JEREMÍAS 28 - Wuj Pa K'ubultzij

Ma Jeremías xaq i profeta chi ma Hananías

¹ Che ujo' ik' che i junab' le, ke'eloq chi che ukaj junab' re urajawinik ma Sedequías pa tinimit Judá, i profeta, chi ma Hananías, chi uk'ojol ma Azur, chi aj pa tinimit Gabaón, x-e ru' ma Jeremías chila prachoch i Dios, lik chkiwach ajsujul sipon xaq chkiwach konojel i winaq, xub'ij:

² —I Ajwal chi ronojel ktiki che, chi ki-Dios aj Israel, keje iri kub'ij: Kinpatz' ni yuku re ajawinel aj pa Babilonia,

³ xaq pa keb' junab' kin-an na chi ketzalijsax chali che i k'ijib'ali ronojel ni'pa i chapb'al re i rachoch i Dios chi xuk'am b'i ma Nabucodonosor pa Babilonia.

⁴ Xaq kin-an na chi ketzalij chali ma Jeconías che i k'ijib'ali, chi uk'ojol ma Joacim, ajawinel re i tinimit Judá xaq konojel i winaq chi xe'elsax b'i pa tinimit Judá xe'e pa Babilonia. Qatzij, kinpatz' ni i yuku re i ajawinel pa Babilonia. Yin in Ajwal, xinb'iw ile.

⁵ I profeta ma Jeremías, xula' uwach che i profeta ma Hananías, keje iri xub'ij che, lik chkiwach i ajsujul sipon xaq chkiwach konojel i winaq chi je o chila prachoch i Dios:

⁶ —Xaq xub'ij: ¡Lik utz, wetene i Ajwal ku'an ile! ¡Lik utz, wetene i Ajwal ku'ano chi k-antaj ni ni'pa i tzij le chi xab'ij, xaq chtzalijsax chali ni'pa i chapb'al aj prachoch i Dios xaq chetzalij chali pa Babilonia ni'pa i je elsam b'ik!

⁷ Xwiri chata iri chi kinb'ij chawe xaq chke konojel i tinimit:

⁸ I profeta chi xek'iji ujer, chuxe'el li qalaxik yoj awu', xkitzijoj i ch'oj, jalajuj taq k'ax xaq k'ax laj taq yob'il pkiwi i nimaq taq rajawinik xaq pkiwi tinimit chi lik o ki'ij.

⁹ Xwiri jun profeta are kutzijoj chomb'al ib', xaq are k-antaj ronojel ni'pa xutzijoj, k-aljin uri chi ni'pa xub'ij, ru' i Ajwal xpe wi.

¹⁰ Are uri ma Hananías xresaj pan i yuku chuqul ma Jeremías, te'uri xu'an ch'aqa taq che.

¹¹ Te'uri xub'ij chwach ronojel i tinimit: —I Ajwal kub'ij: “Xaq lik keje u'anik ile kin-an pa keb' junab' panoq kwesaj i yuku chi xukoj ma Nabucodonosor, chi ajawinel re i tinimit Babilonia, chke konojel i nimaq taq tinimit xaq lik kin-an ni ch'aqa taq che.” Te'uri i ma Jeremías x-ek.

¹² Chrijil chik upatz'saxik i yuku chuqul ma Jeremías rumal ma Hananías, are uri i Ajwal xub'ij che i profeta chi ma Jeremías:

¹³ “Jat ru' ma Hananías xaq chab'ij che, chi yin in Ajwal, kinb'iw iri: Yet xa'an ch'aqa taq che i yuku che' chi antal te'eq, xwiri yin inyijb'am jun yuku chawe chi antal ru' ch'ich'.

¹⁴ Man yin, chi in Ajwal, chi ronojel kintiki che, chi ki-Dios aj Israel, kinb'ij iri: Inkojom pacha jun yuku ch'ich' chkiqul konojel i winaq, man keje ile i winaq chi je o pa k'ax rumal i ma Nabucodonosor, chi ajawinel re i tinimit Babilonia. Xaq chikop aj pa taq es je inya'om pu'ab'.”

¹⁵ Are uri xub'ij ma Jeremías che ma Hananías: —¡Chata iri, ma Hananías! I Ajwal at utaqom ta loq. Xwiri yet xakub'saj kik'ux i winaq ru' nojim tzij.

¹⁶ Rumali i Ajwal kub'ij: Lik qatzij chi katintaq b'ik, xwiri xa rumal kinsachb'ej awach chwach i jyub' ta'aj. Che i junab'i katkamik, man ru' atzij xa'an chke i winaq chi je ajch'oj chwij.

¹⁷ Are uri ma Hananías chi profeta, xkam che i uwuq ik' che i junab' le.