JOSUÉ 10 - Wuj Pa K'ubultzij

Kich'akik i je aj Hamor

^1-2 Are xretamaj ma Adonisedec ajawinel re i tinimit Jerusalén lik xuxij rib', man ma Josué xumulb'a i tinimit Hai xaq xukamsaj i ajawinel pacha xu'an chke i je aj Jericó xaq i rajawinel. Xaq xretamaj ma Adonisedec chi je aj Gabaón xki'an jun trat ku' aj Israel xaq xek'iji chkixol. Are uri i aj Jerusalén xaq i rajawinel chi ma Adonisedec lik xe'ok il, man i tinimit Gabaón lik nim xaq lik je k'i i winaq je o chila, chkiwach i je o pa tinimit Hai; man i tinimit Gabaón le lik o u'ij, keje pacha i nimaq taq tinimit xaq i kiwinaq lik ko kiwach, mijun kech'akawik.

³ Rumali ma Adonisedec xutaq b'i tzij ku' i jalajuj taq ajawinelab' ke i tinimit: Ma Hoham ajawinel re i tinimit Hebrón, ma Piream ajawinel re i tinimit Jarmut, ma Jafia ajawinel re i tinimit Laquis xaq i ma Debir ajawinel re i tinimit Eglón, xub'ij chke:

⁴ “Chixpet wu', chinito chu'anik ch'oj ku' aj Gabaón man ike xki'an jun trat ru' ma Josué xaq ku' konojel aj Israel.”

⁵ Are uri i jo'ob' ajawinelab' aj Hamor, ajawinel re i tinimit Jerusalén, ajawinel re i tinimit Hebrón, ajawinel re i tinimit Jarmut, ajawinel re i tinimit Laquis xaq i ajawinel re i tinimit Eglón, xkimol kib'; te'uri xe'e junam ku' i kiwinaq chi je yij che i ch'oj chu'anik ch'oj chkij aj Gabaón.

⁶ Rumali i aj Gabaón le, xkitaq b'i ub'ixkil i tziji che ma Josué chi o chila Gilgal: “Chab'isoj petik qu', mojawo'taj man oj amokom, chojato man konojel i ajawinelab' aj Hamor chi je o chwi taq jyub' xkimol kib' chu'anik ch'oj chqij.” Xecha.

⁷ Are uri ma Josué xel chila Gilgal xe'e junam ku' uwinaq chi je yij che i ch'oj chi lik ko kiwach.

⁸ I Ajwal xub'ij che ma Josué: “Maxij awib' chke man Yin keinjach pa'ab'; mijun chke ike ktiki chach'akik.”

⁹ Are uri ma Josué junam ku' uwinaq chi je yij che i ch'oj jun a'ab' xeb'inik, i aj Hamor lik keta'am taj xaqte'et xeupon pan ma Josué chu'anik ch'oj chkij.

¹⁰ I Ajwal xusach kinojb'al i aj Hamor xaq lik xkixij kib' chke i aj Israel, rumali je k'i chke xekam chila Gabaón. Ni'pa i xe'anmajik xeterb'ex b'i kumal i aj Israel, are xekimaja, xekikamsaj che i b'e re i Bet-horón, xkik'isa kikamsaxik k'a che i tinimit Azeca xaq che i tinimit Maceda.

¹¹ Tz'aqat ktijin ki'anmajik i aj Hamor chkiwach i aj Israel chila chuxol i keb' tinimit Bet-horón xaq i Azeca, are uri i Ajwal xutzaqsaj li nimaq taq saqb'ach pkiwi i aj Hamor, lik je k'i xekam rumal i saqb'ach le chwach i xekam ru' ch'ich' ke i aj Israel.

¹² I Ajwal che i ij le xeujach i aj Hamor pki'ab' i aj Israel, are uri ma Josué xutz'onoj che i Ajwal chkiwach konojel i winaq chi: Ktak'i i ij puwi i tinimit Gabaón, xaq i ik' ktak'i puwi i ta'aj Ajalón.

