JOSUÉ 7 - Wuj Pa K'ubultzij

Umak ma Acán

¹ Xwiri i aj Israel xkiqel i Ajwal man o jun chke ulemajil ma Judá, chi Acán ub'i, uk'ojol ma Carmi, ri umam ma Zabdi xaq umuq uxikin ma Zera, ire le xmakunik man xrel-aj li k'iyal b'iroxik chi chupik uwach rumal i Dios. Rumali xpe roywal i Ajwal chke konojel i aj Israel.

Utojb'alil i mak xaq ujamik kib' chila chwach i Hai

² Are uri ma Josué xeutaq b'i jub'an achiyab' pa tinimit Hai, naqaj che i tinimit Bet-avén chi o chila prelb'al ij che i tinimit Betel, xub'ij chke: Jix pa tinimit Hai, chiwila wach okik kqa'an chila; are uri xe'e ike chrilik i tinimit le.

³ Are xetzalij loq xkib'ij che ma Josué: “Rajwaxik taj ke'e konojel i winaq pa ch'oj. Ru' jo'mo' (2,000), lajujwinaq wuqmo' (3,000) achiyab' je yij che i ch'oj xqare k-ono kqak'amb'ej kan i tinimit, man je k'i ti winaq je o chila; rumali rajwaxik taj chi kekos konojel.”

⁴ Rumali kolo xa lajujwinaq wuqmo' (3,000) achiyab' je yij che i ch'oj xkiyak b'i kib', xwiri are xeuponik xe'anmaj chkiwach je aj Hai.

⁵ Xeterb'ex li xol uchija re i okb'al che i tinimit, xemajtaj k'a che jun xulanik, are uri xekamsax waqlajuj juwinaq (36) chke i aj Israel; rumali konojel i aj Israel laj xel kik'ux xaq laj x-e kuxlab'.

⁶ Rumal wach xkik'ulmaj le, ma Josué xaq i je aj-atzil ke i aj Israel xkiraqch'ij ki'u', xkikoj uk'aj ulew pkija' k'utb'al re chi je o pa b'is, xexuki'ik xaq xkiqajsaj kipalaj k'a chwach ulew, chwach i lo'laj ukaxa i Ajwal, k'a xqaj b'i ij.

⁷ Are uri ma Josué xub'ij che i Dios: —¡Wajwal Dios! ¿B'uchak xoja'atsaj li che i raqana Jordán, xa jachb'al b'a qe ri pki'ab' je aj Hamor, xa'ano man kojkikamsaj? ¡Utz te'eq wetene xojkanaj kan ch'aqa ya Jordán!

⁸ ¡Lo'laj Wajwal! ¿Wach chik kinb'ij wo'or, man i je aj Israel xe'anmaj chkiwach i je ajch'oj chkij?

⁹ Man i je aj Canaán xaq konojel i winaq re uwach ulew, kketamaj na wach xqak'ulmaji, te'uri kkisutij qij chupb'al qawach chwach i jyub' ta'aj; b'ay, ¿Ipa kkanaj wi uri i nim laj a'ij?

¹⁰ I Ajwal xub'ij che: —Chatwalijoq. ¿Wach kaxukb'a b'i chila pulew?

¹¹ Man i je aj Israel xemakunik, xkiqel intzij chi xinb'ij chke, man o xkik'am che i chupik uwach wumal Yin, lik xe'el anik i keta'am chi utz ti xki'ano, xet'oronik xwi ta la ile xaq xek'ix ti chruwaxik ru' ub'itaq ke

¹² Rumali ketiki ti chkich'akik i ajch'oj chkij, xa ke'anmaj chkiwach; are ike kitukel xkitzukuj usachik kiwach. Yin kink'iji ti chik iwu' we kichup ti uwach ile chi iya'om chixol.

¹³ Rumali chatwalijoq, cha'ana ch'am chke i je aj Israel xaq chab'ij chke: “Chi'ana ch'am che iwib' re chweq, man i Ajwal chi Dios ke i je aj Israel keje iri kub'ij: O i kamik chixol yix ix aj Israel, we kichup ti uwach ile chi chupik uwach wumal Yin, kixtiki ti uri chkich'akik i je ajch'oj chiwij.”

