Juan 12 - Wuj Pa K'ubultzij

Jun ixoq xukoj kunb'al muy puwi i Jesús

¹ Waqib' ij chuxe'el i nima'ij Pascua, i Jesús x-e pa Betania ipa jeqel wi ma Lázaro chi xuwalijsaj che i kamik.

² Are xupon i Jesús, xki'an jun nim laj wa'im kojb'al u'ij Ire. Chila chi mexa le o ma Lázaro xaq i jub'an chik achiyab' chi junam xkitij wa ru' i Jesús; are ati Marta xeutzuqu.

³ I ati Mariy rok'am jun b'axo kunb'al chi lik muy xaq lik paqal rajil, elsam che jun saqil es nardo ub'i. Xukoj i kunb'al muy le che i raqan i Jesús, te'uri xuchaqijsaj ru' uwi. I kunb'al le lik x-e ronojel umuyal pa ja.

⁴ Are uri ma Judas Iscariote, chi jun chke utijoxelab' i Jesús, chi xaq are i jun chi kujach ni pki'ab' ajch'oj chrij, xub'ij:

⁵ —¿B'uchak chi xk'ayix ti kunb'al le tob'al ke i nib'a'ib'; man ile lik paqal rajil, i rajil ile keje pacha rajil jun ajchak re jun junab'? —Keje ile xub'ij ma Judas.

⁶ Xwiri ma Judas, rumal ti k'axnab'al uk'ux chke i nib'a'ib' xub'ij i tzij le, man ire xa are jun ili'om, ire are ajk'olol pwaq chkij i rachi'il; lik o krel-aj che i pwaq chi uk'olom.

⁷ I Jesús xub'ij che ma Judas: —Mayaj i ixoqi man ire ax uk'olom wi i kunb'al muy le re kub'akb'ej b'i che inch'akul re inmuqb'al are kuriq i ij.

⁸ I nib'a'ib' arewi je o iwu', xwiri Yin, arewi taj in o iwu' —xcha i Jesús.

Uyijb'axik ukamsaxik i ma Lázaro

⁹ Lik je k'i chke aj Judío xkita utzijol chi i Jesús o chila pa tinimit Betania, rumali xe'e chrilik xaq chrilik i ma Lázaro chi xwalijsax chkixol i kamnaq rumal i Jesús.

¹⁰ Are uri i kaj-atzil i rajpatan i Dios xkich'ob' ukamsaxik i ma Lázaro.

¹¹ Man xkich'ob'o chi xa rumal ire je k'i aj Judío xkikoj i Jesús; rumali lik ketijin chujek'ik kib' ku' ike.

Rokik i Jesús pa tinimit Jerusalén

¹² Lik je k'i i winaq xeupon pa Jerusalén rumal i nima'ij Pascua. Chukab' ij i winaq xkita utzijol chi i Jesús kupon chila che i tinimit Jerusalén.

¹³ Rumali xkitzukuj uxaq palma xaq xe'e chuk'ulaxik i Jesús. Are ketijin che i b'e, xesik'in chub'ixkil i tziji: —¡Chojato! ¡Lik nim u'ij i jun chi kk'un pub'i i Ajwal! Xaq ¡Lik nim u'ij i Ajawinel ke aj Judío! —Keje ile xesik'in chub'ixkil.

¹⁴ I Jesús xuriq jun ral axna i x-an b'i chrij, xe'eloq pacha tz'ib'tal chupam uwuj i Dios:

¹⁵ Maxij awib', nim laj tinimit Jerusalén; chawila pe', i awajawinel xk'unik, annaq chrij jun ral axna.

¹⁶ I utijoxelab' i Jesús lik xkita ti ub'e i tzij le, xwiri chrijil chik ile are xwalij b'i chikaj pa chom laj uk'ijib'al, are uri xk'un chkik'ux chi ronojel ni'pa xuk'ulmaj, lik keje ile tz'ib'tal chupam uwuj i Dios.

