JEREMÍAS 25 - Wuj Pa K'ubultzij

I ajch'oj chi kpe pa moxab'

¹ Che ukaj junab' re urajawinik ma Joacim, chi uk'ojol ma Josías, aj pa tinimit Judá, are uri i Ajwal xlapan ru' ma Jeremías xaq xuya jun tzijonik che chrij ronojel i tinimit Judá. Ile x-ani che i nab'e junab' re urajawinik ma Nabucodonosor chila Babilonia.

² Are uri ma Jeremías chi profeta, xutzijoj i tzijonik le chke konojel i winaq aj pa tinimit Judá, xaq chke konojel ni'pa je jeqel pa Jerusalén. Keje iri xub'ij:

³ K'a che kan i junab' oxlajuj re urajawinik ma Josías, chi uk'ojol ma Amón, aj pa Judá, k'a are o wi wo'or ke'eloq chi k'a pa oxib' juwinaq junab' (23) kanoq, i Ajwal ch'awnaq wu' yin, xaq yin inb'im chiwe yix k'iyalmul, xwiri yix ikojom ti retalil chwe.

⁴ Tupu i Ajwal lik k'iyalmul je utaqom b'i rajpatanib' chi je profeta, xwiri yix lik ikojom ti retalil chke xaq lik kiwaj ti utayik xaq ix kojonnaq ti chke.

⁵ Ike kib'im chke: Chijalwachij u'anik i utz taj, chimayij xaqmanal ki'ano; keje ile kixk'iji ni chwach ulew chi xuya i Ajwal chiwe yix xaq chke iwatit imam ronojel ij saq.

⁶ Mixterej chkij jub'an chik dios, mixxuki chkiwach xaq mikoj ki'ij. Mimi'saj roywal i Ajwal ru' ukojik ki'ij i tiox le chi xa yix ix anawnaq, man keje ile mijun k'ax kutaq li uri piwi.

⁷ Wo'or i Ajwal kub'ij: “Yix ikojom ti retalil chwe, imi'sam woywal rumal ukojik ki'ij i tiox chi xa yix ix anawnaq, ile are kpetsaw i k'ax piwi.”

⁸ Rumali i Ajwal chi ronojel ktiki che, kub'ij: “Iwumal yix chi xiwaj ti xikoj retalil chwe are xinb'ij chiwe chuxe'el,

⁹ keinsik'ij konojel i winaq aj pa moxab' xaq i wajpatan chi ma Nabucodonosor, chi ajawinel re i tinimit Babilonia, re kepe chu'anik ch'oj che i nim laj tinimiti, xaq konojel ni'pa je jeqel chwach xaq chkij nimaq taq tinimit chi je o naqaj. Lik kinsach ni kiwach konojel. Lik kin-an chke chi ksach ni kiwach, chi lik je xib'in ib' xaq je xib'rikil.

¹⁰ Kin-an ni chke chi chkixol ike le ktataj ti chik i b'ix re i nima'ij xaq nti chik kikotemal, xaq ktataj ti chik i b'ix re k'ulankil, xaq uch'awb'al i ka' re i ke'em, xaq k-iltaj ti chik i a' re i tzuk'b'al.

¹¹ Ronojel i nim laj tinimit lik kwulij na xaq lik ksach ni uwach. Lajuj oxwinaq (70) junab' kki'an ni kipatan i nimaq taq tinimit le chrij i ajawinel aj Babilonia.

¹² Are ktz'aqat i lajuj oxwinaq (70) junab' kinya ni utojb'alil che i ajawinel aj Babilonia xaq che i nim laj utinimit, xaq kinsach ni uwach i tinimit ke aj Caldea ronojel ij saq. Yin in Ajwal, xinb'iw ile.

¹³ Kin-an na chi ktzaq puwi i nim laj tinimit le ronojel ni'pa inb'im xaq ni'pa tz'ib'tal chupam i wuji, xaq ronojel ni'pa ub'im ma Jeremías pinb'i yin chkij i nimaq taq tinimit.

¹⁴ Ketzaq ni pki'ab' nimaq taq tinimit xaq pki'ab' i ajawinelab' chi lik ko kiwach, keje ni uya'ik utojb'alil ile kin-an pkiwi, pacha kmajaw chke rumal i kimak.”

Utojb'alil pkiwi nimaq taq tinimit

¹⁵ I Ajwal, chi ki-Dios aj Israel, xub'ij chwe: “Chawila pe i tu'b'al ya ri nojnaq che uwa'al uva muqb'am re woywal. Chak'ama xaq chaya chke konojel nimaq taq tinimit re kkitu'u, i nimaq taq tinimit chi katintaq b'i yin ku'.

¹⁶ Are kkitu' ile kkijeq ni xab'ik rumal, xaq ke'on ni pacha ch'uj rumal i nim laj ch'oj chi kintaq b'i yin chke.”

¹⁷ Are uri yin xink'am i tu'b'al ya pu'ab' i Ajwal chi nojnaq che uwa'al uva muqb'am, te'uri xinya chke konojel i nimaq taq tinimit re kkitu'u, chi xinutaq b'i i Ajwal ku'.

¹⁸ Xinya chutu'ik chke aj Jerusalén xaq chke nimaq taq tinimit aj Judá junam ku' i ajawinelab' xaq i kaj-atzil, anb'al k'ax chke xaq re chupsab'al kiwach, xaq lik xib'rikil ktzunik, k'utb'al re i k'oqb'al pkiwi xaq lik k'a are o wi wo'or.

