JOSUÉ 8 - Wuj Pa K'ubultzij

I je aj Israel kkik'am i tinimit Hai

¹ I Ajwal xukowij uk'ux ma Josué, xub'ij che: “Maxij awib' xaq mb'a'krij ak'ux. Cheak'ama b'i konojel achiyab' awu' chi je yij che i ch'oj, jix chik pa ch'oj chkij i winaq je aj Hai, man Yin kinjach ni kajawinel pi'ab', rachi'ilam i je uwinaq chi je yij che ch'oj, ronojel i tinimit Hai xaq ronojel i komon chi o chrij chwach.

² Ki'an ni chke i winaq re i tinimit le xaq che i kajawinel pacha xi'an chke i je aj Jericó xaq che i kajawinel; xwiri wo'or ni'pa i ub'itaq ke kkanaj ni pi'ab' yix xaq konojel ni'pa i kichikop. Chayijb'a jun ch'oj xani'al, jix chiwuwaj iwib' chrij i tinimit.”

³ Ma Josué xkiyijb'a kib' ku' konojel achiyab' chi je yij che i ch'oj man ke'e chu'anik ch'oj chkij i je aj Hai. Xeucha jo'lajujmo' oxchiy (30,000) achiyab' chi je yij che i ch'oj xeutaq b'i cha'ab',

⁴ ru' i taqaniki: “Chita pe, jix, chiwuwaj iwib' chrij i tinimit, qas ta naj kixk'iji wi che, xaq chix-ol pik'ijib'al.

⁵ Yin ku' inwinaq kojtejeb' pan jub'i' chwach i tinimit, are kepe i je ajch'oj le chqij pacha xki'an chqe nab'emul, yoj koj-anmaj ni chkiwach.

⁶ Ike keterej na li uri chqij, man kkib'ij: Ile ke'anmaj tan chik chqawach pacha xki'an nab'emul; yoj lik koj-anmaj ni chkiwach.

⁷ Are uri yix, kixel li chila ipa iwuwam wi iwib', kixok b'i pa tinimit; man i Dios ku'an ni chqe chi kojch'akanik.

⁸ Are ix oknaq chub'ik, chinak'a a' che i tinimit le, pacha xojutaq i Dios chu'anik. Are intaqanik ile chiwe”; xub'ij ma Josué.

⁹ Are xeupon i achiyab' chi je yij che i ch'oj chila ipa xetaq wi b'i rumal ma Josué, ike xkuwaj kib' chila chuxol i tinimit Betel ru' i tinimit Hai, pusuk' uqajb'al ij che i tinimit Hai le, i ma Josué xkanaj kan ku' uwinaq che a'ab' le chila ipa xuya wi i taqanik.

¹⁰ Chukab' ij i ma Josué lik we' xwalijik, xrik'awsaj kib'i konojel uwinaq; te'uri junam ku' i kaj-atzil i je aj Israel xenab'ej b'i chkiwach uwinaq, xe'e pa ch'oj chkij i je aj Hai.

¹¹ Konojel achiyab' chi je yij che i ch'oj chi je enaq ru' ma Josué, xeupon naqaj che i tinimit Hai, xwi chik jun ta'aj xetejeb' ti panoq; pa moxab' xek'iji wi che i tinimit le.

¹² Ma Josué xeutaq chub'i lajujwinaq kab'lajujmo' (5,000) achiyab' chi je yij che i ch'oj chusutixik rij i tinimit Hai, ike xkuwaj kib' chuxol i tinimit Betel ru' i Hai, pusuk' i uqajb'al ij che i tinimit Hai le.

¹³ Keje x-on ile, jutzob'aj achiyab' chi je yij che i ch'oj xek'iji pa moxab' che i tinimit xaq jutzob'aj chik xek'iji pusuk' i uqajb'al ij. Che a'ab' le xmalkat pan ma Josué chwa ta'aj.

¹⁴ I ajawinel re i tinimit Hai are xunab'ej chi o kmalkat chwa ta'aj, juntir xkiyijb'ala kib' ku' uwinaq chi je yij che i ch'oj, te'uri xe'el loq, xe'e pa ch'oj chkij je aj Israel chwach i jyub' Arabá, xwiri reta'am taj chi sutim rij i tinimit kumal jub'an chik aj Israel.

¹⁵ Ma Josué xaq konojel uwinaq xki'an che kib' pacha taq xkixij kib', rumali xe'anmaj chkiwach i aj Hai, xkimaj b'i b'e chi k-e pa tz'inilik jyub' chaqij.

¹⁶ Are uri xb'ix chke konojel i achiyab' chi je yij che i ch'oj chi je o pa tinimit Hai, chi cheterej b'i chkij i aj Israel; lik keje ro'taxik kan i tinimit ile xki'ano.

¹⁷ Rumali mijun chik achi chi yijil che i ch'oj xkanaj kan pa tinimit Hai, xaq mijun xkanaj kan pa tinimit Betel, konojel xeterej b'i chkij i aj Israel, rumal kiterejik b'ik chkij i aj Israel lik nti chik xchajiw kan i tinimit.

