JEREMÍAS 52 - Wuj Pa K'ubultzij

Rajawinik ma Sedequías

¹ Ma Sedequías o te'eq jun juwinaq (21) junab' che are xujeq ajawinik, xrajawin julajuj junab' pa tinimit Jerusalén. I ub'i uchuch Hamutal, umi'al ma Jeremías, xaq aj Libna.

² Xwiri i x-ono lik utz taj chwach i Ajwal, xaqjunam ru' pacha xu'an i ma Joacim.

³ Rumali i Ajwal xmi' roywal che i tinimit Jerusalén, xaq che i tinimit Judá, rumali xeresaj b'i chwach. Chrijil chik ile i ma Sedequías xuqel i ajawinel re i tinimit Babilonia.

Utzaqik i tinimit Jerusalén

⁴ Che i lajuj ij re i lajuj ik' re i ub'elej junab' che i rajawinik ma Sedequías, i ajawinel ma Nabucodonosor xumaj b'i ub'e junam ku' konojel achiyab' chi je yij che i ch'oj, xe'e chu'anik ch'oj chrij i Jerusalén, lik xkisutij rij. Xe'uxlan pan chwach, xaq chrij chwach xki'an ral taq cholchol yoch re kelb'al b'ik are kki'an ch'oj chkij.

⁵ I tinimiti lik sutim rij k'a che i junab' julajuj re rajawinik ma Sedequías.

⁶ Che i b'elejeb' ij, re ukaj ik', che i junab' le xk'iyar i wa'jal pa tinimit, i winaq lik nti chik o ku' re kkitijo.

⁷ Are uri xki'an jun tel chke i tapial re i tinimit, tupu i aj Caldea kisutim te'eq rij, i ajawinel xaq i achiyab' chi je yij che i ch'oj xe'anmaj b'i cha'ab' pa tinimit. Xe'el b'i che i uchija chi o chuxol i keb' tapial che i b'e re i tikonb'al kotz'ij re i rachoch i ajawinel, xaq xkimaj b'i b'e chi k-e chwa ta'aj re i Jordán.

⁸ Xwiri i achiyab' chi je yij che i ch'oj aj Caldea xeterej b'i chrij i ajawinel ma Sedequías, k'a chwa ta'aj Jericó xekimaja wi. Konojel i achiyab' chi je yij che i ch'oj chi je re ma Sedequías xko'taj kanoq xaq xkikichersaj b'i kib'.

⁹ I aj Caldea xkichap b'i ajawinel, te'uri xkik'am b'i chwach i ajawinel aj Babilonia chi o pa Ribla, che i ulew Hamat. Chila i ma Nabucodonosor xu'at tzij xaq lik xuya utojb'alil che ma Sedequías.

¹⁰ Lik chwach i ma Sedequías are xutaq uworik pkiqul i rak'al xaq keje ile xu'an chke konojel i utz laj taq winaq chi o ki'ij chila Judá.

¹¹ Te'uri xutaq relsaxik ub'a'wach ma Sedequías, xaq xutaq uximik ru' karena re kkik'am b'i pa Babilonia, chila xk'iji wi prexil k'a arewi are xkamik.

Usachik uwach i rachoch i Ajwal

¹² Che i lajuj ij re ujo' ik' re i b'elejlajuj junab' re rajawinik ma Nabucodonosor, ajawinel re i tinimit Babilonia, ma Nabuzaradán, uwi ujolom i ajawinel xaq aj-ok'al utzam i ajchajinelab' re i rachoch i ajawinel, xupon k'a pa Jerusalén

¹³ lik xunak' a' che i rachoch i Ajwal, che i nim laj rachoch i ajawinel xaq konojel i ja chi je o pa tinimit, xwiri lik nab'e xunak' a' chke i kachoch i winaq chi o ki'ij xaq etamam kiwach,

¹⁴ xaq achiyab' chi je yij che i ch'oj aj Caldea chi je rachi'ilam b'ik, xekiwulijsaj i nimaq taq tapial chi usutim te'eq rij i Jerusalén.

¹⁵ Te'uri ma Nabuzaradán xresaj b'i tinimit Babilonia pa rulew, ile je are je o te'eq kan pa tinimit xaq i jub'an chi xkiya kiwach ru' i ajawinel re Babilonia, xaq i jub'an chi je kachi'il kan i je aj-anol i jalajuj taq b'iroxik pa ab'aj.

¹⁶ Xwi xeuya kan jujun winaq chi lik mas je nib'a', re kkitik i uva xaq re kechakun chwach ulew.

¹⁷ I aj Caldea xki'an ch'aqa taq chke i b'iroxik chi re anch'ich' chi o prachoch i Ajwal: Raqan ja, ukub'ib'al ja xaq i nim laj k'olb'al ya, xaq lik xkik'am b'i ronojel i anch'ich' pa tinimit Babilonia.

