Jueces 16 - Wuj Pa K'ubultzij

A Sansón o pa Gaza

¹ Xuk'ulmaj jun ij i a Sansón x-e pa tinimit Gaza, chila xril wi uwach jun ixoq chi chwach uch'akul kuch'ak wi umer, are uri xok ru' chi rachoch xaq xwar kan jun a'ab' ru'.

² I winaq chi aj pa Gaza are xkinab'ej chi ma Sansón o pkitinimit, xkisutij rij i tinimit xaq xkichajij i okb'al man keje ile mijun winaq kel b'ik xaq mijun kok b'ik. Lik jun ij xkich'ij chuchajixik i okb'al re i tinimit. Are xok a'ab xe'uxlanik man xkich'ob'o chi k'a ksaqirik kkikamsaj.

³ Xwiri a Sansón xa mer a'ab' xwar ru' ixoq, are i or ile xwalijik, are x-ek xub'oq b'i uchija re i tinimit puk'ijib'al, ni'pa i chapawnaq, uto'en ronojel ile xuk'aq b'i rij uqul; xuk'am b'i k'a tzam taq jyub' chi o chwach Hebrón.

A Sansón xaq i al Dalila

⁴ Chrijil chik ronojel ile, a Sansón x-e uk'ux che jun ali chi al Dalila ub'i, chi jeqel chila chwa ta'aj Sorec.

⁵ I aj-atzil ke aj Filistea xe'e chrilik al Dalila xaq xkib'ij che: —Chat'oro a Sansón xaq chatz'onoj che ipa kpe wi i nim laj ucho'ab' le chi lik b'isb'al xaq wach qatikilem che, man kqachapo xaq kqayut'u, man keje ile pqa'ab' yoj kk'iji wi. Yoj chqajujunalil kqaya jo'lajujwinaq kamo' (1,100) saqpwaq chawe tojb'al awe.

⁶ Are uri al Dalila le xub'ij che a Sansón: —Cha'ana jun utzil chwe, chab'ij chwe ipa kpe wi i nim laj acho'ab' le chi lik b'isb'al ¿Wach nawi aximik k-anik man kattiki ti chik chutorik awib'?

⁷ I a Sansón xub'ij che: —We kinyut' ru' wuqub' pach'um raxk'am chi k'a rax, kqaj uri incho'ab' xaq kin-on uri pacha jun to' winaq.

⁸ I kaj-atzil aj Filistea xkiya wuqub' pach'um raxk'am k'ak' che al Dalila chi lik k'ate antalik, are uri i al Dalila le xuyut' a Sansón ru' i raxk'am le.

⁹ I al Dalila le je ruwam chik jub'an achiyab' pa ja, are uri xsik'in chub'ixkil i tziji: ¡Sansón, xe'e aj Filistea chawij! Are uri a Sansón xuraqij i raxk'am pacha taq chij el xu'an che. I aj Filistea xketamaj taj ipa kpe wi ucho'ab'.

¹⁰ Are uri al Dalila xub'ij che a Sansón: ¡Yet xinat'oro! ¡Lik ax b'ari kinat'oro! Xwiri wo'or cha'ana utzil, chab'ij chwe wach nawi aximik chi kattiki ti chik chutorik awib'.

¹¹ Are uri a Sansón xub'ij chik che: —We kiniyut' ru' laso k'ak' chi kojtal taj, kqaj uri incho'ab', xaq kin-on uri pacha jun to' winaq.

¹² Are uri al Dalila xuk'am jub'an laso k'ak', xuyut'b'ej re a Sansón, te'uri xsik'inik: —¡Sansón, xe'e aj Filistea chawij! Xaq je ruwam tan chik jub'an achiyab' pa ja. Are uri a Sansón xuraqij i laso le pacha taq uraqixik chij xu'an che.

¹³ Are uri al Dalila xub'ij chik che a Sansón: —¡Lik k'a kattijin chint'orik! ¡Lik kamayij ti b'ari int'orik! ¡Chab'ij chwe wach ayut'ik kin-ano man kattiki ti chik chutorik awib'! Are uri a Sansón xub'ij che: —Are i ka'ano, rajwaxik ka'an wuqub' pach'um che inwi ru' jun k'ul chi o che i jitz'b'al k'ul, te'uri kach'ik jun estaka pulew puwi i k'ul chi apach'um ru' inwi; keje ile kqaj uri incho'ab' xaq kin-on ni uri pacha jun to' winaq. Are uri al Dalila xuwarsaj ma Sansón xaq xu'an wuqub' pach'um che uwi ru' jun k'ul chi o che i jitz'b'al k'ul.

¹⁴ Te'uri xuch'ik i estaka puwi i k'ul chi upach'um ru' uwi. Are uri xsik'in chub'ixkil: —¡Sansón, xe'e aj Filistea chawij! Xwiri a Sansón xwalijik, xub'oq b'i estaka chi ch'iktal pulew xaq i jitz'b'al k'ul.

