Jueces 4 - Wuj Pa K'ubultzij

Ati Débora xaq ma Barac xkich'ak ma Sísara

¹ Chrijil chik ukamik ma Aod, i aj Israel xemakun chik chwach i Ajwal.

² Rumali i Ajwal xeujach pu'ab' ma Jabín, chi ajawinel ke aj Canaán, chi ku'at tzij pa tinimit Hazor. I ma Jabín le o jun aj-atzil ukojom pkiwi achiyab' chi je yij che i ch'oj, chi ma Sísara ub'i, jeqel chila pa Haroset-goim.

³ I ma Jabín le o jo'winaq kamo' (900) ch'ich' re b'inb'al ru', ire le juwinaq junab' je uya'om chik i aj Israel pa k'ax, lik keje ile k'a xkitz'onoj ni kitob'al che i Ajwal.

⁴ Che taq i ij le aj Israel x-at tzij pkiwi rumal ati Débora chi profeta, chi rixoqil ma Lapidot.

⁵ I ati Débora le arewi kkub'i chuxe' jun palma chi etamam uwach ru' i b'iyaji: “Palma re ati Débora” chi o chila prulew ma Efraín chuxol keb' tinimit, Ramá xaq i Betel; i aj Israel le chila keupon wi ru' chuyijb'axik kich'oj.

⁶ Xuk'ulmaj jun ij ati Débora xutaq usik'ixik jun achi chi ma Barac, chi uk'ojol ma Abinoam, chi jeqel chila pa Cedes, chi are jun tinimit ke utzob'ajil ma Neftalí xub'ij che: —I Ajwal, chi ki-Dios aj Israel, kub'ij iri chawe: “Jat chila puwi i jyub' Tabor, chamolo kichi' jo'mo' juchiy (10,000) achiyab' re kitzob'ajil ma Neftalí xaq ma Zabulón.

⁷ Yin kin-an na chi ma Sísara chi kaj-atzil achiyab' chi je yij che i ch'oj, chi je re ma Jabín, kpe chu'anik ch'oj awu' chuchi' i ya Cisón ru' ronojel uch'ich' re b'inb'al xaq ku' konojel uwinaq chi je yij che i ch'oj, xwiri Yin keinjach ni pa'ab' yet.”

⁸ Xwiri i ma Barac xub'ij: —Yin kin-ek we kat-e yet wu', xwiri we kat-e taj, kin-e ti uri.

⁹ Ati Débora xub'ij che: —Kin-e awu' xwiri ronojel ni'pa i ch'akanik le koksax ti a'ij yet ru', man i Ajwal kujach ma Sísara pu'ab' jun ixoq. Are uri ati Débora x-e ru' ma Barac k'a pa Cedes.

¹⁰ Chila pa Cedes le, ma Barac xeusik'ij utzob'ajil ma Zabulón xaq utzob'ajil ma Neftalí, xumol kichi' jo'mo' juchiy (10,000) achiyab' chi je yij che i ch'oj, xaq x-e ati Débora ku'.

¹¹ Naqaj che i Cedes, chutzal i sik'al chi re ma Zaanaim, chila o wi i k'ijib'al re ma Heber, chi aj Ken, chi ujek'om rib' ku' i jub'an chik aj Ken, ire petnaq chke umuq uxikin ma Hobab, chi uqajaw uji' ma Moisés.

¹² I ma Sísara are xretamaj chi ma Barac, uk'ojol i ma Abinoam, elnaq chub'i puwi i jyub' Tabor,

¹³ xumol uchi' jo'winaq kamo' (900) uch'ich' re b'inb'al, xaq konojel uwinaq chi je yij che i ch'oj junam xe'e k'a che i jyub' Haroset-goim k'a chuchi' i raqana Cisón.

¹⁴ Are uri ati Débora xub'ij che ma Barac: —¡Jib'a awib' man che i iji i Ajwal kujach i ma Sísara pa'ab'! ¡I Ajwal nab'e chik chkiwach awajch'oj! Are uri ma Barac xqaj b'i chwi i jyub' Tabor je teren b'i jo'mo' juchiy (10,000) achiyab' chrij chi je yij che i ch'oj.

¹⁵ Are ma Barac xaq i uwinaq chi je yij che i ch'oj xe'e pa ch'oj chrij ma Sísara, i Ajwal xukoj xib'rikil chke konojel uwinaq ma Sísara xaq chke konojel ni'pa je o pa taq ch'ich' re b'inb'al, lik xuxij ne rib' ma Sísara, xel la li chupam uch'ich', x-anmaj b'i chaqan.

¹⁶ I ma Barac xterej b'i chkij uwinaq ma Sísara chi je o pa ch'ich' re b'inb'al xaq i je o chaqan, xetiki chke k'a pa Haroset-goim. Che i ij le mijun chke uwinaq ma Sísara chi je yij che i ch'oj xk'asi kanoq, konojel is xekamik.

¹⁷ I ma Jabín, chi ajawinel re i tinimit Hazor, nti kich'oj chkiwach ru' i ma Heber chi aj Ken. I ma Sísara chi anmajnaq b'i chaqan, xupon k'a ru' ja ru' ati Jael chi rixoqil ma Heber.

¹⁸ Ati Jael are xrilo chi xupon ma Sísara, x-e la chuk'ulaxik, xub'ij che: —Chatok li warali nim laj winaq, lik maxij awib' chatok loq; are uri ma Sísara xok b'i chi rachoch ati Jael, i ati Jael le xruwaj chuxe' jun k'ul.

¹⁹ Are uri ma Sísara le xutz'onoj jub'i' uya' che ati Jael man lik kk'atik, rumali ati Jael xujaq uchi' i tz'um chi o leche chupam, te'uri xuya che ma Sísara, are xtu'taj uleche xruwaj chik chuxe' i k'ul.

²⁰ I ma Sísara xub'ij che ati Jael: —Chat-ol xolchija re i mujb'al, we o jun kk'unik i kutz'onoj taq chawe we o jun winaq pa ja, kab'ij che chi ntaj.

²¹ I ma Sísara lik kosnaq rumali xok li jun nim laj uwaram. Are uri ati Jael xuk'am jun ch'ayb'al xaq jun estaka chi koksax che i mujb'al; kok'il xaq lik kumatz rib' xtejeb' pan ru' ma Sísara. Are o chik ru', xuch'ap b'i estaka che ujolom, xqaj k'a chwach ulew xaq lik xch'api kan chila; keje ukamik uri ma Sísara ile.

²² Are xupon ma Barac chutzukuxik ma Sísara, ati Jael xel la li chuk'ulaxik, xub'ij che: —Sa'aj man kink'ut chawe ipa o wi achi chi kattijin chutzukuxik. Are xok b'i ma Barac pa ja ru' ati Jael, are uri xrilo chi jab'al b'i ma Sísara chwach ulew kamnaq chik xaq ch'apal jun estaka che ujolom.

²³ Che i ij le, keje uqajsaxik u'ij i ma Jabín ile xu'an i Ajwal chi ajawinel ke aj Canaán, lik chkiwach konojel aj Israel xuk'ulmaj ile.

²⁴ Lik k'a arewi uri i aj Israel xkijeq u'anik k'ax che ma Jabín, chi ajawinel ke aj Canaán, lik k'a xkikamsaj na.