JEREMÍAS 47 - Wuj Pa K'ubultzij

Tzijonik chkij aj Filistea

¹ Iri are i tzijonik chi Ajwal xub'ij che ma Jeremías chi profeta chkij aj Filistea, are ma faraón k'amaja k-on ch'oj pa tinimit Gaza:

² Yin in Ajwal, kinb'ij: Pa moxab' kupon ni jun nim laj ya chi kunojsaj uwach i k'ijib'al le, pacha jun nim laj raqana chi elnaq chik puk'ijib'al; kunojsaj ni i tinimit che i ya xaq ronojel ni'pa o chwach, pa nimaq taq tinimit xaq ni'pa je jeqel chwach. Konojel i winaq re i tinimit kesik'inik, i winaq kesik'in ni che o'ej rumal i k'ax.

³ Utayik i pok'owik re kixajab' i kaway, xaq i luk'uwik ke i kareta xaq i siririk re i sotsaq chi o che, lik nti chik kicho'ab' i kiqajaw kichuch, rumali xko'taj kan i kak'al.

⁴ Man ya xuriq i ij re usachik kiwach aj Filistea, xaq re umajik chke aj Tiro xaq i aj Sidón i tob'al chi k'a o ku'. Qatzij, i Ajwal kusachsaj ni kiwach aj Filistea, chi xek'un che ulew chi o ya chrij chwach chi are i tinimit Creta.

⁵ I winaq re Gaza kkisol b'i kiwi che kijolom, i winaq re Ascalón kekanaj na chi kel ti chik kich'awb'al. K'isb'al chik winaq chi naj kij re ujer, ¿K'a junpa ka'at ni ach'akul k'utb'al re uk'axk'ol?

⁶ ¡Ay, ch'ich' re Ajwal chi k'ulala o uware! ¿Junpa kamayij? ¡Chattok chub'i chupam ak'olb'al, chamayij, lik chatuxlanoq!

⁷ ¿Xwiri wach ukanajik i uxlanem ku'ano, man i Ajwal uya'om i taqanik che, man uya'om chuqul re ku'an ch'oj chrij aj Ascalón xaq ronojel i k'ijib'al chi taq mar?