JEREMÍAS 51 - Wuj Pa K'ubultzij

Usachik uwach i tinimit Babilonia

¹ I Ajwal kub'ij: Kintaq nu b'i jun nim laj tew re kuk'is kiwach aj Babilonia xaq aj Caldea.

² Kin-an ni chke chi je ajch'oj chkij kki'an ni che i Babilonia pacha trigo chi kk'aq b'i pa tew; kin-an ni che chi mijun winaq kkanaj kan prulew. Are keuriqa i ij re i kamik, lik k'ulala kek'un ni ajch'oj chrij.

³ ¡Lik chkiyijb'a i kich'ab' i ajk'aqanel! ¡Chkikojo i tob'al kib'! ¡Lik miwil tob'al kiwach i k'ojolab' winaq re Babilonia; lik chisachsaj kiwach konojel achiyab' chi je yij che i ch'oj!

⁴ Che ronojel i tinimit ke aj Caldea i winaq kejab'i ni kan xol taq b'e,

⁵ tupu i tinimit Israel xaq i tinimit Judá je makunnaq chinwach Yin xaq lik kinojsam i kitinimit che i mak atzalal, Yin in Ajwal, chi ronojel kintiki che, chi in lo'laj Dios ke aj Israel, lik je wo'tam ti kanoq.

⁶ ¡Chix-anmaj pa Babilonia! ¡Pachin ktiki che chuto rib'! ¡Mixkam taq rumal umak ire le! Iri lik are u'oril i woywal re u'anik uk'exel che, lik kinya ni utojb'alil pacha kmajaw che.

⁷ I tinimit Babilonia are te'eq jun tu'b'al an-o'oj pin-ab' Yin chi lik ke'u'ab'arsaj konojel winaq chwach i jyub' ta'aj. I nimaq taq tinimit kkitu' te'eq uwa'al uva muqb'am le xaq lik ksach kinojb'al.

⁸ Xwiri i tinimit Babilonia lik juntir xtub'krijik. ¡Lik chixo' rumal ire! Chik'ama li kunb'al re kukunaj i sokonik, ilb'al re we kkuntajik.

⁹ Ya xqakoj kunb'al che i tinimit Babilonia, xwiri lik xkuntaj taj. ¡Chiya kanoq! Jo'; chojel b'i chi, chqajujunal jo pqatinimit, man i kamik chi x-anik kupon k'a chikaj, kwalijik kupon k'a pa taq sutz'.

¹⁰ I Ajwal xuya u'ij ronojel i o qe che. Chixpetoq, jo chulapik pa Sion wach u'anom i Ajwal chqe, chi qa-Dios.

¹¹ I Ajwal kraj kusach uwach i tinimit Babilonia, xaq xuk'unsaj saq chkiwach i aj ajawinelab' re Media anb'al re jun ch'ob'onik chke konojel. Lik are u'anik uk'exel i le xu'an i Ajwal chke rumal xki'an che i rachoch. ¡Chiyijb'a i ch'ab'! ¡Cheikojo i tob'al ib'!

¹² ¡Chiya ilb'al re i ch'oj chrij i tapial re i tinimit Babilonia! ¡Cheikojo mas ajchajinelab'! ¡Cheikojo chik mas ajchajinelab' chi je yij che i ch'oj! ¡Lik chisutij kij! Man i Ajwal lik xuyijb'a xaq lik xu'an i anik chi uch'ob'om xaq utzijom chkij konojel i winaq re i tinimit Babilonia.

¹³ Yet, tinimit Babilonia, chi at o naqaj chke i nimaq taq raqana chi xaq lik k'i ab'eyomal olik, ¡Lik ya xupon i ij re kk'is ak'aslemal, re usachik awach!

¹⁴ I Ajwal chi ronojel ktiki che lik usaqim puk'aslemal: “¡Chi lik kinya ni k'iyal taq ajch'oj chawij, pacha ral taq sak', ike le lik kkib'ixaj ni i ch'akanik chawij yet!”

B'ix re kojb'al u'ij i Dios

¹⁵ I Ajwal, ru' ucho'ab', xu'an ulew; ru' uno'oj xukub'a i jyub' ta'aj; ru' ub'iwil xurip i kaj.

¹⁶ Ru' uch'awb'al i jab' ku'an che i ya chi krujuj pa taq sutz' chila chikaj, ku'ano chi kewalij b'i sutz' k'a pa taq uchi' i jyub' ta'aj, xaq lik ku'ano chi kreplaj utzunb'al i ray chupam i jab' xaq kresaj li tew ipa uk'olom wi.

