JEREMÍAS 43 - Wuj Pa K'ubultzij

Uk'amik b'i ma Jeremías pa Egipto

¹ I ma Jeremías are xuk'is ub'ixkil chke konojel i winaq, ronojel ni'pa yatal chuqul ub'ixkil rumal i Ajwal, chi ki-Dios ike,

² ma Azarías, chi uk'ojol ma Osaías, ma Johanán, chi uk'ojol ma Carea, xaq jub'an itzel laj taq achiyab', xkib'ij che ma Jeremías: “¡Ile chi kab'ij le lik qatzij taj! I Qajwal Dios at utaqom ti chub'ixkil chqe chi kojjeqi ti yoj pa Egipto.

³ Xa are ma Baruc, chi uk'ojol ma Nerías, katumin chupam chi tzel kojawilo man keje ile kojaya pki'ab' aj Caldea, re kojkik'am b'i pa Babilonia o xaq re kojkikamsaj.”

⁴ Keje ile, mitene ma Johanán xaq i aj-ok'al utzam i achiyab' chi je yij che i ch'oj xaq konojel i winaq xekanaj ti pa tinimit Judá, keje uri ile chi xkiqel utaqanik i Ajwal.

⁵ Xwiri ma Johanán xaq konojel aj-ok'al utzam i achiyab' chi je yij che i ch'oj, xkimol kichi' i keb' oxib' chik winaq aj Judá chi k'a je o kanoq, chi are chrijil chik ile je kichersam te'eq b'i pa jalajuj nimaq taq tinimit, je tzalijnaq chal pa Judá re kejeqi chila:

⁶ I achiyab', ixoqib', ak'alab', xaq i je umi'al i ajawinel xaq konojel i winaq chi ma Nabuzaradán, aj-ok'al utzam i ajchajinelab', je uya'om kan pu'ab' ma Gedalías, xaq ma Jeremías i ma Baruc.

⁷ Xkikoj ti retalil che utaqanik i Ajwal, konojel ike le xe'e k'a pa Egipto xaq xe'upon k'a pa tinimit Tafnes.

⁸ Chila pa Tafnes, i Ajwal xlapan ru' ma Jeremías xaq xub'ij che:

⁹ “Chak'ama keb' oxib' ab'aj nimaq, chamuqu chupam i xo'ol re i natril chi o chwach i saqil laj okb'al re i nim laj rachoch i ajawinel ma faraón pa tinimit Tafnes xaq chkiwach i winaq aj Israel.

¹⁰ Xaq chab'ij chke: I Ajwal chi ronojel ktiki che, chi ki-Dios aj Israel, kub'ij: Kin-an na chi kk'un wajpatan ma Nabucodonosor, chi ajawinel re Babilonia, kinya ukub'ib'al chi o u'ij xaq kinya i saqil laj rachoch i ajawinel puja' ab'aj le chi inmuqum waral.

¹¹ Ire kk'un na xaq kusach ni uwach i tinimit Egipto. Jun we petnaq puk'aslemal kkamik, kkam na; jun we lik petnaq puk'aslemal chi kelsax b'i pa cho'ab' chwach rulew, kelsax nu b'i pa cho'ab' chwach rulew, jun we lik petnaq puk'aslemal kkam pa ch'oj, kkam ni uri pa ch'oj.

¹² Kunak' a' che i kachoch jalajuj taq tiox pa Egipto, xwi ta la ile, xaq lik kunak' a' chke i tiox le xaq keuk'am nu b'ik pacha taq ajprexil. Kujos-ij ni uri i tinimit Egipto, pacha taq ku'an jun aj-ilol chij chi kresaj i uk' che u'u, te'uri k-e na chi lik mijun k-atiwik.

¹³ Kusach ni kiwach i tak'tik ab'aj xaril antalik re Bet-semes pa Egipto xaq kunak' ni a' chke i kachoch tiox re i Egipto.”