Juan 11 - Wuj Pa K'ubultzij

Ukamik ma Lázaro

¹ O jun achi iwab', ire le ma Lázaro ub'i chi alaxel chila pa tinimit Betania xaq junam ku' i ranab' ati Mariy xaq ati Marta.

² I ati Mariy le, chi ranab' ma Lázaro chi iwab', are ire xkojow kunb'al muy che i raqan i Ajwal Jesús xaq xuchaqijsaj ru' uwi.

³ Keje uri ile, chekeb' ixoqib' le xkitaq ub'ixkil che i Jesús: —Ajwal, i awamiy chi lik k'ax kana'o lik iwab'.

⁴ I Jesús are xuta ile, xub'ij: —I yob'il le kamsanel taj, ile xa are ilb'al re u'ij uchomal i Dios xaq keje ile i Uk'ojol i Dios koksax ni u'ij.

⁵ Tupu i Jesús lik k'ax keuna oxib' alk'uwalxelab' le chi ati Marta, ati Mariy xaq ma Lázaro,

⁶ are xb'ix che chi iwab' ma Lázaro, ire k'a xkanaj keb' ij chila ipa o wi.

⁷ Are uri, xub'ij chke utijoxelab': —Jo tan chik pa tinimit Judea.

⁸ Are uri i utijoxelab' xkib'ij che: —Tijonel, k'amaja naj ile chi aj Judío xkaj akamsaxik ru' ab'aj ¿Wo'or kawaj tan chik enam chila? —Xecha che.

⁹ I Jesús xub'ij chke: —¿Nti b'awa kab'lajuj or che i ij? Jun winaq we kb'in pa'ij kutakij ti uri i raqan man k'a saq uwach i jyub' ta'aj.

¹⁰ Xwiri jun winaq we kb'in cha'ab' kutakij uri raqan man equm.

¹¹ Xwi ti la ile, xaq xub'ij chik: —I qamiy chi ma Lázaro kwarik; rumali kin-e chuk'astaxik.

¹² Are uri i utijoxelab' xkib'ij che: —Ajwal, we xa kwarik k'utb'al re uri chi kutzirik —xecha.

¹³ Xwiri, are xraj ub'ixkil i Jesús, chi ma Lázaro kamnaq chik. I utijoxelab' xkich'ob' ike chi xa jik laj waram che man keje ile xub'ij.

¹⁴ Are uri i Jesús xusaqij ub'ixkil i tzij le chke: —Chi ma Lázaro kamnaq chik.

¹⁵ Kinkikotik man chila ti in o wi are xkamik, man keje ile utz ke'el chiwe yix man kikoj na wach i kin-ano. Xwiri jo' chrilik —xcha.

¹⁶ Are uri ma Tomás, chi ma Yox kb'ix che, xub'ij chke i jub'an chik tijoxelab': —Xaq jo yoj, man keje ile, kojkam junam ru' ire —xcha.

I Jesús are Ire keuwalijsaj i kamnaq xaq are Ire kyaw i k'aslemal

¹⁷ Are xupon i Jesús chila pa Betania, o chik kajib' ij che umuqik ma Lázaro.

¹⁸ I Betania le o naqaj che i Jerusalén kolo jun lew unajtil kixol.

¹⁹ Lik je k'i chke aj Judío je uponnaq chrilik ati Marta xaq i ati Mariy, re kekipakb'ej jub'i' kib'is rumal ukamik kixib'al.

²⁰ I ati Marta are xuta utzijol chi ktijin ruponik i Jesús chila, x-e chuk'ulaxik; xwiri i ati Mariy xkanaj kan ru' ja.

²¹ I ati Marta xub'ij che i Jesús: —Ajwal, wetene at o chi keje teneri kkam inxib'al.

²² Xwiri yin weta'am chi i Dios kuya chawe ronojel ni'pa katz'onoj che.

²³ Are uri i Jesús xula' uwach che ati Marta: —I axib'al kk'asi chik.

²⁴ I ati Marta xub'ij che: —Qatzij, weta'am chi inxib'al kwalij chik are kewalij i kamnaq pa k'isb'al ij —xcha.

²⁵ Are uri i Jesús xub'ij che: —Yin keinwalijsaj i kamnaq; xaq Yin in k'aslemal. Pachin kinukojo tupu kamnaq chik kk'un chik saq chwach.

²⁶ Xaq keje i jun chi k'a k'aslik we kinukojo, lik kkam ti uri. ¿Kakoj yet iri? —Xcha.

²⁷ Are uri ati Marta xub'ij che: —Kinkojo, Ajwal. Yin lik kinkojo chi yet at Cristo chi at Uk'ojol i Dios; chi kk'un ni chwach i jyub' ta'aj.

I Jesús xo' chila ipa muqtal wi ma Lázaro

²⁸ Chrijil chik ub'ixkil ile, te'uri ati Marta x-e chusik'ixik ati Mariy chi xaqjun kiqajaw, ani'al xub'ij che: —I Tijonel o chi xaq katusik'ij.

²⁹ I ati Mariy are xuta ile, are uri xwalij la b'ik, x-e chrilik i Jesús.

³⁰ I Jesús k'amaja kok pa tinimit, k'a o chila ipa xk'ulax wi rumal ati Marta.

³¹ I aj Judío chi je o chila chi rachoch ati Mariy chukub'saxik uk'ux, are xkilo chi ati Mariy xel li pa'anem, xeterej li chrij man xkich'ob' ike moqxa x-e che o'ej ipa muqtal wi uxib'al.

