ISAÍAS 60 - Wuj Pa K'ubultzij

U'ij i k'ak' tinimit Jerusalén

¹ Chatwalijoq, tinimit Jerusalén, chi apasim awib' chupam awalch'inik, man xupon asaqil, xaq i u'ij uchomal i Ajwal kwalch'in pawi.

² I equmal kuch'uq uwach i jyub' ta'aj, xaq i cha'ab' keupasij i nimaq taq tinimit, xwiri i Ajwal kwalch'in ni pawi yet xaq pawi yet kwinaqir wi u'ij uchomal.

³ I nimaq taq tinimit kek'un che i saq awe yet, i ajawinelab' kek'un ni ru' awalch'inik re i asaqirb'al.

⁴ Chayaka apalaj xaq chataqej chawij chawach: Konojel kkimol kib' xaq kek'un awu' yet. I je ak'ojol lik naj kepe wi, xaq i ami'al ke'alux na loq.

⁵ Yet, are keawilo lik katkikot na, awanima lik kuna ni i nim laj kikotemal; i tinimit je aj chi taq mar kkik'am na li i b'eyomal chawe, xaq kkijach ni i b'eyomal le chawe ke i nimaq taq tinimit.

⁶ K'iyal taq tzob'aj kamey kkisutij ni awij, kipetik pa tinimit Madián, xaq pa tinimit Efa, kek'un konojel ni'pa i je aj Sabá, chi keqam li an-o'oj xaq i incienso xaq kkitzijoj ni ronojel ni'pa i chomiq taq anik re i Ajwal.

⁷ Konojel ni'pa i kichikop aj Cedar ke'on ni awe yet, ni'pa i ti'ojib' taq chij ke aj Nebaiot ke'ax ni pa'ab' re kasujuj puwi i sujb'al sipon re i Ajwal, pacha jun sipon re umuyal uk'ok'al xaq Ire ku'an na chi lik mas k-on chom i chom laj rachoch.

⁸ ¿Je pachin taq ike le chi kesayay chikaj pacha sutz', chi pacha taq palomax chi ke'e pkisok?

⁹ Ile are jub'an barco chi junam ktijin kik'unik, ku' i barco chi kepe pa Tarsis chi je nab'e loq, kok'am i je ak'ojol chi naj kepe wi, chi kok'am li i an-o'oj xaq i saq-o'oj, kojb'al u'ij Awajwal, chi Lo'laj Dios ke aj Israel, chi xu'an chawe nim a'ij.

¹⁰ Je are i winaq je aj naj keyakaw chik i tapial nim uwach chawe chi wulijnaq, xaq i kajawinelab' kki'an ni kipatan chawij; tupu xuya utojb'alil i Ajwal pawi rumal i roywal, wo'or ru' i rutzil uk'ux rilom tob'al awach.

¹¹ I uchija re awachoch lik arewi jaqal na, lik ktz'api ti chipa'ij chicha'ab', man keje ile kkik'am na li i b'eyomal chawe ke i nimaq taq tinimit, xaq ke'ok b'i i ajawinelab' ku' i kachnimanelab'.

¹² I tinimit chi k-on ti upatan chawij, kkam na; ronojel ni'pa i nimaq taq tinimit kewulijsax na.

¹³ I Ajwal kub'ij che i tinimit Jerusalén: I ub'eyomal i Líbano kk'un ni awu' yet: Chaj, tulul chaj, xaq i k'isis, re anb'al chom che i wachoch, yab'al u'ij uchomal i k'ijib'al ipa kintak'b'a wi waqan.

¹⁴ I je kak'al i winaq chi xki'an k'ax chawe, lik qajnaq ki'ij kek'un ni chawach, xaq konojel ni'pa xkik'aq b'i a'ij kexuki ni chawach xaq kkib'ij ni chawe: “Nim laj Tinimit re i Ajwal”. “Tinimit Sion re i Lo'laj Dios ke aj Israel”.

¹⁵ Lik kato'tax ti chik, tzel ti chik katilik xaq atukel ti chik katk'iji'ik, yin kin-an ni chawe chi o a'ij ronojel ij saq, usuk' ile are jun kikotemal chi nti uk'isik.

¹⁶ I nimaq taq tinimit lik kkiya ni i utz laj taq tijawik re chiwe, xaq i ajawinelab' kkik'am na li kib'eyomal chawe yet, xaq kawetamaj na, chi Yin in Ajwal, in tol awe, Yin nim incho'ab', chi u-Dios ma Jacob, in kirol awe.

¹⁷ Puk'exel i anch'ich' kinya ni an-o'oj chawe, puk'exel i ch'ich' kinya ni saq-o'oj, puk'exel i tz'alam kinya ni anch'ich', puk'exel ab'aj kinya ni ch'ich'. Kin-an na chi i chomb'al ib' krajawin ni pawi xaq i suk'ulik kuk'am ni b'e chawach.

¹⁸ Pa ronojel awulew ktataj ti chik u'anik i kamik, xaq k-ani ti chik sachanik xaq i wulijsanik pa awulew, are i ka'ano kaya pub'i i tapial nim uwach “Totajik”, xaq i uchija re awachoch kaya ni pub'i “B'ix”.

¹⁹ Lik kajwax ti chik chawe chi i ij ku'an saq che i pa'ij, mitene i ik' ku'an saq che i cha'ab', man Yin chi in Ajwal, are kinyaw i saq pawi ronojel ij saq, Yin chi in a-Dios, are kinyaw i walch'inik pawi.

²⁰ I ij chi kuya i saq pawi lik ktzaq ti chub'ik, xaq i ik' arewi kchup ti chik, man Yin, chi in Ajwal, are kinyaw i saq pawi ronojel ij saq, ni'pa i ij re ab'is kk'is na.

²¹ Konojel i winaq re atinimit lik ke'on ni suk'ul laj taq winaq, lik je rajaw ni atinimit ronojel ij saq, ike je are pacha utux jun tikon chi lik Yin xintikawik, are jun chak chi in-anom Yin ru' in-ab', k'utb'al re in-ij inchomal.

²² I mo'aji chi lik xa pich' koq, kpax ni uwach pa k'iyal taq lajujwinaq kamo' (1,000), i je keb' oxib' winaq le lik ke'on ni jun nim laj tinimit. Yin chi in Ajwal, kin-an na chi juntir k-antaj ile pa taq u'ijlal.