JOSUÉ 20 - Wuj Pa K'ubultzij

I aj Israel kekich'ik tinimit re tob'al ib'

¹ I Ajwal xlapan ru' mam Josué, xub'ij che:

² “Chab'ij chke je aj Israel chi chkich'ika kij jub'an tinimit re tob'al ib', chrij pacha xinb'ij che etz mam Moisés chi katutaq ni che.

³ Man chila kuto wi rib' jun winaq we xukamsaj jun rachi'il chi chu'anik taj xu'ano, utz uri we kruwaj rib' che jun chke i tinimit le, re tob'al rib' chwach i rachalal i kamnaq chi lik o pu'ab' kkamsax rumal.

⁴ Jun winaq are kraj uto'ik rib' k-e che jun chke i tinimit le, are kupon pa okb'al che i tinimit, kub'ij chke unimaqil re i tinimit, ¿B'uchak kraj uto'ik rib' chila? Te'uri unimaqil le kkiya che kok b'ik, xaq kkiya jun uk'ijib'al ipa kk'iji wi.

⁵ Xaq we terejnaq b'i rachalal i kamnaq chrij chi o pu'ab' kukamsaj, i unimaqil i tinimit kkiya ta li winaq che chi xuto rib' chila ku', man i kamsanik chi xu'ano lik chu'anik taj xu'ano, lik rumal ti taq titb'al upam che.

⁶ I winaq chi xkamsanik le kk'iji ni chila pa tinimit ipa xuto wi rib', k'a kya' ni chkiwach konojel unimaqil i tinimit re k-at tzij puwi xaq k'a kkam ni atz laj ajsujul sipon chi o pupatan che taq i ij le, te'uri utz we ktzalij chub'i putinimit xaq chi rachoch ipa anmajnaq wi loq.” Keje xub'ij i Dios ile che mam Josué.

⁷ Are uri i je aj Israel xkich'ik rij jub'an tinimit re tob'al ib' chi are iri: Cedes chi o pa Galilea, chila tzam taq jyub' pa rulew ma Neftalí, a Siquem chila tzam taq jyub' pa rulew ma Efraín, xaq i Quiriat-arba chi xaq Hebrón kb'ix che, chi o tzam taq jyub' chila pa rulew ma Judá.

⁸ Prelb'al ij che i ch'aqa ya Jordán chila pa tz'inilik jyub' chaqij re i Jericó xkich'ik rij oxib' tinimit: Beser chi o pa tz'inilik jyub' chaqij pa kulew utzob'ajil ma Rubén, Ramot chi o chila pa Galaad pa kulew utzob'ajil ma Gad, xaq i Golán chi o chila pa Basán, pa kulew utzob'ajil ma Manasés.

⁹ Are i tinimit ile chi xkich'ik rij i aj Israel re tob'al kib' konojel i aj Israel xaq i je aj naj chi kejeqi chkixol ike, chi we xki'an jun kamik chu'anik taj, man keje ile kkamsax ti rumal i rachalal i kamnaq chi o pu'ab' kkamsanik, are k'amaja k-ati tzij puwi kumal konojel i unimaqil re i tinimit.