¹³ Xtak'i uri i ij xaq i ik', k'a xetiki ni i aj Israel chkich'akik i je ajch'oj chkij. Ile tz'ib'tal chupam uwuj i ma Jaser. Keje x-on i ij ile, xtak'i chwa kaj lik xuyin ti rib', laj jun ij.

¹⁴ Mijuyak chuxe'el xaq mijuyak chrijil uk'ulmam taq ile, chi i Ajwal kkojon taq che utzij jun winaq, chi ktak'i taq i ij xaq i ik' rumal. I Ajwal xu'an ile man kch'ojin chkij i aj Hamor chi je ajch'oj chkij i je aj Israel.

¹⁵ Te'uri ma Josué junam ku' i aj Israel xetzalij chub'i pa Gilgal.

¹⁶ I jo'ob' ajawinelab' aj Hamor xe'anmajik, xkuwaj kib' chupam jun pek chila Maceda.

¹⁷ Xwiri o jun xeuriqa i xretamaj ma Josué chi xeriqtaj i jo'ob' ajawinelab' chi kuwam kib' chupam jun pek.

¹⁸ I ma Josué xuya i taqaniki: “Chitz'apij uchi' i pek ru' ab'aj xaq chikojo keb' oxib' chajal re kkichajij.

¹⁹ Xwiri yix mijun chiwe kkanajik, iwonojel chixterej b'i chkij i je ajch'oj chiwij, chimaja b'i ch'oj chkij, miya chke chi keupon pa kitinimit, man i Ajwal chi i Dios yix je ujachom chik pi'ab'.”

²⁰ Te'uri ma Josué xaq i aj Israel lik je k'i aj Hamor xkikamsaj xa je keb' oxib' chik chke xkito kib' pa taq tinimit chi sutim rij ru' ko laj tapial.

²¹ Xwiri konojel i aj Israel xetzalij b'i pa kik'ijib'al Maceda xaq lik nti k'ax chke, chila ipa o wi ma Josué xaq mijun chke i winaq chi je o chkij chkiwach aj Israel k'ax taq xech'aw chkij.

²² Are uri ma Josué xutaq: “Ujaqik uchi' i pek xaq kelsaxik li jo'ob' ajawinelab' chi aj Hamor.”

²³ Keje ile xki'ano, xkesaj li jo'ob' ajawinelab' chupam i pek ke aj Jerusalén, ajawinel aj Hebrón, ajawinel aj Jarmut, ajawinel aj Laquis xaq i ajawinel aj Eglón.

²⁴ Are xkik'am li jo'ob' ajawinelab' le chwach ma Josué, are uri ma Josué xeusik'ij konojel kaj-atzil i achiyab' chi je yij che i ch'oj, xub'ij chke: “Chiya iwaqan rij kiqul i ajawinelab' le.” I kaj-atzil i achiyab' chi je yij che i ch'oj keje ile xki'ano.

²⁵ Are uri ma Josué xuya ukowil kik'ux i kaj-atzil achiyab' chi je yij che i ch'oj xub'ij chke: “Mixij iwib' xaq mi'an keb' che ik'ux, xa chikowij ik'ux xaq chikowij iwach, man keje ile k-on i Ajwal chke konojel i je ajch'oj chiwij.”

²⁶ Are uri ma Josué xeukamsaj i jo'ob' ajawinelab', te'uri xeutzayb'a an chwach jo'ob' che', xetzayi kan chila k'a xqaj i ij.

²⁷ Are xtzaq b'i ij, ma Josué xutaq uqajsaxik kich'akul i ajawinelab', te'uri xekik'aqa chupam i pek, ipa xkuwaj wi te'eq kib'. Are uri xkitz'apij uchi' i pek ru' nimaq taq ab'aj, chi k'a o chila wo'or.

Jub'an chik ch'akanik

²⁸ Xaq che i ij le, ma Josué xukamsaj i ajawinel re i tinimit Maceda ru' ch'ich', xaq keje xu'an chke uwinaq, mijun xk'asi kanoq. I kamik chi xik'aw wi i ajawinel aj Maceda lik keje pacha i kamik chi xik'aw wi i ajawinel aj Jericó.