¹⁷ Lik konojel i winaq je b'uy xaq lik nti kino'oj. I tiox chi xaril je antalik kkiya kk'ix i je aj-anol ke, man lik je t'oronel laj taq k'exwach chi xaq lik nti kik'aslemal;

¹⁸ ile xa je b'iroxik chi nti ki'ij, xa ktze'ex kipalaj, man i Ajwal, kusachsaj ni kiwach are ku'at tzij.

¹⁹ ¡Lik junwi i Dios re ma Jacob, chi xu'an ronojel ni'pa olik! Ire xucha i tinimit Israel xaq x-on re che. Ub'i: Are i Ajwal chi ronojel ktiki che.

Babilonia, chapb'al re i Ajwal re yab'al utojb'alil

²⁰ ¡Tinimit Babilonia, yet lik at keje pacha jun inch'ayb'al nim, xaq at inch'ojb'al re i ch'oj! At inchapb'al na re kinwulijsaj i nimaq taq tinimit xaq re kinsachsaj ni kiwach i nimaq taq ajawinik.

²¹ Katinchapb'ej na re keinmutma i kaway, xaq i winaq chi je ajrij taq kaway, ch'ich' re b'inb'al xaq i je aj-ok'anel ch'ich' le.

²² Katinchapb'ej re keinmutma i achiyab', ixoqib', rijab', k'ojolab', alab'om xaq altom.

²³ Katinchapb'ej re keinmutma ajyu'ul chij xaq konojel i chij, aj-anol uwach ulew xaq i b'oyexab', aj-ok'al utzam i jalajuj taq tinimit xaq i nimaq kipatan.

Tojb'alil puwi i Babilonia

²⁴ Xwiri lik chiwach yix kinya ni utojb'alil chke aj Babilonia xaq chke konojel aj Caldea pacha kmajaw chke, rumal i utz taj chi xki'an che i Sion. Yin in Ajwal, kinb'ij.

²⁵ Yin inya'om ti inwach awu', utzam jyub' sachanel, chi kasachsaj uwach ronojel i jyub' ta'aj. Yin in Ajwal, kinb'ij. Kinyak ni in-ab' re uya'ik utojb'alil chawe, katinb'alk'atij na li pa taq siwan ab'aj, lik kin-an ni chawe pacha jun jyub' k'atnaq uwach.

²⁶ Lik mijun chke i ab'aj re atinimit chi wulijnaq utz re kyak taq ja tak'taq. Lik at keje na pacha jun tz'inilik jyub' chaqij ronojel ij saq. Yin in Ajwal, xinb'iw ile.

²⁷ ¡Chiya jun k'utb'al pa tinimit re i ch'oj! ¡Chixut'ij i trompeta xaq cheiyijb'a i nimaq taq tinimit re kki'an ch'oj chrij i tinimit Babilonia! ¡Chiyaka i ajawinik re i Ararat chrij ire, re Mini xaq re i Askenaz! ¡Chitzukuj jun aj-ok'al utzam i ch'oj! ¡Chkich'ija i b'e i kaway chi je ajch'oj pacha i sak' chi petnaq koywal!

²⁸ Cheiyijb'a i nimaq taq tinimit re kki'an ch'oj chrij; cheiyijb'a i ajawinelab' aj pa Media, xaq i aj-ok'al utzam i jalajuj taq tinimit xaq i nimaq kipatan, xaq ronojel i jyub' ta'aj chi kki'at tzij ike puwi.

²⁹ I ulew lik kyikyatik xaq lik ksiksatik, man i Ajwal lik ktijin chu'anik wach xuch'ob' u'anik che i Babilonia chi ku'an na pacha jun tz'inilik jyub' chaqij chi lik tzel ktzunik.

³⁰ I achiyab' chi je yij che i ch'oj aj Babilonia, lik xkimayij u'anik ch'oj; Man nti chik kikowil xaq lik xk'is kicho'ab', lik je pacha taq chik ixoqib'. I nimaq taq kitinimit lik xmaj kan chke i kachoch xnak' a' chke.

³¹ Lik kiterb'em kib' i ajb'il tzijonik tzij chub'ixkil che i ajawinel re Babilonia, chi utinimit lik ronojel xch'akik.

³² I ajch'oj chrij xk'iji che ik'awb'al chke i raqana, xunak' a' chke i k'ijib'al re tob'al ib', i achiyab' chi je yij che i ch'oj lik xkixij kib'.

