Jueces 7 - Wuj Pa K'ubultzij

Ma Gedeón xeuch'ak aj Madián

¹ I ma Gedeón, chi wo'or ma Jerobaal chik ub'i, xaq konojel ni'pa je o ru' we' xewalijik xeki'ana jun kik'ijib'al chila naqaj che i ralaxb'al ya pa Harod. I k'ijib'al ipa je o wi aj Madián xkanaj pa moxab' chke, chila chwa ta'aj chi o xe jyub' More.

² I Ajwal xub'ij che ma Gedeón: “Lik je k'i winaq xeak'am li awu', Yin we kin-an chke aj Israel chi ketiki chkikamsaxik aj Madián, kkib'ij uri chi je are ike ru' kicho'ab' xetiki chuto'ik kib', lik kkikoj ki'ij uri chinwach.

³ Rumali chab'ija chke konojel i winaq chi we o jun kuxij rib' su' oj chi rachoch.” Keje uri ile chi ma Gedeón xuk'am kipam, xetzalij b'i jo'lajujmo' kachiy (22,000) achiyab' chi kachoch, xa jo'mo' juchiy (10,000) xekanaj kan ru' ire pa ch'oj.

⁴ Xwiri i Ajwal xub'ij chik: “Lik k'a je k'i i achiyab' xekanajik; cheak'ama b'i konojel chutu'ik kiya', chila kink'am wi kipam pachin ke'e awu' xaq pachin ke'e taj.”

⁵ Are uri ma Gedeón xeuk'am b'i konojel i winaq chutu'ik kiya', chila i Ajwal xub'ij che: “Konojel ni'pa kkitu' kiya' ru' ki'ab' chi pacha utu'ik uya' i tz'i ku'ano chi xa kuri'o, chea'ulu chkixol i jub'an chi kexuki chutu'ik kiya'.”

⁶ I achiyab' chi xkitu' kiya' ru' ki'ab' chi pacha utu'ik uya' i tz'i ku'ano chi xa kuri'o xa je jo'lajujwinaq (300), konojel i jub'an chik xexuki chutu'ik kiya'.

⁷ Are uri i Ajwal xub'ij che ma Gedeón: “Ku' i jo'lajujwinaq (300) achiyab' le chi xkitu' kiya' ru' ki'ab', kixinto na xaq kinjach ni aj Madián pi'ab', i jub'an chik che oj chi kachoch.”

⁸ Are uri ma Gedeón xeutaq b'i konojel i jub'an chi kachoch, xwiri chuxe'el kitaqik b'ik xuk'am kan kixar xaq rok'a' chij. Xwi xekanaj kan i jo'lajujwinaq (300) achiyab' chi xe'ulik. Xumol kichi' kajsik aj Madián chi kimolom kib' chwa ta'aj.

⁹ Che a'ab' le i Ajwal xub'ij che ma Gedeón: “Chatwalijoq man katqaj b'i chu'anik ch'oj ku' aj Madián, man keinjach pa'ab'.

¹⁰ Xwiri we kaxij awib' chu'anik ch'oj, nab'e chatqaj b'i che i k'ijib'al ipa o wi ma Fura chi awajchak.

¹¹ Chata na wach kkib'ij aj Madián, te'uri lik kpe acho'ab' chu'anik ch'oj ku'.” Keje uri ile chi ma Gedeón xqaj ru' ma Fura, chi rajchak, k'a che i k'ijib'al ipa je o wi i chajal ke ajch'oj.

¹² I aj Madián, aj Amalec xaq i je aj prelb'al ij, lik kikichersam b'i kib' chwa ta'aj pacha jub'an sak'; lik k'i kikamey pacha i seneb' chi o chuchi' i mar.

¹³ I ma Gedeón are xtejeb' chila ipa kimolom wi kib' ajch'oj chrij, xuta chi jun ajch'oj xub'ij che i rachi'il wach xrachik'aj. Keje iri xub'ij che: —Xwachik'aj chi jun wa re cebada ksururik petnaq ipa qamolom wi qib' yoj, xuxa'a rib' che jun ja, xuwulijsaj li pulew.

