yet cha'ana uri chke pacha kumaj awach.”

³⁴ Rumali chi ma Abimelec xaq i uwinaq chi je yij che i ch'oj lik cha'ab' xepetik, xkisutij rij i tinimit Siquem xaq xkuwaj kib' chila, kajib' tzob'aj xki'an che kib'.

³⁵ Are xel li ma Gaal chi uk'ojol ma Ebed pa okb'al che i tinimit, are uri ma Abimelec xaq i uwinaq chi je yij che i ch'oj, xe'el li chila ipa kuwam wi kib'.

³⁶ I ma Gaal are xeril i winaq, xub'ij che ma Zebul: —¡Chawila pe ketijin li kiqajik jub'an achiyab' chi je yij che i ch'oj tzam jyub' le! Ma Zebul xub'ij: —Winaq taj, ile xa kimujal i jyub' chi kawil taq yet je winaq.

³⁷ Xwiri ma Gaal xub'ij chik: —¡Xaq puwi i jyub' chi “Umuxux ulew” kkib'ij che, ktijin li kqajik jub'an chik achiyab' chi je yij che i ch'oj! ¡Xaq jub'an chik ketijin li kiqajik che i b'e ipa o wi Sik'al chi ke Aj-ij!

³⁸ Are uri ma Zebul xub'ij che i ma Gaal: —¡Chatch'aw uri wo'or, ma loch'! ¿Ipa o wi ile chi kab'ij te'eq chi nti i u'ij ma Abimelec, chi k-on taq rajchak chqe? ¡Cheawila pe i winaq le chi je yij che i ch'oj, chi lik nti ki'ij xab'ij, wo'or chatak'b'a awib' uri chu'anik ch'oj chkiwach!

³⁹ Are uri ma Gaal xnab'ej b'i chkiwach i winaq aj Siquem chu'anik ch'oj ru' i ma Abimelec xaq ku' uwinaq.

⁴⁰ Xwiri ma Abimelec xterej b'i chrij ma Gaal, i ma Gaal le x-anmajik. Lik je k'i i winaq xekam pa okb'al che i tinimit.

⁴¹ Ma Abimelec xkanaj kan pa Aruma, i ma Zebul xeresaj b'i ma Gaal xaq i ratz ucha' pa Siquem.

⁴² Chukab' ij i winaq aj Siquem xe'el b'i pa tinimit, xe'e pa taq es; are xretamaj ma Abimelec,

⁴³ xu'an oxib' tzob'aj chke uwinaq chi je yij che i ch'oj, te'uri xe'e chkuwaxik kib' pa taq es. Are xkilo chi xe'el li aj Siquem pa tinimit, are uri i ma Abimelec le junam ku' uwinaq xe'el li chila ipa kuwam wi kib', xe'e chu'anik ch'oj chkij.

⁴⁴ Ma Abimelec xaq jun chke utzob'ajil xe'e chila pa okb'al che i tinimit Siquem, tz'aqat i keb' chik tzob'aj xe'e chkij i winaq chi je enaq pa taq es, konojel xekikamsaj.

⁴⁵ Lik jun ij xuch'ij ma Abimelec chu'anik ch'oj ku' i winaq aj Siquem k'a xtiki ni chumajik i tinimit; te'uri xeuwulijsaj i ja xaq xeukamsaj konojel i winaq, i tinimit le xutik atz'am chwach.

⁴⁶ Are xketamaj i winaq aj Migdal-siquem wach xu'an ma Abimelec, xe'e chuto'ik kib' pa ja chi o li pa jul chuxe' i rachoch i tiox re El-berit.

⁴⁷ I ma Abimelec are xretamaj chi i winaq aj Migdal-siquem kuwam kib' chila.

⁴⁸ Are uri xe'e ku' konojel uwinaq chila chwi jyub' Salmón, xuk'atzij u'ab' jun che' ru' ikaj, te'uri xutelej b'i chwi uteleb', xaq xub'ij chke konojel uwinaq chi xaq keje chki'ana ike.

⁴⁹ Are uri konojel xkik'atzij u'ab' che', xeterej b'i chrij ma Abimelec, xkik'am b'i u'ab' i che' le k'a chila pa ja chi o li pa jul chuxe' i rachoch i tiox, chila xkit'ub'a wi u'ab' i che', te'uri xkinak' a' che. Keje kikamsaxik konojel aj Migdal-siquem ile x-anik chi kolo je lajujwinaq kamo' (1,000) konojel achiyab' xaq ixoqib'.

⁵⁰ Chrijil chik ile ma Abimelec x-e pa tinimit Tebes, xuyijb'a rib' re i ch'oj chkij i winaq pa tinimit le, lik xtiki kan chumajik.

⁵¹ Chunik'ajal i tinimit le o jun ja tak'tik, chupam ile xkuwaj wi kib' konojel i winaq, achiyab' che ixoqib' chi aj pa tinimit Tebes, lik utz utz'apixik uchija xki'an che xaq xe'el b'i k'a puwi i ja.

⁵² Xwiri ma Abimelec xupon k'a chila chwach uchija re i ja tak'tik. Xuchapo ya kuch'ob' unak'ik a' che,

⁵³ are uri jun ixoq xuk'aq li jun ab'aj ka' chi re jok'b'al trigo puwi ma Abimelec, lik xupaxij b'i ujolom che.

⁵⁴ Are uri ma Abimelec juntir xsik'in pan che i tol re, xub'ij che: Chawesaj li ach'ich' su' chinakamsaj, man kwaj taj chi kb'ixik jun ixoq xinkamsawik. Are uri i ajtol re xumin b'i uch'ich' che upam, xel k'a chel rij, keje ukamik ile.

⁵⁵ I aj Israel are xkilo chi ma Abimelec xkamik, xetzalij b'i chi kachoch.

⁵⁶ Keje uri utojb'alil ile xuya i Dios che ma Abimelec rumal i utz taj chi xu'an che uqajaw, are xeukamsaj i lajuj oxwinaq (70) ratz ucha'.

⁵⁷ Xaq keje ile xu'an i Dios chke i winaq aj Siquem rumal ronojel ni'pa utz taj chi xki'ano, are utz'aqatik uwach uk'oqonik i ma Jotam le, chi uk'ojol ma Jerobaal.