JEREMÍAS 34 - Wuj Pa K'ubultzij

Utzijoxik tzij che i ajawinel ma Sedequías

¹ Ma Nabucodonosor, chi ajawinel re i Babilonia, junam ku' i achiyab' chi je yij che i ch'oj, chi je are i winaq ke konojel ni'pa i nimaq taq tinimit re i uwach i jyub' ta'aj chi je o pu'ab' ire, ketijin chu'anik ch'oj chrij i tinimit Jerusalén xaq chkij i tinimit chi je o naqaj chke, i Ajwal xlapan ru' ma Jeremías, xub'ij che:

² “Yin, chi in Ajwal, chi ki-Dios aj Israel, kinb'ij chawe chab'ij che ma Sedequías, chi ajawinel re i tinimit Judá: Keje iri kub'ij i Ajwal: Kin-an na chi i ajawinel re i Babilonia kuk'am ni i tinimiti xaq kunak' ni a' che.

³ Yet lik kattiki ti chrelsaxik awib' pu'ab'; katkichap na xaq katkijach ni pu'ab' ire, chrijil chik ak'amik b'ik chwach ire, te'uri katkik'am b'i pa Babilonia.

⁴ Xwiri, chata pe', ma Sedequías, ajawinel re i tinimit Judá, Yin, chi in Ajwal, kinb'ij chawe: Ru' ti ch'ich' k'ulala o uware katkamsax wi.

⁵ Utz ni kamik ka'ano xaq kporox ni muy laj kunb'al chawe, pacha x-ani chke awatit amam chi xe'ajawin chuxe'el awajawinik yet, xaq kb'ix na: ¡Ay, Ajwal! Lik k'ax ni kuna kik'ux chawe yet. Yin, chi in Ajwal, xinb'ij i tzij le.”

⁶ I ma Jeremías, chi profeta, xukamulij ub'ixkil ronojel ni'pa i tzij le che ma Sedequías chila pa Jerusalén.

⁷ Are uri i achiyab' chi je yij che i ch'oj re i ajawinel aj Babilonia ketijin chu'anik ch'oj chrij i tinimit Jerusalén, Laquis xaq i Azeca, xwi i tinimit ile chi sutim kij ru' i tapial nim uwach re i tinimit Judá chi xewulij taj.

Uqelik i trat re ko'taxik b'i winaq chi je o pa k'ax kumal aj Hebreo

⁸ I Ajwal, xlapan ru' ma Jeremías, chrijil chik u'anik i trat chi xu'an i ajawinel ma Sedequías ku' konojel i winaq aj Jerusalén, re ko'taxik b'i winaq chi je o pa k'ax kumal aj Hebreo.

⁹ I trat kub'ij chi ni'pa i winaq chi je o pa k'ax achiyab' xaq we ixoqib' aj Hebreo, chkiya ni chke chi ke'ek, man keje ile lik mijun uri o taq jun winaq chi o pa k'ax kumal aj Israel.

¹⁰ Konojel ni'pa i je aj-atzil, xaq konojel i tinimit, lik utz xkita wach kub'ij i trat, are uri ike xko'taj b'i kiwinaq chi je o pa k'ax, xaq xki'an ti chik pen chke chi k'a kechakun ku'.

¹¹ Xwiri chrijil chik ile xkijalwachij tan chik kino'oj rumal xeko'taj b'ik, rumali chi xki'an chik chke chi xetzalij chal ku' re keu'on tan chik winaq chi je o pa k'ax.

¹² Are uri i Ajwal xlapan ru' ma Jeremías, xub'ij che:

¹³ “Yin, chi in Ajwal, ki-Dios aj Israel, xin-an jun trat ku' iwatit imam, are xewesaj li pa Egipto, ipa je winaq te'eq chi je o pa k'ax. Xinb'ij chke

¹⁴ chi pa wuqub' taq junab' keko'taj b'i aj Hebreo chi je k'ayim ku' chi xechakun waqib' junab' ku'. Xwiri i katit kimam xkikoj ti retalil chwe xaq xinkiqelo.

¹⁵ Xaq yix wo'or ijalwachim te'eq chik ino'oj xaq i'anom te'eq chik ni'pa i utz kwil Yin chi xiwo'taj b'i iwinaq chi je o pa k'ax. Xaq xiya iwib' chu'anik jun trat chinwach chila pwachoch ipa koksax wi in-ij.

¹⁶ Xwiri xijalwachij chik inojb'al xaq xitz'ij inb'i, xib'ij chke i winaq chi je o pa k'ax chi je iwo'tam te'eq chub'ik chi ketzalij chal iwu' re iwinaq chi je o pa k'ax.

¹⁷ Keje uri ile, Yin, chi in Ajwal, kinb'ij: Yix xixkojon ti chwe man xeiwo'taj tu b'i iwinaq chi je o pa k'ax; rumali wo'or Yin kin-an na chi kjeqan ni nim laj ch'oj chixol, wa'jal xaq yob'il, man keje ile lik kkiya ni jun nim laj xib'rikil chiwe xaq che ronojel ni'pa i ajawinik chwach i jyub' ta'aj. Yin in Ajwal, xinb'iw ile.

^18-19 I aj-atzil re i tinimit Judá xaq re i Jerusalén, junam ku' ajsujul sipon, i ajchakib' pa nim laj rachoch i ajawinel, xaq konojel ni'pa i winaq re i tinimit xki'an jun trat chinwach Yin, xki'an keb' che ral me', te'uri xeik'aw chuxol i ch'aqa taq, xwiri xki'an taj pacha i kub'ij i trat.

²⁰ Rumali, keinjach ni pu'ab' i ajch'oj chkij xaq ajkamsanel, xaq i kich'akul i kamnaq le kekitij nu b'i i k'uch xaq i itzel laj taq chikop.

²¹ Xaq kin-an na chi ma Sedequías, chi ajawinel re i tinimit Judá, xaq i je rajpatanib' ketzaq ni pki'ab' i ajch'oj chi kekamsanik, xaq ktzaq ni pki'ab' i achiyab' chi je yij che i ch'oj re i ajawinel aj pa Babilonia, chi wo'or nti ch'oj kki'an chkij.

²² Keintaq ni che chi kki'an chik ch'oj chrij i nim laj tinimiti, are ya xetiki chuk'amik te'uri kkinak' ni a' che. Xaq kin-an na chi i jub'an chik tinimit re i tinimit Judá k-on ni tz'inilik jyub' chi nti chik winaq chwach. Yin in Ajwal, xinb'iw ile.”