¹⁸ Xaq lik xkik'am b'i yab'al chaj, jokb'al ulew, k'upb'al chij re tzuk'b'al, nimaq taq laq, nimaq taq lochb'al xaq ronojel i chapb'al chi anch'ich' re ukojik u'ij i Ajwal.

¹⁹ Xaq keje xu'an i aj-ok'al utzam chke i ajchajinelab', xuk'am b'i ronojel b'iroxik chi an-o'oj xaq i saq-o'oj: Nimaq taq ripraq laq, sib'al, nimaq taq laq, yab'al chaj, tikb'al kantela, nimaq taq lochb'al xaq i tu'b'al re i uwa'al uva muqb'am re sujunik.

²⁰ Chi je are i keb' tak'taq aqan, i nim laj k'olb'al ya xaq i kab'lajuj torib' re anch'ich' chi je paqewnaq xaq ronojel ukub'ib'al chi ajawinel mam Salomón utaqom u'anik re kki'an i rachoch i Ajwal, lik x-an ti tikilem chupajik i ralil.

²¹ Lik chkijujunal i tak'taq aqan le o wajxaqib' mejelem ch'uk che unajtil kij, i upam o jo'ob' mejelem ch'uk che, i upimol i anch'ich' o kajib' ab'aj che xaq lik tel upam.

²² Lik chkijujunal i tak'taq aqan le o te'eq jun sotsik anch'ich' puwi, chi o keb' mejelem ch'uk che unajtil rij, ronojel i chrij chwach o te'eq jun k'ark'ar anch'ich', chi xaq lik wiqtal ru' uwach granada, chekeb' tak'taq aqan le lik je xaqjun.

²³ Che i k'ark'ar anch'ich' re chkijujunal i sotsaq, o te'eq jo'winaq (100) uwach granada chke ile waqlajuj kajwinaq (96) je o li chisaq.

I aj Israel xe'elsax b'i pa cho'ab' chwach kulew

²⁴ I aj-ok'al utzam chke i ajchajinelab' lik xuchap b'i ma Seraías, chi atz laj ajsujul sipon, ma Sofonías, ajsujul sipon chi teren chrij rumal lik o u'ij xaq kmajaw che, xaqjunam ku' oxib' ajchajinel re i rachoch i Ajwal.

²⁵ Chke i winaq re i tinimit are xuchap b'i ajpatan chi keutaq i tzob'ajil chi je yij che i ch'oj, je wuqub' achiyab' chi je utaqon i ajawinel chi je o te'eq chila pa tinimit, i aj-ok'al utzam i tzob'ajil ke achiyab' chi je yij che i ch'oj, chi xaq keumolo i keutijoj che i ch'oj, xaq je oxwinaq (60) achiyab' chi lik nim ki'ij xaq etamam kiwach chila pa tinimit.

^26-27 Ma Nabuzaradán xeuk'am b'i konojel ike le chwach i ajawinel re Babilonia, chi o te'eq pa Ribla, prulew ma Hamat. Chila i ajawinel re i tinimit Babilonia xutaq kikamsaxik. Keje uri ile, i aj Judá xe'elsax b'i pkitinimit.

²⁸ I kik'iyal i winaq chi xeresaj b'i ma Nabucodonosor are iri: Che uwuq junab' re rajawinik xeresaj b'i oxib' julajujwinaq wuqmo' (3,023) winaq pa Judá.

²⁹ Che i wajxaqlajuj junab' xeresaj b'i kab'lajuj juwinaq kamo' (832) pa Jerusalén;

³⁰ che oxib' juwinaq (23) junab', i ma Nabuzaradán xeuk'am b'i jo'ob' wuqlajujwinaq jumo' (745) re i tinimit Judá, chi xutz'aqatsaj lajujwinaq julajujmo' (4,600) winaq chi xe'elsax b'ik.

Ma Joaquín xo'taxik xaq xya' u'ij pa tinimit Babilonia

³¹ Che i jo'ob' juwinaq (25) ij re i ik' kab'lajuj re i wuqlajuj juwinaq (37) junab' re relsaxik b'i ajawinel ma Joaquín pa Judá, xujeq ajawinik pa tinimit Babilonia i ajawinel Evil-merodac, chi lik xu'an utz che rib' ru' ma Joaquín, rumali xresaj li prexil,

³² lik utz rilik xu'ano xaq lik mas k'ax xuna chkiwach i jub'an chik ajawinelab' chi je o ru' chila pa tinimit Babilonia.

³³ Keje u'anik ile, chi ma Joaquín xtiki chrelsaxik u'u' chi kukoj te'eq chila prexil, xaq kutij ni uwa ru' i ajawinel k'a kk'is ni uk'aslemal.

³⁴ Xwi ta la ile, lik keje ile x-an che ronojel uk'aslemal k'a xkam na, ma Joaquín lik xya' uwa, xaq ronojel ni'pa i rajwaxik che rumal i ajawinel re i tinimit Babilonia.