¹⁸ Are uri i Ajwal xub'ij che ma Josué: “Chayaka an i ache' ch'ich' utzam chi o pa'ab', k'utb'al re chke achiyab' chi je sutiwnaq rij i tinimit chi chkijeqa i ch'oj, man Yin keinjach i winaq le pi'ab'.” Are uri ma Josué xu'ano pacha xb'ix che.

¹⁹ I achiyab' chi je yij che i ch'oj chi kuwam kib' chrij i tinimit, are xkil i che' ch'ich' utzam chi xuyak an ma Josué, are uri xe'el la loq xaq juntir xe'ok la b'i pa tinimit chunak'ik a' che.

²⁰ I winaq re i tinimit Hai are xetzun chkij, xkil i sib' chi kb'uquq pa tinimit kel b'i chikaj; are uri xkilo chi kkiriq ti chik ipa ke'anmaj wi, man i je aj Israel chi je anmajnaq te'eq chkiwach i aj Hai, xkisutij li kib', xe'ok chu'anik ch'oj chkij i aj Hai le.

²¹ Ma Josué xaq i achiyab' chi je yij che i ch'oj chi je o ru' ire, are xkilo chi xnak' a' che i tinimit kumal i achiyab' chi kuwam te'eq kib' chrij tinimit, xetzalij loq xaq xe'ok chu'anik ch'oj chkij i je aj Hai.

²² Xaq i achiyab' chi je yij che i ch'oj chi kuwam te'eq kib' chrij i tinimit, xeterej b'i chu'anik ch'oj chkij i je aj Hai, i je aj Hai le xech'api chkixol i je aj Israel, rumali xkiriq ti chik ipa xe'el wi. I je aj Israel xkichup kiwach konojel i je aj Hai, lik mijun xtotajik.

²³ Xwi chik i ajawinel xkikamsaj taj, xkichapo xaq xkijach pu'ab' ma Josué.

²⁴ I je aj Israel are xkik'is kikamsaxik i je aj Hai chi je terejnaq te b'i chkij, te'uri konojel xe'e pa tinimit Hai, xaq xekikamsaj konojel ni'pa i je o kan chila.

²⁵ Che i ij le, xekam lajujmo' juchiy (12,000) winaq je aj Hai, achiyab' xaq ixoqib'.

²⁶ Man ma Josué xuqajsaj ti uche' ch'ich' utzam chi xuyak chikaj are xjeqan i ch'oj, k'a xekamsax ni konojel je aj Hai kumal i je aj Israel.

²⁷ I je aj Israel xki'an ke che ni'pa ub'itaq ke i je aj Hai xaq konojel i kichikop, pacha xub'ij i Ajwal che ma Josué.

²⁸ I ma Josué xuporoj i tinimit Hai, is xumulb'a ronojel, chi k'a mulan chila wo'or.

²⁹ Xaq xutaq ujitz'axik i ajawinel re i tinimit Hai che u'ab' jun che', xaq xub'ij chi ktzayb'ax ni kan uch'akul chila k'a kqaj ij. Are xtzaq b'i ij te'uri xutaq uqajsaxik, xkik'aq uch'akul i ajawinel pa okb'al re i tinimit xaq xkit'ub'a jub'an ab'aj puwi, chi xaq k'a o chila wo'or.

I ma Josué krajlaj uwach u'atb'al tzij i Dios puwi i jyub' Ebal

³⁰ Te'uri ma Josué xuyijb'a jun sujb'al sipon re i Ajwal chi ki-Dios i je aj Israel chila puwi i jyub' Ebal.

³¹ Pacha utaqom u'anik etz mam Moisés chi rajchak i Ajwal chke i je aj Israel, xaq pacha tz'ib'tal kan chupam u'atb'al tzij. Are uri i je aj Israel xkisujuj sipon puwi i sujb'al sipon chi tusum ab'aj, i ab'aj le lik paxim ti pa taq nik'aj xaq xkiporoj jalajuj taq chikop re chomb'al kib' chwach i Dios.

³² Ma Josué xutz'ib'aj uk'exwach u'atb'al tzij i Dios chwach ab'aj re sujb'al sipon chi ub'im kan etz mam Moisés ujer chkiwach konojel i je aj Israel.

³³ Konojel i aj Israel ku' i jalajuj taq kaj-atzil je tak'al k'ulala che i kaxa re utrat i Ajwal chkiwach konojel i ajsujul sipon chi je aj Leví chi xaq kuk'am i kaxa. Konojel je aj Israel xaq i je aj Israel taj chi je enaq ku', nik'aj chke xetak'i pusuk' i jyub' Gerizim xaq nik'aj chik xetak'i pusuk' i jyub' Ebal, pacha ub'im kan etz mam Moisés chuxeb'al loq, chi ktz'onox utzil chomal pkiwi i je aj Israel.

³⁴ Te'uri ma Josué xrajlaj uwach u'atb'al tzij i Dios, ronojel ni'pa i utzil chomal xaq i k'oqb'al, chrij pacha tz'ib'tal kan chupam i wuj re u'atb'al tzij i Dios.

³⁵ I ma Josué xrajlaj uwach i wuj chi utz'ib'am kan etz ma Moisés, lik ronojel xrajlaj uwach chkiwach konojel i je aj Israel ixoqib' ak'alab' xaq i je aj Israel taj chi je enaq ku'.