Juan 18 - Wuj Pa K'ubultzij

Uchapik i Jesús

¹ I Jesús are xutzin chub'ixkil ile, are uri xe'e junam ku' utijoxelab' ch'aqa ya re i raqana Cedrón. Chila o jun chom laj k'ijib'al, pa tiktal wi tikon che'.

² Xaq i ma Judas chi xa keb' upalaj, man kujach i Jesús chke i ajch'oj chrij, ire reta'am i k'ijib'al le, man i Jesús lik k'iyalmul xkimol kib' ku' utijoxelab' chila.

³ Are uri ma Judas xeupon junam ku' jutzob'aj achiyab' chi je yij che i ch'oj, xaq jujun ajchajinelab' re i rachoch i Dios, chi je taqtal b'i kumal i kaj-atzil i rajpatan i Dios, xaq kumal aj fariseo. Ike le lik kiyijb'am b'i kib' che i ch'oj, kok'am b'i kich'ich', kantil xaq i antorcha.

⁴ Xwiri i Jesús reta'am chik ronojel wach taq kuk'ulmaj, are uri x-e pan chkik'ulaxik xaq xutz'onoj chke: —¿Pachin kitzukuj?

⁵ Ike xkila' uwach che: —Kqatzukuj i Jesús chi aj Nazaret. Are uri i Jesús xub'ij chke: —I kib'ij le “are Yin”. Ku' i winaq le o i ma Judas chi xa keb' upalaj, man kujach i Jesús pki'ab' ajch'oj chrij.

⁶ I Jesús are xub'ij chke: “Yin iri” chi kinitzukuj, are uri ike xetzalij chkij xaq xetzaq pulew.

⁷ Are uri i Jesús xutz'onoj chik chke: —¿Pachin taq mer kitzukuj? Ike xkib'ij chik: —Kqatzukuj i Jesús, chi aj Nazaret —xecha.

⁸ I Jesús xub'ij chik chke: —Ya xinb'ij chiwe chi in are Yin. We yin kinitzukuj, chiya b'i chke i jub'an le ke'ek.

⁹ Ile xuk'ulmaj man k-antaj na pacha ub'im kan i Jesús: “Inqajaw, konojel ni'pa i xeaya chwe, lik mijun chke xsachik.”

¹⁰ Are uri i ma Simón Pedro xresaj li uch'ich' chi rok'am; lik xusok b'i uxikin wiqab'im jun achi chi ma Malco ub'i, chi rajchak i atz laj rajpatan i Dios.

¹¹ Are uri i Jesús xub'ij che ma Pedro: —Chak'olo ach'ich' prachoch. Inqajaw we kuya i k'a laj ya le chwe re kintu'u ¿Xatab'a kintu' taj? —Xcha.

Uk'amik b'i i Jesús chwach i ma Anás

¹² I jutzob'aj achiyab' chi je yij che i ch'oj aj Roma, junam ru' i atz laj kaj-atzil chi rok'am utzam chke xaq i aj Judío chi je ajchajal re i rachoch i Dios, xkichap i Jesús xaq xkiximo.

¹³ Nab'e xkik'am b'i chi rachoch ma Anás, man are uqajaw uji' ma Caifás chi are atz laj rajpatan i Dios che i junab' le.

¹⁴ I ma Caifás le lik are ire xb'iw chke aj Judío, chi lik utz chke ike we xa jun achi kkamsax ni pkik'exel konojel i winaq.

I ma Pedro kub'ij chi reta'am ti uwach i Jesús

¹⁵ I ma Simón Pedro xaq i jun chik tijoxel xeterej b'i chrij i Jesús. O jun chke i tijoxelab' le etamam uwach rumal i atz laj rajpatan i Dios; rumali chi xok b'i ru' i Jesús pa ja.

¹⁶ Xwiri i ma Pedro xkanaj kan chisaq chwach uchija. Rumali i tijoxel chi etamam uwach rumal i atz laj rajpatan i Dios, xel chub'i chisaq, xutz'onoj jun utzil che ali chi chajal re uchija, chi kuya che ma Pedro kok b'ik; are uri xok b'i ma Pedro pa ja.

¹⁷ Xwiri i ali le xutz'onoj che ma Pedro: —Chata pe', ¿Yet ti b'awa at jun chke utijoxelab' i achi le? Are uri ma Pedro xula' uwach che: —Yin taj.

¹⁸ Che i or le lik joron i tew, rumali i ajchakib' prachoch i Dios xaq i ajchajinelab' kinuk'um ki'a', rumali chi konojel je tak'al chi a' man kkimi'saj kib'. Xaq i ma Pedro xetak'al chila chkixol chumi'saxik rib'.

I atz laj ajsujul sipon ma Anás kutz'onb'ej i Jesús

¹⁹ Are uri i atz laj rajpatan i Dios, xu'an i tz'onb'enik che i Jesús chkij utijoxelab' xaq chrij i uk'utunik Ire.

²⁰ I Jesús xub'ij che: —Yin xinlapan chkiwach konojel i winaq; arewi xin-an i k'utuniki chke pa taq ja re molb'al ib' ke aj judío xaq prachoch i Dios chila ipa kkimol wi kib' konojel aj Judío; lik nti jun k'utunik in-anom ani'al.

