Jueces 15 - Wuj Pa K'ubultzij

¹ Are xik'aw keb' oxib' ik' xaq are ktijin umolik i trigo, are uri a Sansón le x-e chrilik rixoqil, rok'am b'i jun ral uchab'at. Are xuponik, xub'ij: —Kinok b'i pa ja chrilik wixoqil. Xwiri i uqajaw ali xuya ti che a Sansón chi kok b'i ru' umi'al pa ja.

² Xaq xub'ij che: —Xinch'ob' yin chi kawaj ti chik inmi'al le, rumali xinya che jun chke i alab'om chi xek'un awu' pa nima'ij. Xwiri i cha'xel lik chom na chwach i atz, chak'ama ire le puk'exel i atz.

³ Xwiri a Sansón xub'ij che: —Wo'or inmak ti yin wach taq i jalajuj taq k'ax chi kin-an chke aj Filistea.

⁴ Are uri x-e chkichapik jo'lajujwinaq (300) ixim utiw, te'uri xuxim kije pa taq kakab' xaq xuxim b'i antorcha chuxol i kije le.

⁵ Are uri xunak' a' che i antorcha, te'uri xero'taj b'i pa taq kitikon aj Filistea. Keje uri ile chi xk'at b'i ronojel ki-trigo aj Filistea chi kit'ub'am chik uchi' xaq ronojel ni'pa i k'amaja kkik'atzij, xaq xk'at ne b'i uva xaq i olivo.

⁶ Are uri konojel aj Filistea xe'ok chuch'ob'ik raqan pachin x-anaw i k'atanik le. Are xketamaj chi are a Sansón x-anawik, anb'al uk'exel i utz taj chi x-ani che ire rumal i uqajaw i ali, chi xuya b'i umi'al che jun chik ala. Are uri konojel aj Filistea xe'e chunak'ik a' che i ali xaq che uqajaw.

⁷ Are uri a Sansón xub'ij chke: —Rumal ni'pa i xi'ano le, ¡Lik kinsaqij chiwe chi lik kinuxlan taj k'a kitoj ni chwe iwonojel!

⁸ Rumali chi lik x-e chkij ru' jun nim laj roywal, lik je k'i xeukamsaj. Te'uri x-e pa jeqelem pa jun pek chi o chila pa nimaq taq ab'aj che i k'ijib'al Etam.

Ma Sansón xaq i ukakate' i axna

⁹ Are uri xe'el b'i aj Filistea, xe'uxlan pa Judá xaq xkikichersaj b'i kib', xupon kichi' k'a Lehi.

¹⁰ Are uri konojel i winaq aj Judá xkitz'onoj chke aj Filistea: —¿B'uchak xixk'un chu'anik ch'oj qu' yoj? I aj Filistea xkib'ij: —Yoj xojk'un chutzukuxik xaq chuchapik a Sansón man kutoj ronojel ni'pa i x-on chqe.

¹¹ I aj Judá are xkita ile, xkitaq b'i lajujwinaq wuqmo' (3,000) achiyab' chutzukuxik a Sansón pa pek chi o chila pa nimaq taq ab'aj che i k'ijib'al Etam, are xeuponik, xkib'ij che: —¿Xatab'a aweta'am taj chi aj Filistea lik o kicho'ab' chqawach yoj? ¿B'uchak chi xojamin chupam i ch'oji? Are uri a Sansón xub'ij chke: —Pacha xki'an ike chwe yin xaq keje ile xin-an yin chke.

¹² Are uri aj Judá xkib'ij che: —Yoj xojk'un chachapik man katqajach pki'ab' aj Filistea. Are uri a Sansón xub'ij chke: —Lik chib'ij pub'i i Ajwal we kinikamsaj ti yix.

¹³ Are uri ike xkib'ij che: —Saq laj tzij katqakamsaj taj, xwi kqaj katqachapo xaq katqajach pki'ab' aj Filistea. Are uri i aj Judá xkixim ru' keb' laso k'ak', te'uri xkesaj li ipa ruwam wi rib'.

¹⁴ Are xeupon chila pa tinimit Lehi, are uri aj Filistea kesik'in rumal kikikotemal. Xwiri i utewal i Dios xuya ucho'ab' a Sansón, are uri xuraqij b'i i laso chi yut'b'em uteleb' xaq u'ab', i laso le pacha taq xa el laj taq chij.

¹⁵ Chrijil chik ile, i a Sansón xuk'am pan jun ukakate' axna chila chi k'amaja kchaqijik, ru' ile xeukamsaj lajujwinaq kamo' (1,000) aj Filistea.

¹⁶ Are uri xub'ij a Sansón: Ru' ukakate' i axna xin-an keb' t'ub'aj chke achiyab', ru' ukakate' i axna xeinkamsaj lajujwinaq kamo' (1,000) achiyab'.

¹⁷ Te'uri xuk'aq b'i ukakate' i axna, rumali i k'ijib'al le xkanaj pub'i Ramat-lehi.

¹⁸ Chrijil chik ile a Sansón xpe jun nim laj uk'atik, rumali xub'ij che i Ajwal: “¿B'uchak chi xaya i nim laj ch'akanik chwe, xwiri wo'or kaya chwe chi kinkam rumal k'atik rumal ile kintzaq ni uri pki'ab' ajmak laj taq winaq?”

¹⁹ Are uri i Dios xuwor jun jul chila pa k'ijib'al Lehi, are uri xel li ya chupam i jul le, te'uri a Sansón xutu' uya', xk'un chik saq chwach kuna ire. Rumali i ralaxb'al ya le chi o chila Lehi xkiya pub'i En-hacore chi k'a are kb'ix che wo'or.

²⁰ A Sansón xk'iji juwinaq junab' pa kaj-atzil aj Israel, are je o aj Filistea puwi i ulew le.