JEREMÍAS 38 - Wuj Pa K'ubultzij

Uk'aqik ma Jeremías chupam jun k'otom chaqij upam

¹ I ma Sefatías, uk'ojol ma Matán, ma Gedalías, uk'ojol ma Pasur, ma Jucal, uk'ojol ma Selemías, ma Pasur uk'ojol ma Malquías, xkita utzijonik ma Jeremías are xub'ij i tziji chke i tinimit:

² I Ajwal kub'ij: “Pachin jun kkanaj kan pa tinimit, kkam ni uri pa ch'oj, rumal wa'jal, rumal itzel laj taq yob'il. Xwiri pachin jun chi kel b'ik xaq kujach rib' pki'ab' aj Caldea, ktiki ni uri chuto'ik uk'aslemal.

³ I Ajwal kub'ij: I tinimiti ktzaq ni pki'ab' i achiyab' chi je yij che ch'oj re i ajawinel aj Babilonia. Ire kuk'am na xaq lik mijun ktiki chrelsaxik pu'ab'.”

⁴ Are uri i ajpatanib' xkib'ij che i ajawinel: —Rajwaxik chi kkamsax i achi ri, man ru' i utzij lik kuqajsaj ki'ij achiyab' chi je yij che i ch'oj chi k'a je kanajnaq kan pa nim laj tinimit, xaq kuqajsaj ki'ij konojel i winaq. I achi le kutzukuj ti chomb'al ib' re i tinimit, xa ch'oj kutzukuj.

⁵ I ma Sedequías, chi ajawinel, xula' uwach chke: —Utzi', chi'ana ni'pa kiwaj u'anik che. Yin kixin-atij taj.

⁶ Are uri ike xkichap ma Jeremías, xkiya chupam i k'otom chaqij upam re ma Malquías, chi uk'ojol i ajawinel, chi o chila chwaja ipa je o wi i chajinelab'. Xkiqajsaj ru' jun laso nim upam chupam i k'otom, nti ya chupam, xa xo'ol upam, rumali chi ma Jeremías xmuqtaj b'i chupam.

⁷ Jun achi aj Etiopía, ma Ebed-melec ub'i, chi lik are jun achi chi kul k'uxij che pa nim laj rachoch i ajawinel, xuta chi k'aqtal ma Jeremías chupam i k'otom chaqij. Che taq i ij le i ajawinel o pa molb'al ib' chila che uchija re ma Benjamín.

⁸ Are uri ma Ebed-melec xel chila pa nim laj rachoch i ajawinel, x-e chub'ixkil iri che i ajawinel:

⁹ —Nim laj ajawinel, i achiyab' le lik utz ti xki'an che ma Jeremías. Man xkimin chupam jun k'otom chaqij, xaq chila kkam ni rumal i numik man nti chik wa re trigo pa nim laj tinimit.

¹⁰ Are uri i ajawinel xuya jun taqanik che ma Ebed-melec, chi keuk'am lajuj juwinaq (30) achiyab' re kkesaj li ma Jeremías chupam i k'otom chaqij, tz'aqat k'amaja kkam ma Jeremías.

¹¹ I ma Ebed-melec xeuk'am b'i i achiyab' ru', xe'e chila ipa kk'ol wi i k'ul pa nim laj rachoch i ajawinel, are uri xuk'am keb' oxib' k'ul chi el chik, xuqajsaj b'i che ma Jeremías ru' laso chupam i k'otom chaqij,

¹² xaq xub'ij che: —Chawik'awsaj i k'ul le chuxol taq ateleb' man keje ile k-on ti k'ax chawe. I ma Jeremías keje ile xu'ano.

¹³ Keje u'anik uri ile chi achiyab' xkik'aq b'i laso pa jul, are uri xkesaj li ma Jeremías chila. Chrijil chik ile i ma Jeremías xkanaj kan chwaja ipa je o wi ajchajinelab'.

Ma Sedequías xutaq usik'ixik ma Jeremías

¹⁴ I ma Sedequías, chi ajawinel, xutaq uk'amik ma Jeremías, chi profeta, chila che urox okb'al re rachoch i Ajwal. Chila i ajawinel xub'ij che: —Kin-an jun tz'onb'enik chawe, xaq kwaj chi kala' uwach chwe ru' saq laj tzij.

