ISAÍAS 4 - Wuj Pa K'ubultzij

¹ Che taq i ij le xa keb' oxib' chik achiyab' kekanajik, chi wuqub' ixoqib' kki'an ni ch'oj puwi jun chke ike le, xaq kkib'ij ni che: “Yoj kqatzuq qib' xaq kqawiq qib' qatukel, xwiri chaya ni chqe k-e ab'i chqij, lik chojawesaj chupam qak'ix.”

Sujunik re kikotemal re k-on panoq

² Che taq i ij le, i Ajwal ku'an na chi kel li utux, lik are ni ketz'b'alil xaq ki'ij ni'pa kek'asi kan pa Israel; i uwach i tikon chi kuya i ulew are ni ukikotemal xaq u'ij.

³ Ni'pa kek'asi kan pa Sion, xaq ni'pa i xekam ti pa Jerusalén kya' ni chke kejeqi chila ipa je o wi, kb'ix ni chke chi je are i jachtal pu'ab' i Ajwal.

⁴ I Ajwal are kub'ij utojb'alil jun mak xaq are kuya utojb'alil puwi, kujos-ij ni i tinimit Jerusalén che ni'pa i kamik chi u'anom, xaq kuch'aj ni ni'pa i tz'itajnaq chke ni'pa i winaq chi je jeqel pa Sion.

⁵ Puwi ronojel i jyub' re i Sion xaq pkiwi i winaq chi kimolom kib' chila, i Ajwal kuwinaqirsaj jun sutz' equm pa'ij, xaq cha'ab' ktzijtzatik xaq ktoqow urep a' puwi. Lik puwi ronojel ile o wi u'ij uchomal i Ajwal.

⁶ Re keuchajij xaq re keuto, xaq kajwax chke re kimuj rumal uk'axk'ol i ij are pa'ij, xaq tob'al ke chwach i jab' xaq chwach i jab' chi tew upam xaq i ray.