Job 36 - Wuj Pa K'ubultzij

Ukajmul ulapanik ma Eliú

^1-2 Chawoy-ej ni jub'i' man yin katintijoj na; man lik k'a o kinb'ij chrij ni'pa utz chi ku'an i Dios.

³ Kinya ni retamaxik ni'pa weta'am, k'utb'al re chi in-Dios chi aj-Anol i kaj ulew lik qatzij i kub'ij.

⁴ Lik saq laj tzij kinb'ij chawe chi kinb'ij ti jun tzij we qatzij taj; man i jun chi o chawachi, lik suk'ul uno'oj!

⁵ I Dios lik Ronojel Ktiki che xaq lik nim unojb'al, xaq tzel ti kril i jun chi nti umak;

⁶ Ire kresaj uk'aslemal utz ti laj winaq, xwiri ku'an i suk'ul laj atb'al tzij chke i nib'a'ib'.

⁷ Lik arewi keuto i winaq chi suk'ul kik'aslemal; keukub'a i ajawinelab' pkikub'ib'al chi o u'ij xaq k-on chke chi kqaj ti ki'ij.

⁸ Xwiri we je yut'um ru' i karena, i uk'axk'ol lik keuk'achirsaj,

⁹ i Dios kuk'ut ni i mak atzalal chke chi xki'ano xaq wach u'anik xki'ano are xetzaq chupam i u'anik nim che kib'.

¹⁰ Kch'aw ku' re kub'ij chke chi utz ti kki'ano xaq re keu'atij chu'anik i mak atzalal.

¹¹ We kekojon che xaq kkiya kib' chu'anik wach kraj Ire, lik kkitij ni uri i utz ronojel ij re i kik'aslemal.

¹² Xwiri we kekojon taj, kekamik xaq keqaj pa jul chuxe'el i retamaxik kumal.

¹³ I itzel laj taq winaq, lik kpe koywal; tupu je o pa tojpen, ike lik kkitz'onoj ti kitob'al che i Dios.

¹⁴ Lik k'a je ak'alab' winaq, kekamik; i kik'aslemal lik k'ixb'al kk'is wi.

¹⁵ Rumal i tojpen, i Dios kresaj i jun pa k'ax; rumal i uk'axk'ol, Ire ku'an che chi kuta ub'e.

¹⁶ Xaq yet xatuto chwach i nim laj k'ax, lik xunojsaj uwi amexa che i jalajuj taq tijawik re, xaq uya'om ronojel i elik chisaq chawe.

¹⁷ Chawe yet x-aljin wi i tojb'alil chi kuya i Dios chke itzel laj taq winaq, lik kattiki ti uri chu'atixik i u'atik tzij pawi xaq i uya'ik i utojb'alil chawe.

¹⁸ ¡Chawila awib', mattzaq chupam i ch'ob'onik re uk'amik mer rumal jun utz taj, xaq maya ak'ux che uk'iyal mer.

¹⁹ Are at o pa k'ax, ile lik katuto taj mitene asik'inik xaq ronojel ni'pa o pa'ab'.

²⁰ Mak'is ak'ux man keuriqa a'ab' are ksachsax kiwach konojel i jalajuj taq tinimit.

²¹ ¡Chawila awib', mattzalij chik chupam i mak atzalal, man yet ya xuk'am apam i Dios ru' i tojpen le.

²² Chakojo retalil i nim laj ucho'ab' i Dios, mijun tijonel kupaj taq rib' ru' Ire.

²³ Mijun kb'in che wach taq i ku'ano, xaq mijun kb'in che wach taq i utz taj chi xu'ano.

²⁴ Konojel i winaq re i jyub' ta'aj, lik kkib'ixaj i nimaq taq u'anoj, xaq keje yet, chk'un chak'ux ukojik u'ij.

²⁵ Konojel i winaq lik kkilo, tupu chinaj kkil panoq.

²⁶ ¡I Dios lik nim u'ij chi kojtiki ti chuk'amik usuk' xaq lik kojtiki ti chretamaxik ujunab'!

²⁷ Ire kuk'ulaj i tz'uj re ya chupam jun yab'al re, te'uri k-on ni jab' che.

²⁸ I jab' le lik chupam i sutz' kpe wi, te'uri lik ktixixik koltzaq pkiwi i winaq.

²⁹ ¿Pachin kk'amaw usuk' ile chi keb'in i sutz' chikaj xaq are kraqlaj upam i ray chikaj?

³⁰ I Dios ku'an che i ray chi k-e b'i raqan u'ab' puwi i mar, keje ile kuch'uq kan uwi i nim laj ya.

³¹ Keje kilik i winaq ile ku'ano xaq kuya k'iyal taq b'iroxik chke re kkitijo.

³² Ire kuchap i ray pu'ab' xaq kuk'aq b'i che i k'ijib'al chrij ipa kraj wi Ire.

³³ I ray chi kraqlaj upam, kutzijoj i Dios; i nim laj jab' tew upam, kutzijoj i roywal i Dios.