¹⁵ I ma Jeremías xub'ij: —We kinla' uwach i tz'onb'enik chawe, yet, Nim laj Ajawinel, kataq inkamsaxik; Xaq we kinya jun pixb'anik chawe, kakoj ti retalil chwe.

¹⁶ Xwiri i ma Sedequías, chi ajawinel, xub'ij jun tzij pub'i i Ajwal che ma Jeremías chi lik xwi ike keta'am: —Lik kinb'ij chawe pub'i i Ajwal, chi xyaw qak'aslemal, chi kintaq ti akamsaxik xaq katinjach ti pki'ab' i jub'an chi kkaj akamsaxik.

¹⁷ I ma Jeremías xub'ij che ma Sedequías: —I Ajwal chi ronojel ktiki che, chi ki-Dios aj Israel, keje iri kub'ij: “We su' kajach awib' chke aj-atzil re i ajawinel Babilonia, yet xaq i awalk'uwal ktotaj ni uri ik'aslemal, xaq i tinimiti knak' ti a' uri che.

¹⁸ Xwiri we kajach ti awib' yet chke, i aj Caldea lik ketiki ni kan chuk'amik i nim laj tinimit, kkinak' ni a' che xaq yet kattotaj ti chik.”

¹⁹ I ma Sedequías xub'ij: —Lik kinxij wib' chke aj Judío chi xe'ax ku' aj Caldea; we kintzaq pki'ab' ike le, lik qatzij kki'an ni uri k'ax chwe pacha kkaj ike.

²⁰ Are uri ma Jeremías xub'ij: —Xwiri, yet, Nim laj Ajawinel, kattzaq ti pki'ab' ike. Nim laj Ajawinel, cha'ana utzil, chatkojon che utzij i Ajwal, chi inb'im chawe, xaq lik katel ni utz ru' xaq ktotaj ni uri ak'aslemal.

²¹ I Ajwal uya'om retamaxik chwe wach kk'ulmax na, yet, Nim laj Ajawinel, we kawaj ti kajach awib':

²² Konojel ni'pa ixoqib' chi kekanaj pa nim laj rachoch i ajawinel aj Judá lik ke'elsax na loq xaq kejach ni pki'ab' i je atzil re i ajawinel aj Babilonia, xaq ike kkib'ij na: “Konojel i je ramiy ajawinel chi lik je utz xkit'oro xaq lik xetiki che; xkiya che chi raqan lik xmuqtaj b'i chupam i xo'ol xaq lik xko'taj kanoq.”

²³ I ma Jeremías xaq xub'ij chik che i ajawinel: —Konojel ni'pa ixoqib' xaq awak'al lik kejach ni pki'ab' aj Caldea, xaq yet, Nim laj Winaq, lik kattotaj ti pki'ab' ike, are k-antaj na, katjach ni pu'ab' ajawinel aj Babilonia, xaq kkinak' ni a' che i nim laj tinimit.

²⁴ Are uri ma Sedequías xub'ij che ma Jeremías: —We lik k'ax kana i ak'aslemal lik mab'ij iri che jun chik.

²⁵ We ajpatanib' kketamaj chi yin inlapannaq awu', kek'un ni uri chutz'onoxik chawe wach xab'ij chwe, xaq wach xinb'ij yin chawe, kki'an ni jun sujunik chawe chi kkito ak'aslemal chwach i kamik, kkib'ij ni uri chawe chi kalap ronojel chke.

²⁶ Xwiri yet chab'ij chke chi xa kattijin chub'ixkil chwe chi katintaq ti chub'i chi rachoch ma Jonatán man keje ile katkam ti chila.

²⁷ Keje uri ile chi konojel ni'pa i ajpatanib' xek'un chu'anik tz'onb'enik che ma Jeremías, xwiri ire lik xub'ij pacha xub'ij i ajawinel che. Rumali xko'taj kanoq, man mijun xuta i lapanik chi xki'an ike.

²⁸ I ma Jeremías xkanaj kan chwaja ipa je o wi i chajinelab' k'a che i ij chi xk'am kan i Jerusalén.