Jueces 12 - Wuj Pa K'ubultzij

Ma Jefté xaq i je utzob'ajil ma Efraín

¹ I achiyab' chi je utzob'ajil ma Efraín xkimol kib' xaq xki'axuj i raqana Jordán pusuk' i tinimit Zafón, xkib'ij che ma Jefté: —¿B'uchak chi xab'ij ti chqe, koj-e awu' are xat-e chu'anik ch'oj ku' aj Amón? ¡Wo'or katqamin chupam awachoch, te'uri kqanak' a' che, keje ile katk'at b'i yet ru'!

² Ma Jefté xub'ij chke: —Inwinaq xaq i yin xqa'an ch'oj ku' aj Amón, are uri yin xixinsik'ij xwiri yix xixk'un ti chqato'ik.

³ Are xwilo chi yix xixk'un ti chqato'ik, are uri yin lik xinya ink'aslemal pa kamik man xin-e pa ch'oj chkij aj Amón, xwiri i Ajwal xuya i ch'akanik chwe. ¿B'uchak uri wo'or xixk'un chu'anik ch'oj wu' yin?

⁴ Are uri ma Jefté xumol kichi' konojel achiyab' aj Galaad man xki'an ch'oj chkij utzob'ajil ma Efraín xaq xetiki chkich'akik. I uwinaq ma Efraín kkib'ij chi aj Galaad chi je jeqel chkixol utzob'ajil ma Efraín xaq utzob'aj ma Manasés ike le lik je uwinaq te'eq ma Efraín xwiri xeko'taj kanoq.

⁵ Are uri i winaq chi aj Galaad xkimaj kan i axb'al re i raqana Jordán chke utzob'ajil ma Efraín. Are kupon jun chke utzob'ajil ma Efraín chi anmajnaq b'ik, kub'ij chke chi ku'axuj i raqana Jordán, are uri aj Galaad kkitz'onoj che we ukwenta utzob'ajil ma Efraín. I achi le we kub'ij chi utzob'ajil taj,

⁶ kkitz'onoj che chi kub'ij i tziji: “Shibolet”, xwiri i achi le we “Sibolet” xub'ij, man ktiki ti chub'ixkil pacha usuk', kkichap uri xaq kkikamsaj kan chila chi taq axb'al re i raqana Jordán. Che i ij le xekam jo'mo' jo'chiy (42,000) achiyab' chke utzob'ajil ma Efraín.

⁷ I ma Jefté waqib' junab' xk'iji pa kaj-atzil aj Israel. Are xkamik xkimuq chila pa Galaad, chila che i tinimit ipa xalax wi.

⁸ Chrijil chik ma Jefté, xkanaj kan ma Ibzán pa kaj-atzil aj Israel, ire le aj Belén,

⁹ chi xek'iji lajuj juwinaq (30) rak'al alab'om xaq je lajuj juwinaq (30) altom, konojel rak'al le xeuk'ulb'a ku' i winaq chi je aj chila taj. I ma Ibzán le wuqub' junab' xk'iji pa kaj-atzil aj Israel,

¹⁰ Are xkam ma Ibzán le xkimuq chila Belén.

¹¹ Chrijil chik ma Ibzán le are ma Elón xkanaj pa kaj-atzil aj Israel lajuj junab', i ma Elón le kikwenta utzob'ajil ma Zabulón.

¹² Are xkam ma Elón xkimuq chila Ajalón, chi o pkulew utzob'ajil.

¹³ Chrijil chik ma Elón le are ma Abdón, chi uk'ojol ma Hilel, chi aj Piratón, xkanaj pa kaj-atzil aj Israel,

¹⁴ wajxaqib' junab'. I ma Abdón le xek'iji kawinaq (40) uk'ojol xaq je lajuj juwinaq (30) ri umam, konojel ike le lik ke'an chrij axna.

¹⁵ Are xkam ma Abdón le xkimuq chila Piratón chi o pkulew utzob'ajil ma Efraín, chila chwi taq jyub' ku' aj Amalec.