¹⁵ Are uri al Dalila xub'ij che a Sansón: ¡T'oronel laj winaq! ¿B'uchak kab'ij chi lik kinawaj? Man are oxmul iri chi xa kinatze'ej, man ab'im ti chwe ipa kpe wi acho'ab'.

¹⁶ I al Dalila lik arewi kutz'onoj che a Sansón, rumali a Sansón lik xrix uk'ux xaq xub'ij chi lik kraj kkamik;

¹⁷ K'isonik i a Sansón le xulap che al Dalila ipa kpe wi ucho'ab': —Mijun uk'upim inwi, man k'amaja ne kinalaxik, injachtal chik pu'ab' i Dios man yin in nazareo. We xk'upix inwi lik kqaj uri incho'ab' xaq kin-on uri pacha jun to' winaq.

¹⁸ I al Dalila are xunab'ej chi ma Sansón xub'ij i saq laj tzij che, xutaq ub'ixkil chke i kaj-atzil aj Filistea: —Wo'or, i a Sansón lik xub'ij i saq laj tzij chwe ipa petnaq wi ucho'ab', rumali chixpetoq. Are uri aj Filistea le xe'e chrilik al Dalila xaq su' xkik'am b'i mer chi kisujum che.

¹⁹ Are uri al Dalila le, xukotz'b'a ujolom a Sansón chwach ra', xuwarsaj, te'uri xusik'ij jun achi man kuk'upij b'i uwi chi antal wuqub' pach'um che, are uri ire xujeq ub'ixkil k'ax che.

²⁰ Xaq xsik'in chub'ixkil che: ¡Sansón, xe'e aj Filistea chawij! Are uri ma Sansón le xk'un saq chwach, xuch'ob' ire chi k-anmaj chik pacha ax k-on wi, xwiri ire reta'am taj chi xo'tax rumal i Ajwal.

²¹ Are uri aj Filistea xkichapo xaq xkesaj b'i ub'a'wach chekeb', xaq xkik'am b'i pa tinimit Gaza, chila xkiyut' wi ru' karena anch'ich' xaq xkitaq chuchaqik tzi ru' chaqb'al re, chila prexil.

²² Xwiri i uwi xujeq chik k'iyik.

Ukamik a Sansón

²³ Are uri i kaj-atzil aj Filistea xkimol kib' chu'anik jun nima'ij rumal uchapik a Sansón xaq chuya'ik kisipon chwach ki-dios chi Dagón ub'i, xaq xkib'ixaj i b'ixi: “I qa-dios xujach a Sansón pqa'ab' chi ajch'oj chqij.”

²⁴ I winaq are xkil uwach a Sansón xkib'ixaj xaq xkikoj u'ij ki-dios ru' i b'ixi: I qa-dios xujach ma Sansón pqa'ab' chi ajch'oj chqij man ire xuk'at qatikon xaq xeukamsaj k'iyal qawinaq.

²⁵ Lik kekikotik rumali xkib'ij: Chik'ama li ma Sansón chqawach man kojetz'an pich' ru'. Rumali chi xkesaj li a Sansón prexil, lik xe'etz'an ru' xaq xkitak'b'a chuxol keb' aqan.

²⁶ Are uri a Sansón le xub'ij che i ala chi ok'awnaq b'i che u'ab': —Chinaya chila ipa o wi aqan chi upaqem ronojel i rachoch i dios Dagón man kwaj kin-ay b'a wib' che.

²⁷ Konojel kaj-atzil aj Filistea je o chila pa rachoch i dios, lik nojnaq che achiyab' che ixoqib', xaq kolo je lajujwinaq wuqmo' (3,000) winaq je o che i kale ja, chi ketijin chrilik wach etz'enem kki'an ru' a Sansón.

²⁸ Are uri a Sansón ko xub'ij i tziji che i Ajwal: “Ajwal kintz'onoj utzil chawe chi chink'un chak'ux stane julaj chik, chaya incho'ab' man kin-an ni uk'exel chke aj Filistea man xkesaj inb'a'wach chekeb'.”

²⁹ Te'uri xumalalej i keb' aqan chi upaqem ronojel i rachoch i dios Dagón, are xuriqo xeu'ayb'a u'ab' chwach,

³⁰ are uri xsik'in chub'ixkil: ¡Chekam ni konojel aj Filistea wu'! Te'uri xutakpuj b'i i aqan ru' ronojel ucho'ab', i rachoch i dios le xwulij li pkiwi konojel i kaj-atzil aj Filistea xaq pkiwi konojel i winaq chi je o chila. Lik je k'i xekam junam ru' a Sansón, chwach ukamsam che ronojel uk'aslemal.

³¹ Chrijil chik ile, xek'un konojel i ratz ucha' xaq konojel i rachalal a Sansón, xkik'am b'i uch'akul, xkimuq chila chuxol i keb' tinimit: Zora xaq i Estaol, chila pa jul ipa muqtal wi ma Manoa chi uqajaw. A Sansón juwinaq junab' xk'iji pa kaj-atzil aj Israel.