¹⁴ Chweq ksaqirik kkimol kib' pa taq lemajil, i lemajil chi kinsik'ij Yin keuk'ut ni alk'uwal pa taq alk'uwal; i alk'uwal chi kinsik'ij kkik'ut ni i kalk'uwal chi ki'anom kib' chi taq kachoch xaq i alk'uwalxelab' chi ki'anom kib' chi taq kachoch kkib'ij ni kib'i chkijujunal.

¹⁵ Pachin ru' kriqtaj wi i sachik te'eq uwach wumal Yin, ksachsax ni uwach uri pa a' junam ku' i ralk'uwal xaq i ub'itaq re, man xuqel intzij, xaq xaqmanal xu'an chkixol i rach aj Israel.

Utojb'alil puwi i Acán

¹⁶ Chukab' ij lik we' tan, ma Josué xutaq kisik'ixik je aj Israel, lemajil pa taq lemajil; i Ajwal xuk'ut ulemajil ma Judá.

¹⁷ Ma Josué xeusik'ij ulemajil ma Judá ire xub'ij kib'i i ralk'uwal, xaq xk'ut chik i ralk'uwal ma Zera, te'uri chkixol i ralk'uwal ma Zera le, xk'ut chik i ralk'uwal ma Zabdi chi ki'anom kib' chi taq kachoch.

¹⁸ Are uri ma Josué xerik'awsaj rak'al ma Zabdi jujunal, i xk'ut chik i Acán chi uk'ojol ma Carmi, ri umam ma Zabdi xaq umuq uxikin ma Zera re ulemajil ma Judá.

¹⁹ Are uri ma Josué xub'ij che Acán: —Wak'al, chakojo u'ij xaq chab'ixaj i Ajwal chi qa-Dios yoj oj aj Israel, xaq chasaqij chwe ronojel ni'pa i a'anom. ¡Lik nti mawuwaj uwach chwe!

²⁰ Are uri Acán lik xusaqij, xub'ij: —Lik saq laj tzij xinmakun chwach i Ajwal chi qa-Dios yoj oj aj Israel; inmak chi xin-ano are iri:

²¹ Xwil jun nim laj k'ul chom, aj Babilonia chi o chuxol ni'pa i sachik uwach, lajujwinaq (200) saqpwaq xaq jurab'aj anpwaq chi kolo jun pexu ralil, qus xwilo rumali xin-an we che; xinmuq pa jul punik'ajal wachoch, i saqpwaq xinya li k'a chuxe'.

²² Te'uri ma Josué xeutaq b'i jub'an achiyab', ike pa'anem xe'e chi rachoch Acán, chila xkiriq wi ronojel ni'pa i ruwam, ru' i saqpwaq chi o k'a chuxe'.

²³ Xkik'am loq, xkijach che ma Josué xaq chkiwach i je aj Israel te'uri xkijach pu'ab' i Ajwal Dios.

²⁴ Ma Josué xaq konojel i je aj Israel xkik'am b'i Acán chi umuq uxikin ma Zera che jun ta'aj chi Acor ub'i, xkik'am b'i ronojel ni'pa i rel-am xaq i rak'al, uchikop, u'axna, uchij, k'ul chi re umujanb'al, xaq ronojel ni'pa ub'itaq re.

²⁵ Are xeupon che i ta'aj le, xub'ij ma Josué che Acán: —¿B'uchak xaqmanal xapetsaj pqawi? I xaqmanal chi xapetsaj pa qawi le, chupetsaj ni Ajwal Dios pawi yet wo'or. Are xb'itaj ile konojel i je aj Israel xkikamsaj Acán ru' ab'aj junam ku' i rak'al xaq konojel uchikop, te'uri xejarsax pa a'.

²⁶ Pa k'isb'al re xkit'ub'a jub'an ab'aj chila ipa xejar wi pa a', i ab'aj le k'a t'ub'ul chila wo'or. Keje relsaxik roywal i Ajwal ile xu'ano. Rumali i k'ijib'al le ta'aj Acor ub'i.