JEREMÍAS 6 - Wuj Pa K'ubultzij

I je ajch'oj kkisutij rij i tinimit Jerusalén

¹ ¡Ix jutzob'aj re ma Benjamín chix-anmajoq, chitzukuj i k'ijib'al re tob'al ib', chixel chila pa tinimit Jerusalén! Chixut'ij i trompeta pa Tecoa, chiyaka jun ilb'al re chila Bet-haquerem, man jun uyej, jun nim laj k'ax kpe pqawi chi upetik pa moxab'.

² I tinimit Sion are pacha jun chom laj semsik ta'aj, chi kwulijsax na.

³ Ipa ke'e wi ajyu'ul taq chij ru' kichij, lik je sutinnaq chkij chkiwach, xaq ni'pa i kichij ke'esan pa taq kitzal.

⁴ I je ajch'oj chkij kkib'ij: “¡Chiyijb'a iwib' chu'anik ch'oj chkij, chixpetoq chqa'ana ch'oj chkij are tik'il ij! Xwiri, ¡To' qawach yoj! Man ya xqaj i ij xaq ya knajtir i a'ab' chqe.

⁵ ¡Chqa'ana ch'oji chkij cha'ab', xaq chqawulijsaj i kitak' taq ja!”

⁶ I Ajwal chi ronojel ktiki che uya'om i taqaniki: “Chik'atzij i che' re anb'al re i elb'al b'ik pa tinimit Jerusalén anb'al ch'oj chrij. I tinimit lik k'oqtal chik rumal uya'ik jun tojb'alil puwi man lik to' kamsanik ku'ano.

⁷ Pa Jerusalén kwinaqir wi i mak atzalal, keje pacha i ya chi kb'olb'at li chupam jun k'otom. Lik xwi ktataj i kamsanik xaq u'anik i utz taj, lik xwi i sokonik xaq i uk'axk'ol kwil chila.

⁸ Ix aj Jerusalén, chimayij u'anik ni'pa i utz taj le, man we kimayij taj, kinjek' wib' iwu' kin-an ni chiwe pacha jun tz'inilik jyub', kintalb'a ni kan uwach i tinimit.”

Utzijoxik uya'ik i tojb'alil

⁹ I Ajwal chi ronojel ktiki che kub'ij: “I aj Israel chi je kanajnaq kanoq lik ketzukux na xaq kkamulix ni kitzukuxik, pacha ukamulixik utzukuxik i uva chwi raqan, chuxol taq u'ab', man keje ile lik mijun chik uva ksach kanoq.

¹⁰ Yin xinla' uwach che: ¿Pachin kintawik we kinch'aw chke, we kinya utzijol ile chke? Lik tz'apil kixikin, Ajwal, rumali ketan taj, kkiyo'ya i atzij, lik kumaj ti kiwach.

¹¹ I awoywal yet, Ajwal, u'anom chwe chi lik mi'naq woywal xaq kintiki ti chik chu'atixik.” I Ajwal xub'ij chwe: Chawesaj awoywal chke i alab'om aj pa taq b'e, chke i alab'om chi to' kkok'aj kib' pa taq tzob'ajil; xaq kekichap i winaq chi je k'ulanik, junam ku' i kixoqil xaq i rijab' chi k'iyal junab' chik o chke.

¹² I kachoch, kulew, xaq i kixoqil ke'ax ni pki'ab' jub'an chik. Man kinyak ni in-ab' chuya'ik i tojb'alil pkiwi konojel i je jeqel pa tinimit le. Yin in Ajwal, xinb'iw ile.

¹³ Konojel che ch'utiq che nimaq, xwi kkich'ob' utzukuxik i ch'akanik ru' ela'; I profeta xaq ajsujul sipon, konojel is je t'oronel.

¹⁴ Kkib'ij chi nti soktajnaq che intinimit, kkib'ij chi ronojel is utz u'onom, xwiri ronojel is utz taj.

¹⁵ ¡Lik utz te'eq wetene kixk'ix jub'i' chu'anik i b'iroxik le chi kinch'ij ti rilik Yin! Xwiri, keje ti ile ki'ano yix, lik kixk'ix ti pich' che, ¡Lik iweta'am tene chik wach taq i k'ixb'alil! Rumali, are kinya utojb'alil chiwe, kitakij ni iwaqan xaq kixtzaq ni pacha i jub'an chik. Yin in Ajwal, xinb'iw ile.

