JONÁS 3 - Wuj Pa K'ubultzij

I tinimit Nínive kujalwachij uk'aslemal

¹ I Ajwal xu'ijla chik ukamul ma Jonás, i xub'ij che:

² Jat, jat che i nim laj tinimit Nínive i chatzijoj chke wach i kinb'ij chawe.

^3-4 Ma Jonás xumaj b'i ub'e, x-e pa Nínive, keje pacha xub'ij i Ajwal che. I Nínive are te jun tinimit lik nim, we k-an b'inik chupam ronojel i tinimit k-an oxib' ij che. I ma Jonás xok pa tinimit i lik jun ij xb'inik, i lik xsik'in chub'ixkil: “¡Che i kawinaq (40) ij i tinimit Nínive ksachsax ni uwach!”

⁵ I winaq pa tinimit, nimaq i ch'utiq, xkikoj i Dios, i xkib'ij chi kkimayij kiwa'im chutz'onoxik che i Dios xaq xkikoj ki'u' as k'utb'al re kib'is.

⁶ Are xupon utzijol ru' i ajawinel re i Nínive, xaq ire xwalij che ukub'ib'al chi o u'ij, i xresaj u'u' chi re upatan, xukoj u'u' as i xkub'i pulew.

⁷ Te'uri, i ajawinel xaq i je uwi ujolom xkiya utzijol i taqanik pa ronojel i tinimit wach i tz'ib'talik: “Chi lik mijun kutij wa. Xaq mkiya kiwa xaq i kiya' i chikop xaq mitene ke i chij.

⁸ Are chi'ana, chikojo i'u' as iwonojel k'utb'al re i b'is xaq chi'ana i tz'onb'enik che i Dios ru' ronojel icho'ab'. Chijujunal chiya kan i utz ti laj ik'aslemal xaq i ch'oj chi kixtijin chu'anik k'a arewi wo'or;

⁹ moqxa i Dios kujalwachij uch'ob'onik xaq kik'aw i roywal, keje ile kojkam taj.”

¹⁰ I Dios xrilo wach kki'an te i winaq re i tinimit Nínive chi lik xkimayij u'anik i mak atzalal xaq i utz ti laj kik'aslemal, rumali xuch'ob'o chi ku'an ti k'ax chke chi ub'im te chke.