¹⁴ Are uri i rachi'il xub'ij che: —Ile to' ti jun b'iroxik lik are uch'ich' ma Gedeón, chi uk'ojol ma Joás, chi aj Israel. I Dios keujach aj Madián xaq konojel uwinaq chi je yij che i ch'oj pu'ab' ma Gedeón.

¹⁵ I ma Gedeón are xuta i achik' le chi klapik xaq wach taq usuk' ke'eloq, xukoj u'ij i Ajwal. Chrijil chik ile xtzalij li ipa je o wi aj Israel, xub'ij chke: —¡Chixwalijoq man i Ajwal keujach aj Madián pqa'ab'!

¹⁶ Are uri xujach kiwach i jo'lajujwinaq (300) achiyab', xu'an oxib' tzob'aj chke, te'uri xujach rok'a' chij chke konojel xaq jujun ral taq xar chi o antorcha chupam.

¹⁷ Are uri ma Gedeón xub'ij chke: —Are kinupon pkitzal ajch'oj chqij, chikojo retalil wach kin-ano xaq keje ile chi'ana yix.

¹⁸ Yin xaq i jub'an chi je wachi'il are kqaxut'ij i rok'a' chij, xaq chixut'ij iwe yix chrij chwach i k'ijib'al ipa je o wi ajch'oj, xaq kixsik'in chub'ixkil i tziji: “¡Rumal utaqanik i Ajwal xaq rumal utaqanik ma Gedeón!”

¹⁹ Keje uri ile chi ma Gedeón xaq i je jo'winaq (100) ajch'oj chi je o ru' xeupon chila ipa kimolom wi kib' aj Madián, che i or le ketijin aj Madián chujalik kib' che i kichak re tik'il a'ab'. Are uri konojel uwinaq ma Gedeón xkixut'ij i rok'a' chij xaq xkipaxij i xar chi kik'amom b'ik.

²⁰ Che oxib' tzob'aj junam xkixut'ij i rok'a' chij xaq xkipaxij i xar. Ru' ki'ab' moxim kik'amom b'i antorcha tzijom, xaq ru' ki'ab' wiqab'im kik'amom b'i rok'a' chij; konojel xesik'in chub'ixkil: “¡Chqa'ana ch'oj, rumal utaqanik i Ajwal xaq rumal utaqanik ma Gedeón!” Xecha.

²¹ Konojel aj Israel xe'el ti pa kik'ijib'al ipa kisutim wi kij aj Madián, rumali konojel aj Madián xesik'inik xaq xe'anmajik.

²² Tz'aqat i je jo'lajujwinaq (300) aj Israel kkimayij ti uxut'ixik i rok'a' chij, i Ajwal xu'an chke aj Madián chi xki'an ch'oj chkiwach xaq xe'anmaj b'i k'a Bet-sita chi o chila pa b'e Zerera, k'a kupon chila chuchi' ulew Abel-mehola, chi o chila chunaqaj che i Tabat.

²³ Are uri xkisik'ij aj Israel chi je utzob'ajil ma Neftalí, je utzob'ajil ma Aser xaq utzob'ajil ma Manasés, man keterej b'i chkij aj Madián.

²⁴ Ma Gedeón xeutaq b'i ajb'il tzij chwi taq jyub' ipa je o wi utzob'ajil ma Efraín, chub'ixkil i tziji: Chi chepet chu'anik ch'oj ku' aj Madián xaq che'oj pa taq ik'awb'al chi taq ya pa Bet-bara xaq pa Jordán, chuxe'el kuponik ike. I je utzob'ajil ma Efraín xki'ano chrij pacha xb'ix chke.

²⁵ Xwi ta la ile, xaq xkichap keb' kaj-atzil aj Madián chi je are ma Oreb xaq ma Zeeb. Ma Oreb xkikamsaj chwi jun nim laj ab'aj chi wo'or etamam ub'i: Nim laj ab'aj Oreb. I ma Zeeb xkikamsaj chila che i k'ijib'al chi xkiya pub'i pacha ub'i ire, chila ipa kyitz' wi uva re i uwa'al uva muqb'am. Chrijil chik i koqtaxik aj Madián xkik'am b'i ujolom ma Oreb xaq ujolom ma Zeeb che ma Gedeón, chi o kan ch'aqa ya Jordán.