Kiqelanik aj Israel

¹⁶ I Ajwal kub'ij che utinimit: “Chixtak'al pa taq b'e xaq chiwila, chitz'onoj ipa o wi i ujer taq b'e, ipa o wi i utz laj b'e, chixb'in uri che man kiriq uri i uxlanem.” Xwiri ike kkib'ij, “kqaj taj, kqaj ti kojb'in che.”

¹⁷ I Ajwal xeukoj chajinelab' xaq xub'ij che i tinimit: “Chitatb'ej are kxut'ix i trompeta.” Xwiri i tinimit xub'ij: “Kqaj ti utatb'exik ile.”

¹⁸ Rumali i Ajwal kub'ij: “Chitatb'ej ix nimaq taq tinimit, chiwetamaj wach kuk'ulmaj intinimit.

¹⁹ Winaq chi ix aj chwach ulew, chita iri: Kink'am li jun nim laj uyej puwi i tinimiti, rumal i utz taj chi kki'ano, man xkikoj ti retalil che intzij, are i xki'ano, xkixutuj in-atb'al tzij.

²⁰ ¿Wach uchak kik'am li pom chwe chi aj pa Sabá, xaq kik'am taq li muy laj taq es chwe ke aj najil taq tinimit? Yin kumaj ti inwach i umuyal uk'ok'al chi kisujuj taq chwe xaq mitene i jub'an chik chikop chi kiporoj chinwach.”

²¹ Rumali i Ajwal kub'ij: “Kin-an ni che i tinimit le kutakij nu b'i rib' xaq ktzaq na, qajawxelab' xaq alk'uwalxelab', winaq chi ix o naqaj xaq i amiy, xaqjun kamik kki'ano.”

Umajik ulew xjeqan li k'a pa moxab'

²² I Ajwal kub'ij: “K'a naj che i ulew pa moxab' o jun nim laj tinimit chi lik o ucho'ab' kuyijb'a li rib' che i petik.

²³ Kiyijb'am kib' ru' kich'ojb'al chi are i ch'ab' xaq i che' jutz utzam; je are i utz ti laj taq winaq lik kkil ti pich' tob'al wachij, i kisik' lik keje pacha uch'awb'al i mar, xaq je annaq rij taq kaway. Lik je yijil chu'anik ch'oj chrij i tinimit Sion.”

²⁴ I winaq pa tinimit Jerusalén kkib'ij: “Qatom i tzijonik xaq i xib'rikil u'anom chqe chi nti chik qacho'ab'; lik kqana uk'axk'olil xaq i uyej, pacha jun ixoq are kalanik.

²⁵ ¡Mix-e pa taq es xaq mix-e pa taq b'e! ¡I ajch'oj lik uyijb'am rib' ru' rajch'ojb'al, lik xaipa o nimaq taq xib'rikil!”

²⁶ ¡Umi'al intinimit, chakojo a'u' as k'utb'al re uk'axk'ol, chab'alkatij awib' pa taq chaj, chixb'isonoq xaq lik chixsik'in che o'ej, keje pacha are kkam jun iwak'al chi xa jun olik. Man i jun chi ksachaw qawach, lik ya kk'un chu'anik ch'oj chqij!

²⁷ I Ajwal xub'ij chwe: “Yin kinya chaqul chi ka'an jun ilb'al re che intinimit. Chak'ama kipam ilb'al re wach u'onom kik'aslemal.”

²⁸ Ajwal, konojel ike le lik je qelqel, lik je ajnuk'ul tzij laj taq winaq xaq lik xaqmanal kki'ano, lik kkina taq ike pacha taq je anch'ich' xaq i ch'ich'.

²⁹ I wal are lik ko kuwaluj i tew, ku'an che i a' chi kuyayursaj i raxch'ich'. Lik nti uchak uri chi kejos-ix taq ile, man i utz ti laj taq winaq lik kesach taj.

³⁰ Rumali chi kya' ni pkib'i: “Saq-o'oj chi uk'aqik chub'i re,” man yet Ajwal, je aya'om chik junla.