JOSUÉ 21 - Wuj Pa K'ubultzij

I kitinimit i je aj Leví

^1-2 I kaj-atzil i aj Leví xe'e ru' ma Eleazar, chi ajsujul sipon, ru' mam Josué, chi uk'ojol ma Nun xaq ku' i kaj-atzil konojel i lemajil aj Israel, chi je o pa tinimit Silo, chila Canaán; are xeuponik xkib'ij chke: I Ajwal ub'im che etz mam Moisés chi yix rajwaxik kiya qulew xaq qatinimit re kojk'iji chwach, rachi'ilam k'ijib'al re kiwayb'al qachikop.

³ Are uri i je aj Israel xki'ano chrij pacha ub'im i Ajwal, xkiya kan jujun chke i kitinimit xaq kulew chke aj Leví re kik'ijib'al xaq re kiwayb'al kichikop.

⁴ I je aj Leví chi je ulemajil ma Coat, pkiwi ike le xtzaq wi nab'e sakinik, are uri xya' kulew ike le chi je umuq uxikin i ajsujul sipon ma Aarón, oxlajuj tinimit xya' kan chke chi o pa kulew utzob'ajil ma Judá, ma Simeón xaq pa kulew utzob'ajil ma Benjamín.

⁵ I jub'an chik ulemajil ma Coat xya' kan lajuj nimaq taq tinimit chke pa kulew utzob'ajil ma Efraín, pa kulew utzob'ajil ma Dan xaq pa kulew nik'aj chke utzob'ajil ma Manasés.

⁶ Te'uri xtzaq chik i sakinik pkiwi i je aj Leví chi je ulemajil ma Gersón, are uri xya' kulew, oxlajuj tinimit xya' chke chila pa kulew utzob'ajil ma Isacar, pa kulew utzob'ajil ma Aser, pa kulew utzob'ajil ma Neftalí xaq nik'aj chke utzob'ajil ma Manasés chi o pa Basán.

⁷ Pa k'isb'al re xtzaq i sakinik pkiwi i je aj Leví chi je ulemajil ma Merari, are uri xya' kulew, kab'lajuj nimaq taq tinimit xya' chke chila pa kulew utzob'ajil ma Rubén, pa kulew utzob'ajil ma Gad xaq pa kulew utzob'ajil ma Zabulón.

⁸ Keje uya'ik ulew ile xki'an i je aj Israel chke i je aj Leví, xaq xkiya kan kiwayb'al kichikop chrij pacha ub'im i Ajwal che etz mam Moisés.

⁹ I tinimiti chi kekuxtax warali, xe'el che utzob'ajil ma Judá xaq che utzob'ajil ma Simeón,

¹⁰ xya' chke i je aj Leví chi je ulemajil ma Coat chi xaq je umuq uxikin ma Aarón, man je are ike xtzaq nab'e sakinik pkiwi.

¹¹ Chke ike le xya' wi kan ulew chi o tzam taq jyub' chila Judá, chi Quiriat-arba te'eq ub'i, xwiri wo'or Hebrón ub'i, rachi'ilam i ulew re kiwayb'al i chikop, i Arba le are ub'i katit kimam i je aj Anac.

¹² Xwiri i ulew xaq i komon re i tinimit le xya' che ma Caleb chi uk'ojol ma Jefone, lik re ire xya'ik.

¹³ Xwi ti tinimit Hebrón re tob'al kib' ni'pa i kki'an i kamik, xaq xya' kan chke je umuq uxikin i ajsujul sipon ma Aarón, xya' kan i nim laj tinimiti Libna,

¹⁴ Jatir, Estemoa,

¹⁵ Holón, Debir,

¹⁶ Aín, Juta xaq i Bet-semes; i b'elejeb' tinimiti lik o kulew re kiwayb'al i kichikop.

¹⁷ Che utzob'ajil ma Benjamín: Are xya' i Gabaón, Geba,

¹⁸ Anatot xaq i Almón, kajib' tinimit chi lik rachi'ilam ulew re kiwayb'al i chikop.

¹⁹ Are oxlajuj tinimit ile chi xya' kan chke i ajsujul sipon, chi je umuq uxikin ma Aarón, chkijujunal rachi'ilam ulew re kiwayb'al i chikop.

²⁰ I jub'an chik tzob'ajil chi je aj Leví chi je umuq uxikin ma Coat, xaq xya' nimaq taq kitinimit ike pkulew utzob'ajil ma Efraín.

²¹ I ulew le o chila tzam taq jyub' Siquem, are i tinimit re tob'al kib' ni'pa i kki'an i kamik, xaq i Gezer.

