ISAÍAS 61 - Wuj Pa K'ubultzij

Utzijoxik i totajik chke aj Israel

¹ I utewal i Ajwal o pinwi, man i Ajwal in u'ulum; xaq in utaqom chuya'ik i utz laj utzijol chke i nib'a'ib', pakb'al jub'i' kib'is ni'pa i keb'isonik, utzijoxik i kelb'al ni'pa i je tz'apilik, ko'taxik b'i ni'pa je o prexil,

² chutzijoxik i utz laj junab' re Ajwal, chutzijoxik i ij chi i Dios ku'an ni uk'exel chke ajch'oj chqij pacha xki'an chqe yoj. In utaqom li chukub'saxik kik'ux konojel ni'pa i keb'isonik.

³ Chuya'ik jun kikoron ni'pa keb'ison pa tinimit Sion puk'exel i chaj, kunb'al muy re kikotemal puk'exel o'ej, ub'ixaxik i b'ix puk'exel i ub'a'krijik k'uxij. Kya' ni pkib'i “b'aqit chi lik kech'akan che i ch'oj”, chi je tiktal rumal i Ajwal k'utb'al re u'ij uchomal.

⁴ Kkiyak chik i ujer taq ja chi je wulijnaq, kewalij chik i nimaq taq ja chi je wulijnaq te'eq ujer, xaq keyijb'ax ni ni'pa i tinimit chi ya kewulijik.

⁵ I winaq je aj naj kkiya ni kib' chuchajixik i jalajuj taq ichikop, iwulew, xaq i tikb'al i-uva yix.

⁶ Yix kb'ix ni chiwe chi ix ajsujul sipon re i Ajwal, ix rajpatan i Qajwal Dios. Kiqusij i b'eyomal ke i jub'an chik nimaq taq tinimit, xaq kiwiq ni iwib' ru' i kiwalch'inik ike.

⁷ Xwiri intinimit ya xutij uyej, kamul xqajsax u'ij xaq xyo'yaxik, rumali putinimit kamul na kya' i b'eyomal che xaq kuqusij ni i kikotemal ronojel ij saq.

⁸ Man i Ajwal k'ax kuna i suk'ul laj atb'al tzij xaq ktitat upam che ela' xaq che ronojel i utz ti laj taq anik. Ire lik kuya ni jun jik laj tioxb'al chke, xaq ku'an ni jun trat ku' ike chi ronojel ij saq uwach.

⁹ I je umuq uxikin lik ketamax ni kiwach chkixol i nimaq taq tinimit; konojel ni'pa i keilawik juntir kkil ub'e chi are jun tinimit chi yatal utzil chomal puwi rumal i Ajwal.

¹⁰ ¡Lik kinkikot rumal i Ajwal! Lik kinna i kikotemal re in-Dios, man uya'om utotajik chwe, ¡Lik uya'om i ch'akanik chwe! In keje pacha jun ala chi ya kk'uli'ik chi kukoj ukoron, xaq pacha jun ali chi ya kk'uli'ik chi kuwiq rib' ru' i chomiq taq ab'aj re wiqb'al ib'.

¹¹ Man keje pacha kalaxik i es chwach ulew xaq pacha uwakrijik li utux i kotz'ij pa tikb'al kotz'ij, keje ile ku'an i Ajwal chi ch-aljin ni u'atb'al tzij xaq konojel i nimaq taq tinimit kkib'ixaj ni b'ix che i Ajwal.