JOSUÉ 5 - Wuj Pa K'ubultzij

I k'ijib'al chila Gilgal

¹ Konojel i ajawinelab' chi je aj Hamor chi je o puqajb'al ij che i raqana Jordán, xaq konojel i ajawinelab' aj Canaán chi je o naqaj che i mar Mediterráneo, are xketamaj chi Ajwal xuchaqijsaj i raqana Jordán re ki'axb'al i aj Israel, lik laj xel kik'ux, xaq laj x-e kuxlab' xaq xkitak'b'a ti chik kib' chwach i ch'oj.

² Che taq i ij le i Ajwal xub'ij che ma Josué: “Cha'ana jub'an kuchil ab'aj chi lik o uware, te'uri chakojo chik i circuncisión chke konojel achiyab' aj Israel.”

³ Are u'ankil uri chi ma Josué xu'an jub'an kuchil ab'aj, te'uri xu'an i circuncisión chke konojel achiyab' aj Israel, chila tzam jyub' Aralot.

⁴ Xki'an i circuncisión le chke man i achiyab' chi je yij che i ch'oj chi xe'el li pa Egipto, xekam kan pa taq b'e pa tz'inilik jyub' chaqij.

⁵ Tupu konojel ike le chi xe'el li pa Egipto, antal chik i circuncisión chke, xwiri konojel ni'pa xealax pa taq b'e pa tz'inilik jyub' chaqij, ike le antal ti circuncisión le chke.

⁶ I Dios usujum te'eq chke i katit kimam i aj Israel chi kuya jun utz laj ulew chke man chila che i ulew le lik o i leche xaq uwa'al kab' lik keje pacha i ya kb'inik. Xwiri i aj Israel chi xe'el li pa Egipto xkiqel i Ajwal. Rumali Ire xusaqij chke chi kkil ti uwach i ulew le. Rumali xeb'aytaj kawinaq (40) junab' pa tz'inilik jyub' chaqij, rumali konojel achiyab' chi je yij te'eq che i ch'oj are xe'el Egipto ya je kamnaq chik.

⁷ Rumali ma Josué xu'an i circuncisión chke i kak'al achiyab' le chi je alab'om, ile are xeuya kan i Ajwal pkik'exel kiqajaw man ike le antal ti circuncisión chke man rumal je o pa taq b'e.

⁸ Are antal chik i circuncisión chke, xek'iji ni chila ipa je o wi, lik k'a xeutzir na.

⁹ Are uri i Ajwal xub'ij che ma Josué: Ru' ukojik i circuncisión chke achiyab' le, xwesaj i k'ixb'alil chi aj Egipto kiya'om chiwe. Rumal ile chi k'ijib'al le Gilgal ub'i wo'or.

¹⁰ Are xqaj i ij che i ij kajlajuj re i nab'e ik', tz'aqat je uxlannaq chwa ta'aj Jericó i aj Israel xki'an i nima'ij Pascua.

¹¹ Chukab' ij are xik'aw i nima'ij Pascua, i winaq xkijeq utzuqik kib' che uwach i tikon aj chila Canaán, xkitij i wa chi nti kunb'al ru' chi re paxb'al uwach i wa, xaq xkitij i k'ilim trigo.

¹² Che i ij le xumayij li tzaqik i maná, are uri xkijeq utzuqik kib' i aj Israel che uwach i tikon aj chila Canaán, are u'ankil uri chi xkitij ti chik i maná; lik are uwach i tikon aj chila Canaán xkijeq utijawik che i junab' le.

I ma Josué xaq i aj-atzil ke i achiyab' chi je yij che i ch'oj re i Ajwal

¹³ Xuk'ulmaj che jun ij are naqaj o wi ma Josué che i tinimit Jericó, xaqte'et xrilo chi tak'al pan jun achi chwach rok'am jun ch'ich' pu'ab', are uri ma Josué xtejeb' pan ru', xutz'onoj che: —¿At qachi'il nawi o xa at kachi'il i je ajch'oj chqij? —Xcha.

¹⁴ I achi le xula' uwach che: —Mijun inya'om inwach ru', yin in kaj-atzil i je ajch'oj chikaj chi re i Ajwal —xcha. Are uri ma Josué xxuki'ik, xuqajsaj upalaj k'a chwach ulew kojb'al re u'ij, te'uri xutz'onoj che: —Nim laj winaq ¿Wach i taqanik awok'am li yet che awajchaki?

¹⁵ I kaj-atzil i je ajch'oj chikaj chi re i Ajwal xub'ij che ma Josué: —Chawesaj axajab' che awaqan man ipa at tak'al wi lik elsam re i Ajwal. Ma Josué lik keje ile xu'ano.