Jueces 8 - Wuj Pa K'ubultzij

Ma Gedeón keuchap i ajawinelab' aj Madián

¹ I je utzob'ajil ma Efraín xpe koywal xaq xkich'ojij che ma Gedeón chi xub'ij ti chke chi xe'e chu'anik ch'oj ku' aj Madián.

² Xwiri ire xub'ij chke: —¿Kiwil ti b'a ub'e ri chi ni'pa i xi'ano le mas nim chwach i xin-an yin? I jub'i' chi xi'an yix le mas ne o u'ij chwach ronojel ni'pa xqa'ana yoj.

³ I Dios xeujach i kaj-atzil te'eq aj Madián pi'ab' chi ma Oreb xaq ma Zeeb. ¿Wach wa mas xin-an yin chi kmajaw ru' pacha xi'an yix? I je utzob'ajil ma Efraín are xkita wach xub'ij ma Gedeón, are uri xik'aw koywal che.

⁴ Ma Gedeón ku' i jo'lajujwinaq (300) achiyab' lik je kosnaq chik are xki'axuj i raqana Jordán rumal koqtaxik ajch'oj chkij.

⁵ Chila pa Sucot ma Gedeón xub'ij chke i achiyab' chi je jeqel chila: —Chi'ana utzil chwe, chiya jun kiwa i achiyab' le chi je wachi'ilam loq, man lik je kosnaq chik. Kojtijin chkoqtaxik i ajawinelab' aj Madián chi ma Zeba xaq ma Zalmuna.

⁶ Xwiri aj-atzil ke aj Sucot xkib'ij che: —¿Xatab'a je achapom chik ma Zeba xaq ma Zalmuna man keqatzuq taq konojel awinaq?

⁷ Are uri ma Gedeón xub'ij chke: —¡I Ajwal are je ujachom chik ma Zeba xaq ma Zalmuna pin-ab', te'uri kintzalij chali iwu' chu'anik raqraq che ich'akul yix ru' k'ix chi o pa taq tz'inilik jyub' chaqij!

⁸ Are uri ma Gedeón x-e pa Peniel xaq xutz'onoj kiwa chke i winaq pacha xu'an chila Sucot, xwiri i winaq chi aj Peniel xaq xkila' uwach chke pacha ula'ik xki'an i winaq aj Sucot,

⁹ Ma Gedeón xub'ij chke: ¡Are kintiki chkich'akik ajch'oj chwij kintzalij li chuk'aqik i ja tak'tik le chiwe pulew!

¹⁰ Ma Zeba xaq ma Zalmuna je o te'eq pa Carcor junam ku' lajujwinaq wuqlajujmo' juchiy (15,000) achiyab' chi xwi chik ike le xekanaj kan chke i je yij che i ch'oj aj prelb'al ij, i jub'an chi xekamik je jo'lajujchiy (120,000) konojel.

¹¹ Ma Gedeón xuk'aq b'i rib' che i b'e chi k-e pa tz'inilik jyub' chaqij, prelb'al ij che i Noba xaq che i Jogbeha, are uri xujeq ch'oj chkij are lik nti kkich'ob' ike che.

¹² I ma Zeba xaq ma Zalmuna xe'anmajik, xwiri ma Gedeón xterej b'i chkij xaq xtiki chkichapik, are uri i lajujwinaq wuqlajujmo' juchiy (15,000) achiyab' chi je yij che i ch'oj lik xkixij kib'.

¹³ Are xtzalij li ma Gedeón che i ch'oj che i ik'awb'al chi Jeres ub'i,

¹⁴ xuchap jun ala aj Sucot xaq xuk'ot uchi', are uri i ala le xutz'ib'aj chwach jun wuj kib'i konojel aj-atzil xaq i je uwi ujolom chke aj Sucot, je wuqlajuj oxwinaq (77) konojel.

¹⁵ Are uri ma Gedeón x-e Sucot, xub'ij chke i winaq aj chila: —¿Kk'un chik'ux wach taq inyo'yaxik xi'ano rumal ma Zeba xaq ma Zalmuna? ¿Kk'un chik'ux chi xiya ti kiwa i achiyab' chi je yij che i ch'oj chi lik je kosnaq chik, xib'ij chqe chi rumal k'amaja keqachap i keb' ajawinelab'? B'ay, ¡Riy je oliki!

¹⁶ Are uri ma Gedeón xuk'am i k'ix pa taq tz'inilik jyub' chaqij, man ru' i k'ix le xu'an k'ax chke i je uwi kijolom aj Sucot.

¹⁷ Xuk'aq li i ja tak'tik pulew chi o chila Peniel, xaq xeukamsaj i winaq aj pa tinimit.