²¹ ¿B'uchak katz'onoj chwe yin? Chatz'onoj chke i winaq chi je tawnaq intzij; are ike chkib'ij wach inlapom chke; man ike keta'am wach inb'im Yin chke —xcha.

²² Are xb'itaj ile rumal i Jesús, are uri jun chke i ajchajinelab' re i rachoch i Dios xuxa' jun ab' che upalaj i Jesús xaq xub'ij che: —¿Keje ula'ik uwach ile ka'an che i atz laj rajpatan i Dios?

²³ I Jesús xula' uwach che i chajinel re i rachoch i Dios: —We o jun b'iroxik chi utz taj xinb'ij, chab'iji chwe wach i utz taj le; xwiri we utz i xinb'ij, ¿B'uchak uri chi xinach'ayo? —Xcha.

²⁴ Are uri i mam Anás xuyut' b'i i Jesús, te'uri xutaq b'i che ma Caifás, chi atz laj rajpatan i Dios.

I ma Pedro xruwaj chik uwach i Jesús

²⁵ Tz'aqat i ma Pedro k'a tak'al b'i chila chi a' chumi'saxik rib', are uri xtz'onox chik che: —¿Yet at jun chke utijoxelab' i achi le? Are uri ma Pedro xruwaj chik uwach, xub'ij: —Yin taj.

²⁶ Chrijil chik ile jun chke i rajchak i atz laj rajpatan i Dios, chi rachalal i achi chi xelsax b'i uxikin che rumal i ma Pedro, xub'ij che: —¿Xatwil ti b'ari ru' chila pa tikonb'al?

²⁷ Xwiri i ma Pedro xruwaj chik uwach; are uri lik che i or le, xch'aw i teren.

I Jesús xk'am b'i chwach ma Pilato

²⁸ Xkesaj b'i i Jesús chi rachoch ma Caifás, xkik'am b'i chila pa nim laj ja ipa ku'at wi tzij i ma Pilato chi aj Roma. Xwiri lik ktijin chik usaqirik rumali i aj Judío xe'ok ti chik pa ja ipa ku'at wi i tzij ma Pilato, man we ke'okik, ketz'itaj uri rumal i ch'am taj xaq kkiqel uri i atb'al tzij, lik kmajaw ti chik uri chke chi kkitij i wa'im re kinima'ij Pascua.

²⁹ Rumali xel li ma Pilato chisaq, chub'ixkil chke: —¿Wach taq umak i achi le kikojo?

³⁰ I aj Judío xkib'ij: —Wetene nti umak u'anom, wach taq uchak uri chqe chi kqak'am li chawach —xecha.

³¹ I ma Pilato xub'ij chke: —Chik'ama b'i yix; chi'ata tzij puwi pacha usuk' i'atb'al tzij yix. Xwiri i aj Judío xkila' uwach che: —Yoj chi oj aj Judío nti pqa'ab' ukamsaxik jun winaq.

³² Keje uri ile chi lik x-antaj na pacha xub'ij i Jesús chrij ukamik.

³³ Are uri ma Pilato xok chub'i pa nim laj ja ipa ku'at wi i tzij, xusik'ij i Jesús ru', xutz'onoj che: —¿Yet at Ajawinel ke aj Judío?

³⁴ I Jesús xub'ij che: —¿Yet xach'ob' i tzij le chi xatz'onoj chwe o xa jub'an chik xkib'ij chawe?

³⁵ I ma Pilato xula' uwach che i Jesús: —¿In aj Judío taq wa yin? I winaq re atinimit xaq i kaj-atzil i rajpatan i Dios, are ike le xatkiya pin-ab'. ¿Wach taq wa amak xa'ano?

³⁶ I Jesús xub'ij che: —Wajawinik re ti uwach i jyub' ta'aj. Wetene aj waral lik je o te'eq winaqi kech'ojonik man keje ile kin-e ti pki'ab' aj Judío. Xwiri wajawinik re ti uwach i jyub' ta'aj.

³⁷ Are uri ma Pilato xutz'onoj che i Jesús: —¿Qatzij Yet xab'ij chi at ajawinel? I Jesús xula' uwach che: —Qatzij i xab'ij le, Yin in ajawinel. Yin xinalax chi xaq xink'un chi chwach ulewi chusaqixik i saq laj tzij. Konojel i winaq chi je o che i saq laj tzij, kkita intzij.

³⁸ Are uri ma Pilato xub'ij chik che i Jesús: —¿Wach i saq laj tzij le? —Xcha. Are xutzin chik u'anik i tz'onb'enik le che i Jesús, i ma Pilato xel chali ukamul chkiwach aj Judío, xub'ij chke: —Yin nti jun umak achi ri kinriqo.

U'atik tzij puwi i Jesús man kkamsaxik

³⁹ Xwiri yix uk'amom chik rib' chiwe chi are kk'un i nima'ij re i Pascua yin kwo'taj b'i jun chke ajprexil. ¿Kiwaj chi kwo'taj b'i Ajawinel ke aj Judío?

⁴⁰ Are uri konojel i winaq xesik'in chik chub'ixkil: —¡Ire le mawo'taj b'ik! Are ¡Chawo'taj b'i ma Barrabás! Xecha. I ma Barrabás le lik jun ili'om.