³³ Man i Ajwal chi ronojel ktiki che, chi ki-Dios aj Israel, kub'ij: “¡I tinimit Babilonia lik keje pacha i k'ijib'al ipa kya'yax wi trigo pu'ijlal, man ya kuriq i ij re i molonik!”

^34-35 Kub'ij i Jerusalén, tinimit Sion: I ma Nabucodonosor, chi ajawinel re i tinimit Babilonia, xu'an ch'aqa taq chwe xaq xinutijo, xu'an kan chwe pacha jun laq chi nti chik upam. Xinub'i' b'ik pacha jun nim laj itzel chikop aj pa mar; lik xunojsaj upam che i chom laj tijawik re chwe. Ronojel i xk'is taj xuk'aq b'ik. ¡Wo'or chtzaq ni puwi i tinimit Babilonia uqajik in-ij xaq ronojel i k'ax chi xu'an chwe le! ¡Xaq lik chtzaq ni pkiwi i winaq aj Caldea kumal i winaq chi xinkikamsaj!

Sujunik che i tinimit Israel

³⁶ I Ajwal kub'ij: “Yin kin-an ni atb'al tzij chawe, kin-an ni uk'exel chke i ajch'oj chawij. Lik keinchaqijsaj i raqana xaq i ralaxb'al taq ya re i tinimit Babilonia,

³⁷ lik kkanaj na pacha jun k'ijib'al wulijnaq, chi lik kik'ijib'al chik tz'i aj pa taq es, lik are jun k'ijib'al chi lik mijun winaq kjeqi chik chwach, konojel kkixij ni kib' che ru' jun nim laj xib'rikil.

³⁸ Konojel ike le lik keyerer na pacha koj xaq keraqaw na pacha ral taq koj ch'utiq.

³⁹ Are lik kejuluw rumal uk'axk'ol i ij, Yin kinya ni chke chi kkitu' kiya' chi keu'ab'arsaj xaq lik kusachsaj kijolom. Keje ile ketzaq ni che jun nim laj waram chi lik kk'un ti chik saq chkiwach. Yin in Ajwal, xinb'iw ile.

⁴⁰ Te'uri keink'am b'i pa kamsab'al, pacha kik'amik b'i ral taq chij, me', xaq i ti'ojib' taq chij.”

Utzaqik i tinimit Babilonia

⁴¹ ¡Babilonia, tinimit chi lik nim u'ij chwach ronojel i jyub' ta'aj, lik xtzaqik, lik xch'akik! ¡Lik kkixij kib' i nimaq taq tinimit are kkilo!

⁴² I mar lik xumuq b'i tinimit Babilonia, lik xuch'uq ru' nimaq taq ub'olol.

⁴³ I utinimit lik xeu'an pacha jun ch'am ti laj tz'inilik jyub' chaqij, lik chaqij ulew chi xaq lik utukel, lik mijun winaq jeqel chila, xaq lik mijun kik'aw chila.

⁴⁴ Kinya ni utojb'alil che i dios Bel pa Babilonia, kin-an ni che chi kuxab'uj na li utijom b'ik, xaq lik mijun chke i nimaq taq tinimit ktzalij chal chutzukuxik. ¡Ya xetzaq i tapial re Babilonia!

⁴⁵ Intinimit, chat-el chila. ¡Lik chkijujunal chkito kik'aslemal chwach i nim laj woywal!

⁴⁶ Lik mixok il, xaq mixij iwib' che i utz ti laj taq tzij chi klap pa tinimit. Junab' junab' jalajuj i utz ti laj taq tzij klapik, tzij re ch'oj pa tinimit xaq i ch'oj chkixol aj-ok'al utzam i jalajuj taq tinimit.

⁴⁷ Lik keje uri ile, kuriq ni ij chi kinya utojb'alil chke i tiox chi xaril je antal pa tinimit Babilonia, ronojel i tinimit kqajsax ni u'ij xaq knoj ni uwach che kich'akul i kamnaq.

⁴⁸ I kaj xaq i ulew xaq ronojel ni'pa i o chwach kekikot na are ktzaq i tinimit Babilonia, are kek'un i ajsachsanel ke pa moxab'. Yin in Ajwal, xinb'iw ile.

⁴⁹ Lik qatzij, i tinimit Babilonia ktzaq na rumal i kamsanik chi xu'an che i tinimit Israel, xaq rumal i kamik chi xu'an chwach ronojel i jyub' ta'aj.