³² Are xupon ati Mariy chila ipa o wi i Jesús xxuki chwach, xaq xub'ij che: —Ajwal, wetene at o chi chuxe'el ukamik inxib'al, keje teneri kkamik.

³³ I Jesús are xril ati Mariy chi ko'ik xaq konojel ni'pa aj Judío, xpe jun nim laj ututik puk'ux.

³⁴ Are uri xutz'onoj chke: —¿Ipa ximuq wi? Ike xkib'ij che: —Ajwal, jo chrilik.

³⁵ I Jesús xo'ik.

³⁶ Are uri aj Judío xkib'ij: —¡Chiwila pe', lik k'ax kuna ma Lázaro!

³⁷ Xwiri o jujun chke ike xkib'ij: —Ire le chi xutzunsaj i mawach, wetene o chi; ¿Keje teneri kkam ma Lázaro? —Xecha.

Uwalijik i ma Lázaro che i kamik rumal i Jesús

³⁸ I Jesús lik k-utut uk'ux, xtejeb' pan ipa muqtal wi ma Lázaro. I jul le lik tz'apim uchi' ru' jun ab'aj.

³⁹ I Jesús xub'ij: —Chiwesaj i ab'aj le. Are uri ati Marta, chi ranab' i kamnaq, xub'ij: —Ajwal, ile lik chu chik man o chik kajib' ij che ukamik.

⁴⁰ I Jesús xub'ij che ati Marta: —¿Inb'im ti b'ari chawe we kakojo lik kawil ni nim laj u'ij uchomal i Dios? —Xcha.

⁴¹ Are uri xkesaj i ab'aj chuchi' i jul. I Jesús xtzun an chikaj, i xub'ij: —Ta, kintioxij chawe man atom intzij.

⁴² Yin lik weta'am chi Yet arewi kinata, xwiri xinb'ij i tzij le kumal i winaqi chi je o waral, man keje ile lik kkikojo chi Yet xinataq loq —keje ile xub'ij i Jesús.

⁴³ Are xb'itaj ile, ko xub'ij i tziji: —¡Ma Lázaro, chatel li chila!

⁴⁴ Are uri i kamnaq xel li pa jul; yut'tal u'ab', raqan xaq pasim upalaj ru' jun k'ul. I Jesús xub'ij chke: —Chitoro man kb'inik.

Uyijb'axik uchapik i Jesús

⁴⁵ I aj Judío winaq chi je petnaq ru' i ati Mariy, je k'i xkikub'a kik'ux che i Jesús rumal wach i xkilo.

⁴⁶ Xwiri o jujun chkixol aj Judío xe'e chub'ixkil chke i aj fariseo wach xu'an i Jesús.

⁴⁷ Are uri aj fariseo xaq i kaj-atzil i rajpatan i Dios, xkimol kichi' i jutz'ob'aj unimaqil winaq chi kki'at tzij pkitinimit aj Judío; xkib'ij: —¿Wach kqa'ano? Man i achi ri lik k'i i nimaq taq il ktijin chu'anik.

⁴⁸ We to' keje ile kqakanaj, konojel i winaq kkikoj ni utzij i achi le. Are uri kek'un i aj atb'al tzij re i tinimit Roma, kkiwulijsaj ni rachoch i Dios xaq kki'an ni uri k'ax che qatinimit —xecha.

⁴⁹ Xwiri o jun chke ike, chi ma Caifás ub'i, chi xaq are atz laj rajpatan i Dios che i junab' le; xub'ij chke: —¡Yix lik nti iweta'am!

⁵⁰ Yix kich'ob' taj we mas utz ke'eloq chi xa jun achi kkam pkik'exel konojel i winaq, chwach we kekam konojel i winaq re i tinimit —xcha.

⁵¹ I tzij chi xub'ij ma Caifás le, to' ti xunojij an pujolom, lik ru' i Dios xpe wi ub'ixkil ile; man ire are atz laj rajpatan i Dios che i junab' le. Rumali xub'ij chi lik utz we kkam i Jesús pkik'exel aj Judío.

⁵² Xwi ti kumal i tinimit aj Judío, xaq molb'al kichi' konojel i je rak'al i Dios chi xaipa je o wi chwach i jyub' ta'aj.

⁵³ Are uri, chi lik che i ij le i winaq aj Judío chi nimaq kipatan xuriq rib' kitzij chi kkikamsaj i Jesús.

⁵⁴ Rumali i Jesús xmalkat ti chik pa taq b'e chkiwach aj Judío; xel chila pa Judea x-e che jun tinimit chi Efraín ub'i, chuchi' i tz'inilik jyub' chaqij. Chila xkanaj wi ku' utijoxelab'.

⁵⁵ Are ya kuriq ij re i Pascua ke aj Judío, lik je k'i i winaq pa jalajuj taq tinimit xe'e pa Jerusalén anb'al ch'am che kib' chwach i Dios chuxe'el i nima'ij le.

⁵⁶ I aj Judío ketijin chutzukuxik i Jesús chila prachoch i Dios, rumali kkitz'onoj chkiwach: —¿Wach kich'ob' yix, kk'un nawi pa nima'ij o kk'un taj? —Xecha.

⁵⁷ I aj fariseo xaq i kaj-atzil i rajpatan i Dios, xkib'ij chke i winaq: “We xiwil uwach i Jesús chib'ij chqe man keje ile koj-e chuchapik.” —Xecha.