ISAÍAS 6 - Wuj Pa K'ubultzij

Usik'ixik ma Isaías

¹ Che i junab' are xkam i ajawinel ma Uzíaz, are uri xwil i Ajwal kul chupam jun ukub'ib'al chi o u'ij chi lik naj uwi; i uchi' u'u' chi naj raqan unojsam i rachoch i Dios.

² Jub'an serafín je o puwi i Ajwal. Chkijujunal o waqib' kixik'. Ru' keb' kixik' kkich'uqb'ej kipalaj, ru' keb' chik kkich'uqb'ej kich'akul ikem, xaq ru' keb' chik kerupupik.

³ Xaq kkib'ij chkiwach: “Lik lo'laj, lo'laj, lo'laj i Ajwal chi ronojel ktiki che. Ronojel uwach i ulew nojnaq che u'ij uchomal.”

⁴ Are kjinin i ch'awb'al, ni'pa i uchija re i rachoch i Dios lik xeyikyatik, xaq i rachoch i Dios lik xnoj che i sib'.

⁵ Are uri xinch'ob'o: “¡To' inwach yin, kinkamik! Lik xwil i Ajawinel, chi are i Ajwal ronojel ktiki che, yin chi xa in winaq ch'am ti inchi' chi xaq in jeqel chkixol jub'an winaq chi lik ch'am ti tzij kel pkichi'.”

⁶ Che i jo'taj tan le jun chke i serafín xpe rupup wu' yin. Ru' jun chapb'al a'al rok'am li jun a'al chi uk'amom li puwi i sujb'al sipon,

⁷ xunak' che inchi', xub'ij chwe: “Wila pe', i a'ali chi xinnak' che achi', rumal ile xe'el i amak, ronojel ni'pa i amak lik xkuytaj chawe.”

⁸ Are uri xinta uch'awb'al i Ajwal chi kub'ij: “¿Pachin kintaq b'ik? ¿Pachin nawi kk'amaw b'i qatzij?” Xcha. Are uri yin xinb'ij: “In o yin chi, chinataqa b'i yin.”

⁹ Ire xub'ij chwe: “Jat xaq chab'ij i tziji chke i winaq pa tinimit: Tupu lik kitatb'ej, kita ti ub'e, tupu lik kitaqej, kiwil ti ub'e.”

¹⁰ Chasacha kinojb'al i winaq le, chatz'apij kixikin xaq chach'uqu kib'a'wach man keje ile kkil taj xaq ketan taj, xaq kkita ti ub'e, man keje ile ketzalij ti chal wu' Yin xaq Yin keinkunaj taj.

¹¹ Yin xintz'onoj che: Ajwal, ¿Ni'pa ij kuch'ij ile? Ire xub'ij chwe: “K'a kewulij ni i tinimit xaq mijun chik winaq kkanajik, k'a kekanaj ni ja chi nti chik winaq chupam, xaq i ulew k'a k-on ni pacha jun tz'inilik jyub' chaqij.

¹² I Ajwal k'a keutaq nu b'i i winaq naj, xaq i tinimit kkanaj ni kanoq chi lik nti chik winaq chwach.

¹³ Xwiri we k'a xekanaj kan lajuj che i jo'winaq (100) chke i winaq pa tinimit, lik ksachsax chik uri kiwach pacha uk'atzixik jun che' b'aqit o xaq pacha jun sik'al chi xwi chik ukutamil kkanaj kanoq.” (Xwiri che i kutam le kel li jun utux chi lik o u'ij.)