JEREMÍAS 37 - Wuj Pa K'ubultzij

Utz'onb'enik ma Sedequías che ma Jeremías

¹ Ma Nabucodonosor, ajawinel re i Babilonia, xuya kan ma Sedequías pa ajawinel re i Judá, chi uk'ojol ma Josías, puk'exel ma Conías, chi uk'ojol ma Joacim.

² Xwiri mitene ma Sedequías, mitene rajpatanib' xaq mitene i winaq xkikoj retalil i tzij chi xub'ij i Ajwal chke rumal ma Jeremías chi profeta.

³ I ma Sedequías, chi ajawinel, xutaq b'i ma Jucal, chi uk'ojol ma Selemías, xaq ajsujul sipon, chi ma Sofonías, chi uk'ojol ma Maasías, xutaq b'i ru' profeta ma Jeremías chub'ixkil iri che. “Chatlapan ru' i Qajwal Dios pqawi yoj.”

⁴ I ma Jeremías k'amaja kk'am b'i prexil, rumali chi k'a kmalkat chkixol i winaq pa tinimit.

⁵ Tz'aqat i achiyab' chi je yij che i ch'oj re ma faraón xe'el li pa Egipto. I aj Caldea chi ketijin chu'anik ch'oj chkij aj Jerusalén xketamaj rumali xe'el chila.

⁶ Are uri i Ajwal xub'ij che ma Jeremías, chi profeta, xutaq chub'ixkil iri:

⁷ Keje iri kub'ij i Ajwal, chi ki-Dios aj Israel: “Chab'ij che ajawinel aj Judá chi xixutaq li chuk'amik no'oj wu' yin: Chi uwinaq ma faraón chi je yij che i ch'oj, chi je petnaq chito'ik, xetzalij chub'i pa Egipto.

⁸ Are uri i aj Caldea ketzalij chal chu'anik ch'oj chrij i tinimit Jerusalén, ketiki ni chuch'akik xaq kkinak' ni a' che.

⁹ Yin, chi in Ajwal, kinsaqij iri chiwe: Lik mit'or taq iwib' chuch'ob'ik chi aj Caldea ketzalij chub'ik, man keje ti ile.

¹⁰ Tupu yix lik keikamsaj i achiyab' aj Caldea chi je yij che i ch'oj, chi kki'an ch'oj chiwij yix, chi xa je keb' oxib' achiyab' je soktajnaq kekanaj kan chuxe' i wu'wik ja, i achiyab' le kewalij na xaq kkinak' ni a' che i tinimit.”

Uminik ma Jeremías prexil

¹¹ I achiyab' chi je yij che i ch'oj aj Caldea, xkimayij u'anik ch'oj chrij i Jerusalén, konojel xetzalij chub'ik man xketamaj chi ketijin kuponik i achiyab' chi je yij che i ch'oj re ma faraón.

¹² Are uri ma Jeremías xel chila pa tinimit Jerusalén, x-e che ulew chi re ma Benjamín man kjach jub'i' rulew kuxtab'al kan re chkixol uwinaq.

¹³ Xwiri are xupon chwach Uchija ru' ma Benjamín, o jun achi ma Irías ub'i, uk'ojol ma Selemías, umuq uxikin ma Hananías, chi are aj-atzil ke ajchajinelab', xuchap ma Jeremías xaq xub'ij che: —¡Yet ka'an aj Caldea che awib'!

¹⁴ Ma Jeremías xula' uwach: —¡Qatzij ti xab'ij le, yin kin-an ti aj Caldea che wib'! Xwiri ma Irías xukoj ti ile, are xu'ano xuchapo xaq xuk'am b'i chkiwach i ajpatanib'.

¹⁵ Are uri ike le lik xmi' koywal che ma Jeremías xaq xkitaq u'anik k'ax che xaq xkitz'apij chila chi rachoch ma Jonatán, chi ajtz'ib'anel re anoj, i k'ijib'al le ki'anom kik'ijib'al ajprex che.

¹⁶ I ma Jeremías xkiya chupam jun jul chi antal chuxe' i ja, lik k'iyal ij xu'an chila.

¹⁷ I ma Sedequías chi ajawinel, xuya jun taqanik chi kkik'am b'i ma Jeremías pa nim laj rachoch i ajawinel, are xk'am b'i ma Jeremías chwach i ajawinel, i ajawinel le xani'al xutz'onoj che: —¿O nawi jun tzij kab'ij chi petnaq ru' i Ajwal? Are uri ma Jeremías xula' uwach: —Olik, are iri: Yet katjach ni pu'ab' i ajawinel re i Babilonia.

¹⁸ I ma Jeremías xutz'onoj che i ajawinel ma Sedequías: —¿Wach inmak chawe, wach inmak chke awajpatanib' xaq wach inmak che i tinimit man xinimin taq prexil?

¹⁹ ¿Ipa je o wi i profeta le chi lik kkisaqij te'eq chi ajawinel aj Babilonia lik nti ch'oj ku'an chiwij yix, xaq chrij i ulew le?

²⁰ Wo'or chinata na, Nim laj Winaq, xaq chaya ni urayijb'al ink'ux chi kintz'onoj ni chawe: Maya chik chi kink'am b'i chi rachoch ma Jonatán, chi ajtz'ib'anel re anoj, moqxa kinkam taq chila.

²¹ Are uri i ajawinel, chi ma Sedequías, xub'ij chi ma Jeremías kkanaj prexil chwaja ipa je o wi ajchajinelab' xaq ij ij kkik'am b'i jun ukaxlanwa chi kek'am chila che i b'e ke i aj-anol kaxlanwa. Keje iri x-antaj na tz'aqat lik o kaxlanwa pa tinimit le. Keje uri ile chi ma Jeremías xkanaj kan chwaja ipa je o wi i ajchajinelab'.