¹⁷ I winaq chi je o chila ru' i Jesús are xuwalijsaj ma Lázaro chkixol i kamnaq, kkimayij ti ulapik ronojel ni'pa i nimaq taq il xkilo chi xu'an i Jesús.

¹⁸ Rumali chi konojel i winaq le xe'e chuk'ulaxik i Jesús, chi xu'an i nimaq taq il.

¹⁹ Xwiri aj fariseo xkib'ij chkiwach: —Xiwil ile ni'pa i winaq je teren chrij, lik nti ke'el wi wach kqa'an yoj —xecha.

Utzukuxik i Jesús kumal i jub'an aj Grecia

²⁰ Chkixol i winaq chi xeupon pa Jerusalén chukojik u'ij i Dios che i nima'ij Pascua je o jujun aj Grecia.

²¹ I aj Grecia le xetejeb' pan ru' ma Felipe chi aj pa tinimit Betsaida, chi ukwenta i Galilea, xkitz'onoj utzil che; xkib'ij: —Nim laj winaq, kqaj kqil uwach i Jesús —xecha.

²² I ma Felipe x-e chub'ixkil che ma Andrés, are uri chekeb' xe'e chub'ixkil che i Jesús.

²³ Are uri i Jesús xub'ij chke: —Xuriq i ij chi k-aljinsax u'ij pacha Winaq chi Xolalaxoq chwach Ulew.

²⁴ Lik qatzij pacha ku'an i ija re i trigo are ktzaq pulew kkam taj, lik utukel kkanajik, xwiri we kkamik, kuya k'iyal uwach.

²⁵ Jun winaq chi k'ax kuna uk'aslemal waral chwach i jyub' ta'aj xa kusach uwach uk'aslemal saqil. Xwiri jun winaq chi k'ax ti kuna uk'aslemal waral chwach i jyub' ta'aj, lik kuk'uxlaj uri uk'aslemal saqil chi nti uk'isik.

²⁶ Jun we kraj ku'an upatan chwij chterej ni chwij, man xaipa in o wi yin xaq chila uri kk'iji wi i wajchak wu'; jun we ku'an upatan chwij, koksax ni uri u'ij rumal Inqajaw —xcha i Jesús.

I Jesús xub'ij chi kkam na

²⁷ Wo'ori lik kinna jun nim laj k'achirik pink'ux. ¿Wach i kinb'ij wo'or? ¿Xatab'a kinb'ij: “Ta, chinawesaj chwach i nim laj k'achiriki chi in o wi” ¡Xwiri rumal ne iri xink'un waral chwach i jyub' ta'aj!

²⁸ —Ta, chanimarsaj u'ij ab'i —xcha. Are uri xtataj jun ch'awb'al chikaj chi xub'ij: “In nimarsam chik xwiri kinnimarsaj chik ukamul.” Keje ile xub'ij i ch'awb'al chikaj.

²⁹ I winaq chi je o chila are xkita i ch'awb'al le xkib'ij: —Ile jun ray xch'awik; xwiri o jub'an chik xkib'ij: Ile are jun ángel xch'aw li che chikaj.

³⁰ Are uri i Jesús xub'ij chke: —Wumal ti Yin xtataj i ch'awb'al le, lik iwumal yix.

³¹ Xuriq i ij chi k-at tzij puwi i jyub' ta'aj; xaq i jun chi uya'om rib' puwi lik kelsax nu b'ik.

³² Xwiri are kintz'aw chwach i krus kin-an ni chke konojel i winaq chi kekojon chwe —xcha i Jesús.

³³ Ru' i tzij le xub'ij wach taq i kamik kik'aw wi.

