JEREMÍAS 20 - Wuj Pa K'ubultzij

Tzijonik re i Dios chrij ma Pasur, chi ajch'oj chrij ma Jeremías

¹ Xuk'ulmaj chi ma Pasur chi uk'ojol ma Imer, are ajsujul sipon te'eq, xaq aj-ok'al utzam i chak prachoch i Dios, xuta are ktijin ma Jeremías chub'ixkil i tzijonik re i Dios.

² Are uri ma Pasur le xutaq u'anik k'ax che ma Jeremías xaq xutaq uya'ik pa che' chi o chila chwach Uchija Naj Rij re ma Benjamín chi o ajsik, chi o naqaj che rachoch i Ajwal.

³ Te'uri chukab' ij xutaq relsaxik ma Jeremías pa che'. Are uri ma Jeremías xub'ij che: I Ajwal xujalwachij i ab'i, kub'ij ti chik ma Pasur chawe, are kub'ij chawe ma “Magor-misabib.”

⁴ Man i Ajwal kub'ij: Kin-an ni chawe chi ka'an ni kamik, xib'rikil, xaq chke konojel awamiy; lik chawach ketzaq ni awamiy ru' ch'ich' chi k'ulala o uware pki'ab' ajch'oj chkij. Keinjach ni konojel i winaq chi je jeqel pa Judá pu'ab' i ajawinel aj Babilonia, chi keuk'am nu b'i chila Babilonia, we ntaj keukamsaj ru' kuchil.

⁵ Ronojel ni'pa i b'eyomal re i nim laj tinimit le xaq kinjach ni pki'ab' ajch'oj chkij, ronojel ni'pa i kulew xaq i b'iroxik chi o u'ij, xaq ronojel ni'pa i b'iroxik nim u'ij ke i ajawinelab' aj Judá, re kkik'am b'i pa Babilonia.

⁶ Xaq yet, ma Pasur, katk'am nu b'i pa k'ax chila pa Babilonia junam ku' konojel awalk'uwal. Chila na katkam wi xaq chila katmuq wi yet xaq konojel ni'pa awamiy, chi kab'ij te'eq i tzijonik chke chi qatzij taj.

Uch'ojinik ma Jeremías chwach i Ajwal

⁷ Ajwal, yet xinat'oro, xaq yin xinya wib' chi xinat'oro, lik o acho'ab' man xattiki chwe. Ronojel ij lik in ajya'ol tzej; konojel is kinkiyo'ya.

⁸ Arewi are kinch'awik, lik re kinya utzijoxik i ch'oj xaq usachik wachij, lik arewi k'ax kech'aw chwe xaq kinkiyo'ya man kintzijoj atzij.

⁹ We kinb'ij: “Kinch'ob'ch'a ti chik i Ajwal, kinlapan ti chik pub'i Ire”, I atzij k-on uri pacha jun a' pink'ux chi kk'atanik, chi kqaj k'a chwach inb'aqil, lik kintij u'atixik, xwiri kintiki ti che.

¹⁰ Keinta i winaq chi kkib'ij: “¡Lik o xib'in ib' re i kamik xaipa!” Xaq kkib'ij: “¡Chixpetoq, jo chukojik umak!” Kecha. Xaq keje ne wamiy kkaj ike chi kintzaqik, kkib'ij: Moqxa kt'ortajik, are uri yoj kojtiki che, xaq kqa'an ni uk'exel che pacha u'anom ire chqe.

¹¹ Xwiri yet, Ajwal, at o wu' yin, pacha jun aj-anol ch'oj chi k-an ti tikilem che; ni'pa i kinkiterb'ej ketzaq na, xaq ketiki ti chuqajsaxik in-ij; ke'el ti utz ru' wach kkaj u'anik, ketzaq ni chupam i k'ixb'alil, lik kqajsax ni ki'ij ronojel ij saq chi lik ksach taj.

¹² Ajwal, chi ronojel kattiki che, Yet chi ka'an k'amb'al pamaj pusuk', Yet chi kawilo wach o li k'a puk'ux jun winaq, cha'ana ni chwe chi kwilo wach uya'ik utojb'alil ka'an chke i winaq le, man ronojel ni'pa utojb'alil inya'om pa'ab'.

¹³ ¡Chib'ixaj i Ajwal, chikojo u'ij i Ajwal! Man Ire kresaj i nib'a' pki'ab' i utz ti laj taq winaq.

¹⁴ ¡Lik kink'oqoj i ij chi xinalax wi! ¡Lik chk'oqtaj ni ij le are xinralaj inchuch, lik nti u'ij i ij le!

¹⁵ ¡Chk'oqox ni i jun chi xukikotsaj inqajaw are xuya utzijol che chi xalax jun uk'ojol!

¹⁶ ¡I achi le keje na pacha i nimaq taq tinimit, chi xusach uwach i Dios ronojel ij saq! Chuta ni sik' re uk'axk'ol pa taq usaqirb'al xaq utzijoxik i ch'oj are tik'il ij,

¹⁷ i Ajwal xinukamsaj ti puch'akul inchuch! Man wetene xinkamik, lik are te'eqi inchuch i jul ipa kinmuq wi te'eq, xaq lik keje teneri xinalax yin.

¹⁸ ¿B'uchak xinel li puch'akul inchuch, we xa rumal rilik i k'ax xaq i uyej, xaq ink'aslemal to' nojnaq che i k'ixb'alil?