²² Kibsaim xaq i Bet-horón; kajib' tinimit ronojel, rachi'ilam ulew re kiwayb'al i chikop.

²³ Che utzob'ajil ma Dan xya' kan i tinimiti chke: Elteque, Gibetón,

²⁴ Ajalón xaq i Gat-rimón; kajib' tinimit ronojel, rachi'ilam ulew re kiwayb'al i chikop.

²⁵ Xaq xya' kan i tinimiti chke chi o pkulew nik'aj chke utzob'ajil ma Manasés: Taanac xaq i Gat-rimón; keb' tinimit ronojel rachi'ilam ulew re kiwayb'al i chikop.

²⁶ Are lajuj tinimit ile konojel chi xya' chke utzob'ajil ma Coat, rachi'ilam ulew re kiwayb'al i chikop.

²⁷ I je aj Leví chi je umuq uxikin ma Gersón xya' keb' kitinimit chke, chi ke te'eq i nik'aj chke utzob'ajil ma Manasés, rachi'ilam ulew re kiwayb'al i chikop chi are iri: Golán chi o chila pa Basán, i tinimit le re tob'al kib' ni'pa i kki'an i kamik, xaq i tinimit Beestera, keb' tinimit.

²⁸ Xaq xya' kan i tinimiti chke chi o pkulew utzob'ajil ma Isacar; chi are i Cisón, Daberat,

²⁹ Jarmut, xaq En-ganim; kajib' tinimit ronojel, rachi'ilam ulew re kiwayb'al i chikop.

³⁰ Xaq xya' kan i tinimiti chke chi o pkulew utzob'ajil ma Aser: Miseal, Abdón,

³¹ Helcat xaq i Rehob; kajib' tinimit ronojel, rachi'ilam ulew re kiwayb'al i chikop.

³² Xaq xya' kan i tinimiti chke chi o pkulew utzob'ajil ma Neftalí: Cedes chi o chila pa Galilea, i tinimit le xaq re tob'al kib' ni'pa i kki'an i kamik, xaq i Hamot-dor xaq i Cartán; oxib' tinimit ronojel, rachi'ilam ulew re kiwayb'al i chikop.

³³ Are u'anik uri ile, chi je oxlajuj tinimit konojel ke utzob'ajil ma Gersón, chkijujunal rachi'ilam ulew re kiwayb'al i chikop.

³⁴ I je utzob'ajil ma Leví chi je umuq uxikin ma Merari, xya' kitinimit ike pkulew utzob'ajil ma Zabulón chi are iri: Jocneam, Carta,

³⁵ Dimna xaq i Naalal; kajib' tinimit ronojel, chkijujunal rachi'ilam ulew re kiwayb'al i chikop.

³⁶ Xaq xya' kan i tinimiti chke chi o pkulew utzob'ajil ma Rubén: Beser, Jahaza,

³⁷ Cademot xaq i Mefaat; kajib' tinimit ronojel, rachi'ilam ulew re kiwayb'al i chikop.

³⁸ Xaq xya' kan i tinimiti chke chi o pkulew utzob'ajil ma Gad: Ramot chi o pa Galaad, i tinimit le xaq re tob'al kib' ni'pa i kki'an i kamik; xaq i Mahanaim,

³⁹ Hesbón xaq i Jazer; kajib' tinimit ronojel, rachi'ilam ulew re kiwayb'al i chikop.

⁴⁰ Are kab'lajuj tinimit ile chi xya' chke i tzob'ajil aj Merari, rachi'ilam ulew re kiwayb'al i chikop.

⁴¹ Ronojel i tinimit xaq i ulew re kiwayb'al i chikop chi xjach chke i je aj Leví, chila pa kulew i je aj Israel, wajxaqib' kawinaq tinimit ronojel.

⁴² Ronojel i tinimit le is sutinnaq ulew re kiwayb'al i chikop chrij chwach.

I Ajwal lik suk'ul i ku'ano

⁴³ I Ajwal xu'ano pacha i ub'im chke i katit kimam i aj Israel ujer; rumali xuya ulew le chke, ike xejeqi chwach.

⁴⁴ I Ajwal xu'ano pacha usujum, xuya i uxlanb'al k'uxij chke i winaq chila chwach ronojel ulew, chrij pacha ub'im chke i katit kimam ujer; xaq mijun chke i je ajch'oj chkij xetiki taq chu'anik ch'oj ku' man i Ajwal xeujach pki'ab' i je aj Israel.

⁴⁵ Mitene jun utz laj sujunik chi ub'im i Ajwal chke i je aj Israel we x-antaj taj; ronojel is x-antajik chrij pacha ub'im i Ajwal.