²⁹ Ma Josué xaq konojel i je aj Israel kelik chila Maceda, xe'e pa ch'oj chrij i tinimit Libna.

³⁰ I Ajwal xujach i tinimit Libna xaq i ajawinel re i tinimit le pki'ab' i je aj Israel. Rumali ma Josué xeukamsaj konojel, mijun xk'asi kanoq; i kamik chi xik'aw wi i ajawinel aj Libna lik keje pacha i kamik chi xik'aw wi i ajawinel aj Jericó.

³¹ Ma Josué xaq konojel i je aj Israel kelik chila Libna xe'e pa tinimit Laquis. I je aj Israel chi je yij che i ch'oj xkisutij rij i tinimit Laquis te'uri xe'ok che ch'oj chkij.

³² I Ajwal xaq xujach i tinimit Laquis pki'ab' i je aj Israel, chukab' ij xetiki chuch'akik i tinimit le, lik xekikamsaj konojel i winaq xaq i chikop ru' ch'ich', chi je jeqel te'eq chila.

³³ I ma Horam chi ajawinel ke aj Gezer ire xpe chkito'ik je aj Laquis, xwiri ma Josué xeuch'ako, xuchup kiwach konojel ru' ch'ich', mijun xk'asi kan chke.

³⁴ Te'uri ma Josué xaq konojel i je aj Israel kelik chila Laquis xe'e chik pa tinimit Eglón; xkisutij rij i tinimit le te'uri xe'ok chu'anik ch'oj chkij je aj chila.

³⁵ Are i ij chi xeupon wi, are i ij uri chi xekich'ak i je aj Eglón, ru' ch'ich' xekikamsaj konojel ni'pa je jeqel chila, pacha kikamsaxik i je aj Laquis xki'ano.

³⁶ Te'uri ma Josué xaq konojel i je aj Israel kelik chila Eglón xe'e chik pa tinimit Hebrón chu'anik ch'oj chkij i je aj chila.

³⁷ I je aj Israel chi je yij che i ch'oj xe'ok pa tinimit Hebrón, xkikamsaj i ajawinel ru' ch'ich' xaq konojel i winaq xaq i chikop chi je jeqel chila xaq keje xki'an chke ni'pa i je o chkij chkiwach, mijun chke xk'asi kanoq. Pacha uchupik kiwach i je aj Eglón xaq keje uchupik kiwach i je aj Hebrón ile xki'ano.

³⁸ Te'uri ma Josué xaq konojel i je aj Israel kelik chila Hebrón xe'e chik pa tinimit Debir chu'anik ch'oj chkij i je aj chila.

³⁹ Xkikamsaj i ajawinel aj Debir ru' ch'ich', xaq keje xki'an chke uwinaq xaq ni'pa je o chkij chkiwach, lik mijun xk'asi kan chke. Pacha kikamsaxik i je aj Hebrón, je aj Libna xaq i kajawinel xaq keje kikamsaxik i je aj Debir ile xki'ano xaq i kajawinel.

⁴⁰ Keje uri kich'akik i jalajuj taq tinimit ile xu'an ma Josué, xeukamsaj i ajawinelab' aj chwi taq jyub' Neguev, aj chwa taq ta'aj xaq ni'pa i je o chkixukut. Xeukamsaj konojel i ajawinelab' re i jyub' le, mixat jun xuk'asb'a kanoq, lik xuchup kiwach konojel ni'pa o kik'aslemal, xu'an ma Josué ile man keje ile xtaq che rumal i Ajwal chi ki-Dios i je aj Israel.

^41-42 Ma Josué xeuch'ak konojel i ajawinelab' i xuk'am kan ronojel i kulew, xjeqan li pa Cades-barnea xupon k'a pa Gaza, xaq ronojel ulew Gosén xupon k'a pa Gabaón, man i Ajwal chi ki-Dios i je aj Israel, xeuto chu'anik ch'oj.

⁴³ Te'uri ma Josué xaq konojel i je aj Israel xetzalij b'i pa kik'ijib'al pa Gilgal.