JEREMÍAS 41 - Wuj Pa K'ubultzij

Ukamsaxik ma Gedalías

¹ Che uwuq ik', i ma Ismael, chi uk'ojol ma Netanías, chi ri umam ma Elisama, ukwenta i ralk'uwal i ajawinel, x-e pa Mizpa chu'anik jun tz'onb'enik chkiwach ru' ma Gedalías. Je rachi'ilam i lajuj achiyab' xaq xkitij kiwa junam chila pa Mizpa,

² i ma Ismael xaq i je lajuj achiyab' chi je rachi'ilam b'ik, lik juntir xewalij chukamsaxik ma Gedalías ru' ch'ich' chi k'ulala o uware, chi ch'iktal te'eq rij re aj-ok'al utzam i jalajuj taq tinimit rumal i ajawinel re Babilonia.

³ Xaq i ma Ismael xeukamsaj konojel aj Israel xaq i achiyab' chi je yij che i ch'oj aj Caldea, chi je o te'eq ru' ma Gedalías chila pa Mizpa.

⁴ Che ukab' ij re ukamik ma Gedalías, are lik k'a mijun etamawnaq wach xk'ulmaxik,

⁵ xeupon aj Siquem, aj Silo xaq aj Samaria kajwinaq (80) achiyab', chi lik kisolom b'i kismachi', i ki'u' lik raqch'ijnaq xaq i kich'akul lik k'iyal soktajnaq o che, chi xa are ike je anawnaq che kib'. Xwi ta la ile, xaq kik'amom li sipon ch'irajil xaq pom, re kkiporoj chwach i Ajwal chila prachoch.

⁶ Are uri ma Ismael lik ko'ik xel li pa Mizpa, x-e chkik'ulaxik pa taq b'e. Are xkiriq kib' xub'ij chke: —Chixpetoq chiwila ma Gedalías, chi uk'ojol ma Ahicam.

⁷ Xwiri are k'ate xeupon pa nik'aj che i tinimit, ma Ismael xaq i achiyab' chi je rachi'ilam xekikamsaj xaq xekik'aq b'i chupam jun k'otom chaqij.

⁸ Xwiri je lajuj achiyab' che i tzob'aj chi xeupon chila, xkib'ij che ma Ismael: —Mojakamsaj; man qu' yoj o trigo, cebada, aceite xaq uwa'al kab' chi quwam pa taq es. Are uri i ma Ismael xukuy kimak rumali xeukamsaj taj pacha x-on chke i kachi'il.

⁹ I k'otom chaqij chi xuk'aq kich'akul i winaq ma Ismael chupam chi xeukamsaj, ile xaq are i k'otom chaqij chi i ajawinel ma Asa utaqom u'anik are xuto rib' chwach ma Baasa, chi ajawinel re Israel. I k'otom chaqij le lik nim xwiri lik xnoj che kich'akul i kamnaq chi xeukamsaj ma Ismael.

¹⁰ Xwi ta la ile, i ma Ismael xeuchap i umi'al i ajawinel xaq i winaq chi k'a je o kan chila pa Mizpa, are ma Nabuzaradán, chi aj-ok'al utzam ajchajinelab', chi xeuya te'eq chuxe' utaqanik ma Gedalías. I ma Ismael xeuchapo, te'uri xumaj b'i ub'e re kik'aw pa ulew Amón.

¹¹ Ma Johanán, are uk'ojol ma Carea xaq aj-ok'al utzam chke i achiyab' chi je yij che i ch'oj chi je o te'eq ru', xkita i kamik chi xu'an ma Ismael, chi uk'ojol ma Netanías,

¹² xkimol kiwinaq xaq xe'e chu'anik ch'oj ru' ire. Xkiriq chila pa o wi nim laj k'olb'al ya chi o pa Gabaón.

¹³ I winaq chi je rok'am b'i ma Ismael prexil are xkil ma Johanán xaq konojel i aj-ok'al utzam i achiyab' chi je yij che i ch'oj chi je kachi'ilam b'ik, lik xekikotik,

¹⁴ xetzalij chub'ik, te'uri xkimol kib' ru' ma Johanán.

¹⁵ Xwiri i ma Ismael xaq je wajxaqib' achiyab' xetiki che anmajik chwach i ma Johanán i xe'e pa nim laj tinimit Amón.

¹⁶ Are iri xki'an ma Johanán xaq i aj-ok'al utzam i achiyab' chi je yij che i ch'oj chi je rachi'ilam b'ik, are ike xkiya kib' chkilik i achiyab' chi je yij che i ch'oj, ixoqib', ak'alab' xaq nimaq taq ajpatanib' chi ma Ismael xeuchap b'i te'eq pa Mizpa chrijil chik ukamsaxik ma Gedalías, chi are ma Johanán xeutzalijsaj li pa Gabaón.

¹⁷ Xe'ek xaq xejeqi kan pa tinimit Gerutquimam, chila xe'uxlan wi chutzal i tinimit Belén, man k'a pa Egipto ke'e wi

¹⁸ man kkuwaj kib' chkiwach aj Caldea rumal kkixij kib' che ma Ismael chi xukamsaj ma Gedalías, chi ajawinel re i Babilonia uch'ikom te'eq rij re aj-ok'al utzam i jalajuj taq tinimit.