¹⁸ Are uri xutz'onoj chke ma Zeba xaq che ma Zalmuna: —¿Wach ke'anaw i winaq chi xeikamsaj chila pa Tabor? Ike xkib'ij: Keje pacha kattzun yet, konojel ike keje ketzunik pacha ktzun uk'ojol jun ajawinel.

¹⁹ Are uri ma Gedeón xsik'in chub'ixkil: ¡Ike le je are watz incha'! ¡Yix xeikamsaj watz incha' chi xaqjun qaqajaw qachuch ku'! Lik saq laj tzij i Ajwal k'aslik, yix matiji xeikamsaj ike le, keje teneri kixinkamsaj yin wo'or.

²⁰ Chrijil chik ile xub'ij che a Jeter chi are i rak'al atz: —¡Jat chkikamsaxik! Xwiri a Jeter lik k'a k'ojol ala, rumali xuxij rib' chrelsaxik li uch'ich'.

²¹ Are uri ma Zeba xaq ma Zalmuna xkib'ij che ma Gedeón: —Chojakamsaj yet man jun achi ketamax uwach rumal ukowil uwach. Are uri ma Gedeón xwalijik i xeukamsaj xaq xuk'am li wiqb'al chi o pkiqul kikamey ma Zeba xaq ma Zalmuna.

²² Are uri aj Israel xkib'ij che ma Gedeón: —Wo'or kqaj chi yet, awak'al xaq uwi amam ki'at ni tzij pqawi, man xa'an akoch' chqelsaxik pki'ab' aj Madián.

²³ Xwiri ma Gedeón xub'ij chke: —Mijun chqe yoj ku'at ni tzij piwi yix, are ni Ajwal k-ataw tzij piwi.

²⁴ Are utzil chi kintz'onoj chiwe are iri: —Chiya i b'aq chwe chi imajom chke aj Madián. I b'aq re uwi ab'aj le are kkikoj te'eq achiyab' chi je yij che i ch'oj chi je aj pa tz'inilik jyub' chaqij, chi je ajch'oj chqij.

²⁵ Are uri aj Israel xkilik' jun k'ul pulew xkiya ronojel ni'pa i b'aq re uwi ab'aj chwach, chi kimajom chke aj Madián; are uri xkib'ij che ma Gedeón: —Riy oliki.

²⁶ Kolo kawinaq (40) pexu ralil ronojel i b'aq chi an-o'oj, xok ti uri pajil ronojel ni'pa i jub'an chik wiqb'al rib' jun winaq, xaq xoksax ti pajil i k'ul kaqkoj chi ki'u' i ajawinelab', xaq xoksax ti pajil i ketz'b'alil kiqul i kamey.

²⁷ Ru' i an-o'oj le ma Gedeón xu'an jun efod xuya chila pa Ofra chi utinimit ire, xwiri konojel i winaq aj Israel xko'taj ukojik u'ij i Ajwal rumal i efod chi xu'an ire. Xaq ile xe'eloq pacha jun tzaqsab'al che ma Gedeón xaq chke i je ralk'uwal.

²⁸ Keje uri ile chi aj Madián xekanaj kan pkitaqon aj Israel, lik xetiki ti chik chuyakik ki'ij. Tz'aqat are k'a k'as ma Gedeón xuch'ij kawinaq (40) junab' chomb'al ib' che i tinimit le.

Ukamik ma Gedeón

^29-30 Are uri ma Jerobaal, chi xaq ma Gedeón ub'i, xjeqi chi rachoch. Je lajuj oxwinaq (70) rak'al xeuk'uwalij man je k'i rixoqil.

³¹ I ma Gedeón le xuk'uwalij jun rak'al ru' ukab' rixoqil chi o chila Siquem, i ak'al le xuya pub'i Abimelec.

³² Ma Gedeón lik rij chik are xkamik, xmuq chila pujul uqajaw, chi ma Joás, chila pa Ofra putinimit ralk'uwal ma Abiezer.

³³ Chrijil chik ukamik ma Gedeón, aj Israel xkimayij chik ukojik u'ij i Ajwal rumal ukojik u'ij i jalajuj taq tiox Baal, man xki'ul jun kitiox chi Baal-berit ub'i.

³⁴ Konojel aj Israel xsach chkik'ux chi are Kajwal Dios xe'elsaw pki'ab' konojel ajch'oj chi je sutiwnaq kij.

³⁵ Xaq aj Israel le xki'an ti uk'exel i utz chke i ralk'uwal ma Jerobaal, chi xaq ma Gedeón ub'i, pacha x-ani chke ike.