Tzijonik chke aj Judío chi je o pa tinimit Babilonia

⁵⁰ Yix, chi xixtotaj chwach i kamik, chix-anmajoq, lik mixtak'i che i anem, tupu are k'a naj chik ix o wi, chich'ob'o i Ajwal xaq chk'un chik'ux i tinimit Jerusalén.

⁵¹ Yix kib'ij: “Kqana i k'ixb'alil are kqata wach i utz ti laj taq tzij chi kkib'ij chqij. I uqajsaxik qa'ij k-aljin che i qapalaj, man i winaq aj naj je oknaq chupam i k'ijib'al chi lik ch'am prachoch i Dios.”

⁵² Xwiri i Ajwal kub'ij: “Lik kuriq ni ij chi kinya utojb'alil chke i tiox chi xaril je antal chila pa tinimit Babilonia, xaq lik che ronojel i rulew kejilaw ni je soktajnaq.

⁵³ Tupu i tinimit Babilonia kel b'i k'a chikaj re kukoj u'ij xaq kukub'a li ucho'ab' chila, lik nti k-ono man k'a chila na kintaq nu b'i i ajch'oj chrij re kusachsaj uwach. Yin in Ajwal, xinb'iw ile.”

Uwulijsaxik i tinimit Babilonia

⁵⁴ K'a pa tinimit Babilonia ktataj i sik' re uk'axk'ol, lik k'a pa tinimit ke aj Caldea kupon utayik jun nim laj luk'latik.

⁵⁵ Are i Ajwal, chusachsaj uwach i tinimit Babilonia xaq chu'atij i ch'oqowik. I je ajch'oj, pacha i ya chi lik krojoj uwi, ketzaq ni puwi ire pacha uch'awb'al jun nim laj ya.

⁵⁶ Xek'un chusachsaxik uwach i tinimit Babilonia; xaq chkichapik i achiyab' chi je yij che i ch'oj xaq lik xki'an ch'aqa taq che i k'aqb'al kich'ab'. Man i Ajwal lik are jun Dios chi lik chkijujunal kuya utojb'alil chke pacha kmajawik.

⁵⁷ I Ajawinel, chi are i Ajwal, chi ronojel ktiki che, kub'ij: “Kein-ab'arsaj ni je aj-atzil re i tinimit Babilonia, chke o kino'oj xaq chke aj-ok'al utzam i jalajuj taq tinimit, xaq i nimaq kipatan xaq i achiyab' chi je yij che i ch'oj, lik ketzaq ni che jun nim laj waram ronojel ij saq chi lik kk'un ti chik saq chkiwach.

⁵⁸ Yin in Ajwal, chi Ronojel Kintiki Che, kinb'ij: I tapial chi nimaq uwach re i tinimit Babilonia, lik kewulijsax ni konojel, xaq i nimaq taq uchija kjuluw ni pa a'. Lik nti rajwaxik i kichak i nimaq taq tinimit chi xki'ano, man i kichak lik kk'at ni pa a'.”

Uk'amik b'i tzijonik re ma Jeremías pa tinimit Babilonia

⁵⁹ Che ukaj junab' re rajawinik ma Sedequías, ajawinel re Judá, i profeta ma Jeremías xuya jun tzijonik che ma Seraías, chi uk'ojol ma Nerías xaq ri umam ma Maasías. Ma Seraías rachi'ilam b'i ajawinel ma Sedequías che u'enam pa tinimit Babilonia, chi o chuqul kuyijb'a ipa kwar wi i ajawinel.

⁶⁰ I ma Jeremías utz'ib'am te'eq jun tzijonik chupam jun wuj chrij ronojel i k'ax chi kpe puwi i tinimit Babilonia, chi are ronojel ni'pa tzib'tal chrij i tinimit.

⁶¹ Xaq xub'ij che ma Seraías: “Are katupon pa tinimit Babilonia, lik chariqa u'anik are kawajlaj ronojel i tzijoniki.

⁶² Te'uri kab'ij na: Ajwal, Yet lik ab'im chi kasachsaj uwach i k'ijib'ali, man keje ile lik mijun kjeqi chik chi, mitene i winaq xaq mitene i chikop, man lik ka'an ni jun tz'inilik jyub' chaqij che ronojel ij saq.

⁶³ Xaq are kamayij rajlaxik uwach i wuji, chaxima jun ab'aj che te'uri chak'aqa b'i pa raqana Éufrates,

⁶⁴ te'uri chab'ij: Keje umuqtajik b'i tinimit Babilonia ile, xaq lik kyaktaj ti chik che i k'ax chi Ajwal kutaq li puwi.” Chi kk'is wi utzijonik ma Jeremías.