³⁴ Are uri i winaq xkib'ij che: —Yoj rumal i atb'al tzij, qeta'am chi i Cristo k-e ij saq chrij uk'aslemal. ¿Wach u'ankil uri ile kab'ij yet chi pacha i Winaq chi Xolalaxoq chwach Ulew kyaktaj nu b'ik? ¿Pachin taq uri i pacha Winaq le chi Xolalaxoq chwach Ulew? —Xecha.

³⁵ I Jesús xub'ij chke: —Wo'or k'a o i saq chixol, xwiri naj ti chik o iwu', chixb'inoq tz'aqat k'a o i saq iwu', man kixk'achir taj are kk'un i equm, man pachin jun kb'in pa equm reta'am ti uri ipa k-e wi.

³⁶ Chixkojon che i saq le tz'aqat k'a o iwu'; man keje ile kixu'on ni rak'al i saq. Are xb'itaj ile rumal i Jesús, xel chkixol, xruwaj rib' chkiwach.

B'uchak i aj Judío kkikoj ti i Jesús

³⁷ Tupu lik k'i nimaq taq il xu'an i Jesús chkiwach aj Judío, xwiri ike lik xkikoj taj.

³⁸ Man lik k-antaj na pacha utz'ib'am kan i profeta chi mam Isaías, chi xub'ij: Ajwal, ¿Pachin nawi kojonnaq che i qatzij chi qab'im? ¿Pachin nawi che xuk'ut wi i nim laj ucho'ab' i Ajwal? —Xcha.

³⁹ I aj Judío le lik xkikoj taj; man xaq utz'ib'am kan mam Isaías:

⁴⁰ I Dios xu'an mawach chke xaq xu'an che i kinojb'al chi kch'ob'on ti chik; man keje ile kkil ti ub'e xaq kkita ti ub'e, man keje ile ketzalij ti chaloq wu' xaq yin keinkunaj taj.

⁴¹ I mam Isaías xub'ij i tzij le man xril u'ij uchomal i Jesús, rumali lik k'iyal taq lapanik xu'an chrij.

⁴² Lik je k'i chke aj Judío xaq je k'i chke i nimaq kipatan xkikoj utzij i Jesús, xwiri ani'al chkiwach aj fariseo man kkixij kib' chke; man keje ile ke'elsax tu b'i pa ja re i molb'al ib' ke i judío.

⁴³ Man chkiwach ike lik utz chi koksax ki'ij kumal i winaq, chwach we koksax ki'ij rumal i Dios.

Utzij i Jesús ku'at ni tzij pkiwi i winaq

⁴⁴ I Jesús ko xch'awik, xub'ij: Pachin jun kinukojo xwi ti Yin uri kinukojo xaq kukoj uri u'ij Inqajaw chi in taqawnaq loq.

⁴⁵ I jun chi kril inwach Yin ke'el uri chi xril uwach i Jun chi xintaqaw loq.

⁴⁶ Yin in saq chi in k'unnaq chwach i jyub' ta'aj, pachin jun kinukojo lik kk'iji ti uri pa equm.

⁴⁷ Xwiri pachin jun kuta intzij xaq kkojon ti che, Yin ti uri kin-at tzij puwi, man Yin in k'unnaq ti chu'atik tzij pkiwi i winaq, Yin in k'unnaq are elsab'al ke i winaq chisaq.

⁴⁸ Pachin jun kuk'aq b'i in-ij xaq kukoj ti intzij o kyaw tojpen uri puwi: Are i tzij chi xuta, are ile k-ataw tzij puwi pa k'isb'al ij.

⁴⁹ Man yin nti tzij kinb'ij chi to' kinch'ob' taq Yin, are i Ta chi in taqawnaq loq are b'iwnaq chwe wach kinb'ij xaq wach kink'utu.

⁵⁰ Yin lik weta'am chi i tzij xinutaq li chub'ixkil, pachin i xukojo kuriq uri uk'aslemal chi kk'is ti chik. Ni'pa i kinb'ij is are kinb'ij pacha xinutaq li i Ta chub'ixkil. Xcha i Jesús.