¹⁹ Xaq xinya chutu'ik che ma faraón, chi ajawinel re i Egipto, xaq chke i raqan u'ab' xaq chke i raj-atzil, xaq chke konojel uwinaq.

²⁰ Xaq chke i jalajuj taq winaq chi je o chila, xaq chke konojel i ajawinelab' re i tinimit Uz xaq che i kulew aj Filistea: Ascalón, Gaza, Ecrón xaq ni'pa i kanajnaq kan re i Asdod,

²¹ Edom, Moab xaq Amón;

²² chke konojel ni'pa i ajawinelab' aj Tiro xaq je aj Sidón, xaq konojel i ajawinelab' re ni'pa i tinimit chi o chi taq uchi' i Mar Mediterráneo;

²³ chke utzob'ajil ma Dedán, ma Tema xaq i ma Buz, xaq chke i tinimit chi kkisol b'i kiwi rij taq kixikin;

²⁴ chke konojel i ajawinelab' aj Arabia, chke konojel i ajawinelab' ke i jalajuj taq winaq, chi je jeqel pa tz'inilik jyub' chaqij;

²⁵ chke konojel i ajawinelab' aj Zimri, aj Elam xaq i aj Media:

²⁶ Chke konojel i ajawinelab' je aj pa moxab', chi je aj naqaj xaq we naj je o wi. Ke'eloq chi konojel i ajawinelab' chwach i jyub' ta'aj. Pa k'isb'al re kutu' ni ajawinel aj Babilonia.

²⁷ Te'uri xub'ij i Ajwal chwe: Chab'ij chke, yin in Ajwal chi ronojel kintiki che, chi ki-Dios aj Israel, kinya jun taqanik chiwe chi chitu'u k'i uwa'al uva muqb'am k'a kix-ab'ar na xaq kixxab' na, kixtzaq ni pulew xaq kich'ij ti chik walijik, rumal i nim laj ch'oj chi kintaq b'i chiwij.

²⁸ Xwiri we kkaj ti kkichap uwa'al uva muqb'am chawe re kkitu'u, chab'ij uri chke: I Ajwal chi ronojel ktiki che kub'ij: Lik rajwaxik chi kitu' na.

²⁹ Man kinjeq uya'ik utojb'alil puwi i tinimit chi jachtal pin-ab'. ¿Kich'ob' wa yix chi to' keje ile kixkanajik, chi kinya ti utojb'alil piwi? Lik kixkanaj ti to' keje ile we kinya ti utojb'alil piwi, man kintaq u'anik jun nim laj ch'oj chkij konojel i winaq chi je jeqel chwach i jyub' ta'aj. Yin in Ajwal, chi ronojel kintiki che, xinb'iw ile.

³⁰ Yet, ma Jeremías: Chatzijoj chke pinb'i yin, ronojel ni'pa ile, chab'ij chke: I Ajwal lik ko kch'awik pacha uch'awb'al ray, k'a chikaj loq, k'a chila che i ch'am laj k'ijib'al pa jeqel wi. Xaq chkij i jalajuj taq uchij, ksik'inik pacha kki'an ajpuch'ul uva, chkij konojel ni'pa je jeqel chwach i jyub' ta'aj.

³¹ Lik pacha uch'awb'al ray, kupon k'a chi taq uchi' ulew, man i Ajwal ku'an atb'al tzij chke nimaq taq tinimit, are ire ku'at tzij pkiwi konojel o kich'akul xaq keujach ni utz ti laj taq winaq pa kamik, are i Ajwal xub'ij ile.

³² I Ajwal, chi ronojel ktiki che, kub'ij: I k'ax laj yob'il uterb'elem rib' kupon pa jun nim laj tinimit, kik'aw che jun chik. Jun nim laj tew jab' kwalij ni k'a xe taq kaj ulew.

³³ Ni'pa keukamsaj i Ajwal che i ij le, kejab'krij ni k'a chi taq uchi' ulew jela xaq jewa. Lik mijun ko' ni chke, xaq lik mijun kyakaw ni kich'akul re keumuqu; lik kejab'i ni kan chila chwach ulew pacha taq achaq.

³⁴ ¡Chixsik'inoq, ix, ajyu'ul chij, chixsik'in rumal uk'axk'ol! ¡Yix, chi je iwok'am i chij, chib'alk'atij iwib' pa taq ulew! Man ya xuriq i ij re i kamsanik, xaq yix kixkamsax na pacha kikamsaxik i ti'ojib' chij.

³⁵ I ajyu'ul chij ketiki ti che i anmajik, ni'pa i je aj-ok'al chij xaq ketiki ti che i anmajik.

³⁶ I je ajyu'ul chij kesik'inik, xaq keok'aw i chij lik kesik'in rumal uk'axk'ol. Man i Ajwal xuk'is uwach i es ke i chij.

³⁷ I Ajwal xpe roywal, rumali xusach uwach i chomiq taq k'ijib'al pa kewa wi te'eq i chij.

³⁸ Xel loq pacha relik jun koj pujul, are uri kitinimit ike le lik xk'is uwach, man xpe roywal i Ajwal, rumali xutaq b'i jun nim laj ch'oj chkij.