Jueces 17 - Wuj Pa K'ubultzij

I rachoch utiox ma Micaía

¹ O jun achi ma Micaía ub'i, jeqel chwi taq jyub' ke utzob'ajil ma Efraín.

^2-3 Xuk'ulmaj jun ij i ma Micaía xub'ij che uchuch: —Kk'un chak'ux chi o jo'lajujwinaq kamo' (1,100) saqpwaq chi xel-ax chawe jela kanoq, chi xaya i k'oqonik puwi ili'om, ile wu' yin o wi. Yin xin-el-awik, xwiri wo'or kintzalij chik chawe, man xinta chi ajachom pu'ab' i Ajwal re kataqb'ej u'anik jun atiox ch'ayom chi xaq kakoj saq-o'oj chrij. Are uri xutzalijsaj chik jo'lajujwinaq kamo' (1,100) saqpwaq che uchuch; are uri uchuch xub'ij che: —I Ajwal chuya ni utzil chomal pawi wak'al.

⁴ Are ujachom chik i mer ma Micaía che uchuch, are uri i uchuch le xuya i lajujwinaq (200) saqpwaq le che jun ajch'ayol saqpwaq man ku'an jun tiox che' kuch'uq rij ru' i saq-o'oj. Are xyiji'ik xuya prachoch ma Micaía.

⁵ I ma Micaía o jun k'ijib'al prachoch re kojb'al ki'ij i tiox, xu'an jun efod xaq xu'an jub'an chik tiox; xaq xuch'ik rij jun chke uk'ojol re ku'anb'ej ajsujul sipon chila.

⁶ Che taq i ij le nti jun ajawinel pkiwi aj Israel, rumali chi konojel i winaq kki'ano pacha kkaj ike.

⁷ Chila pa tinimit Belén o jun ala aj naj chi ukwenta utzob'ajil ma Judá; ire le aj Leví te'eq.

⁸ I ala le xel chila Belén, x-e chik kutzukuj jun k'ijib'al ipa kjeqi wi. Are kb'in tzam taq jyub' chi ke utzob'ajil ma Efraín, xupon chi rachoch ma Micaía.

⁹ Are uri ma Micaía xutz'onoj che Ala: —¿Ipa at petnaq wi? —I ala le xub'ij che: —In petnaq chila pa tinimit Belén. Yin in aj Leví, kintijin chutzukuxik jun k'ijib'al ipa kinjeqi wi.

¹⁰ Are uri ma Micaía xub'ij che: Chatjeqel chi wu', man keje ile kin-an chawe chi at wajsujul sipon xaq at pacha taq inqajaw. Yin katintoj ni lajuj saqpwaq jun junab', xwi ta la ile xaq kinya a'u' xaq i awa.

¹¹ I aj Leví le xraj wach xb'ix che rumal ma Micaía, rumali xjeqi chila chi rachoch ma Micaía, i ala le xe'eloq pacha taq jun chke i rak'al.

¹² Are uri ma Micaía le xu'an ajsujul sipon che rumali chi xjeqi chila.

¹³ I ma Micaía le xuch'ob'o chi lik kqaj ni utzil chomal puwi re i Dios man xk'iji jun aj Leví chi rachoch chi xaq ajsujul sipon.