ISAÍAS 36 - Wuj Pa K'ubultzij

Umajik i Senaquerib

¹ Che i kajlajuj junab' re rajawinik ma Ezequías, i ma Senaquerib ajawinel re Asiria x-e chu'anik ch'oj chkij konojel i nimaq taq tinimit chi o tapial nim uwach chrij chila pa Judá xaq xeuk'amo.

² Lik k'a chila pa Laquis xutaq b'i jun nim laj ajpatan, ru' k'iyal taq achiyab' chi je yij che i ch'oj, chrilik i ajawinel ma Ezequías chila pa Jerusalén, xkiya kib' chunaqaj ub'e i ya re i nim laj k'olb'al ya, pa b'e chi k-e pa taq es chi Ch'ajb'al K'ul ub'i.

³ Chila xupon wi kik'ulaxik rumal ma Eliaquim chi uk'ojol ma Hilcías, chi aj-atzil te'eq ke ajchakib' pa nim laj rachoch i ajawinel, xaq i ma Sebna chi ajtz'ib' re i anoj, ma Joa chi uk'ojol ma Asaf, rajtz'ib' i ajawinel.

⁴ I nim laj ajpatan ma Asiria xub'ij chke: —Chib'ij i tziji che ma Ezequías chi nim laj ajawinel, che i ajawinel re Asiria: ¿Wach taq wa lik kul ak'ux che chi kaxij ti awib'?

⁵ ¿Xatab'a kach'ob' yet chi i chomiq taq tzij xaqjun u'ij ru' i cho'ab' re u'anik ch'oj? ¿Pachin che kakub'a wi ak'ux chi ka'an taq ch'oj chwij yin?

⁶ Kwil yin akub'am ak'ux che utonik i Egipto. Utzi', i Egipto le are jun pa'om si' chi lik o uxuruk', man jun we ku'ayb'a rib' che, kjuxkrij b'i che xaq lik kok b'i che u'ab', kel k'a jewa. Ile are ma faraón, ajawinel re Egipto, ke konojel ni'pa kkikub'a kik'ux che.

⁷ Xaq we kab'ij chwe: Yoj qakub'am qak'ux che i Ajwal chi qa-Dios, ¿Xatab'a xusach ti uwach ma Ezequías ni'pa i k'ijib'al re kojb'al u'ij i Dios, xaq i sujb'al sipon re i Dios le, xwi ta la ile, xaq xeutaq i winaq aj Judá xaq aj Jerusalén chi lik xwi che jun sujb'al sipon kkikoj ni u'ij i-Dios?

⁸ Cha'ana jun trat ru' rajaw inchak, chi ajawinel re i tinimit Asiria: Yin kinya jo'mo' (2,000) kaway chawe we keariq i winaq ajrij taq kaway.

⁹ Man yet kattiki ti chuxib'ixik i aj-atzil chi lik ajaj laj winaq aj Asiria, ¿I we kawoy-ej taq yet keariq i winaq ajrij taq kaway, xaq i kaway pa Egipto?

¹⁰ Xwi ta la ile, ¿Kach'ob' yet chi yin in k'unnaq chu'anik ch'oj xaq chuchupik uwach i tinimiti to' intukel chi nti utob'al i Ajwal wu'? ¡Are Ire xintaqaw chu'anik ch'oj xaq chusachik uwach!

¹¹ Are uri ma Eliaquim, ma Sebna xaq i ma Joa xkila' uwach che ajpatan aj Asiria: —Cha'ana utzil, chatch'aw qu' pa Aram, man yoj kqata. Match'aw qu' pa Hebreo man konojel i winaq chi je puwi i tapial nim uwach ketijin chutayik.

¹² Xwiri i ajpatan aj Asiria xub'ij: —Che ti rajaw achak, xaq chiwe ti yix xinutaq wi li ajawinel chub'ixkil i tziji. Lik chke i winaq chi je o puwi i tapial nim uwach, man ike xaq i yix lik kitij ni iwachaq xaq kitu' ni ichul.

¹³ Are uri i ajpatan keje ile tak'alik ko xsik'in chub'ixkil pa hebreo: —Chita wach kub'ij i nim laj ajawinel chiwe, are i ajawinel re i tinimit Asiria:

¹⁴ “Miya taq iwib' kixt'or rumal ma Ezequías, ire ktiki ti chito'ik.”

¹⁵ I ma Ezequías we kraj ktiki chuyu'uxik ixikin chi kikub'a ik'ux che i Ajwal, xaq we kub'ij chiwe: I Ajwal saq laj tzij kojuto, Ire kuya taj chi i tinimiti ktzaq pu'ab' i ajawinel aj Asiria,

¹⁶ mikoj retalil che wach taq kuloxla. I ajawinel re Asiria xinutaq li chub'ixkil chiwe chi chichomaj iwib' ru', xaq su' chijacha iwib', man keje ile chijujunal kitij ni uri uwach i-uva xaq i uwach higuera xaq kitu' ni uri i ya re ik'otom yix.

¹⁷ Chrijil chik ile kixuk'am b'i che jun tinimit nim chi kmajawik pacha iwe yix, che jun tinimit nim chi lik kuya trigo xaq i uva, re ki'anb'ej i wa re trigo xaq i uwa'al uva muqb'am.

¹⁸ I ma Ezequías we kub'ij chiwe chi Ajwal kixuto, miya iwib' che kixut'oro. ¿Xatab'a o jun chke i dios ke i jub'an chik tinimit xtiki chrelsaxik i nim laj utinimit chwach i kamik pu'ab' i ajawinel re i tinimit Asiria?

¹⁹ ¿Ipa je o wi kitiox re i tinimit Hamat xaq i Arfad? ¿Ipa je o wi kitiox re i tinimit Sefarvaim? ¿Xatab'a xetiki chrelsaxik i tinimit Samaria pu'ab' ucho'ab' i Asiria?

²⁰ ¿Pachike taq wa chke konojel i dios le xtiki chrelsaxik i nimaq taq tinimit pu'ab' ucho'ab' i ajawinel re i tinimit Asiria? ¿B'uchak uri kich'ob'o chi Ajwal ktiki chrelsaxik i tinimit Jerusalén pu'ab' i kamik?

²¹ Ike lik xech'aw ti chik xaq mitjun tzij xkila' uwach, man i ajawinel utaqom ub'ixkil chke chi lik kkila' ti uwach.

²² Are uri lik xok il ma Eliaquim, chi aj-atzil re i nim laj rachoch i ajawinel, xaq keje ma Sebna chi ajtz'ib', xaq i ma Joa chi ajtz'ib' re i ajawinel, xkiraqch'ij ki'u' xaq xe'e chrilik ma Ezequías re kkilap che wach xub'ij aj-atzil ke achiyab' re Asiria.