ISAÍAS 35 - Wuj Pa K'ubultzij

Utzalijik i tinimit pa Sion

¹ Chkikot ni tz'inilik jyub' chaqij, chaqij ulew, chnoj ni che i kikotemal, chsijan na,

² chuya ni kotz'ij pacha usij tz'okon, chnoj ni che i qusinik xaq che i kikotemal. I Dios ku'an ni che chi lik chom pacha i Líbano, lik kwachinik pacha i Carmelo xaq i ta'aj re i Sarón. Konojel kkil ni kikotemal re i Ajwal xaq i nim laj uchomal i qa-Dios.

³ Chiya kicho'ab' ni'pa i nti kicho'ab', chiya ukowil kik'ux ni'pa je kosnaq.

⁴ Chib'ij chke i to' kkixij kib' wach i kki'ano: “¡Chikowij ik'ux, mixij iwib'! ¡Man i-Dios yix o chi re kixuto, xaq i je ajch'oj chiwij kuya ni utojb'alil chke pacha kmajawik!”

⁵ Are uri i je mawach ketzun na xaq i je tak ketan na;

⁶ ni'pa i je klis kesak'lin na pacha i kej xaq i je mem kesik'in na. Pa tz'inilik jyub' chaqij chi lik chaqij ulew, lik kb'olb'at na li ya chuk'iyal.

⁷ I tz'inilik jyub' chaqij kyiji ni che i semelik ya, i chaqij ulew lik k'i ni ralaxb'al ya kepe chupam. Ipa je jeqel wi tz'i aj pa taq es wo'or, kek'iy na li ajij xaq i raxk'am.

⁸ Xaq kwinaqir ni jun b'e chila chi kya' pub'i: “Lo'laj b'e”. Ni'pa ki'anom ti ch'am che kib' keb'in ti che i b'e le, xaq keje i b'uy laj taq winaq keb'in ti che i b'e le.

⁹ Chila je nti koj xaq mitene ketejeb' itzel taq chikop. Che i b'e le ketzalij wi li ni'pa i je kirtalik.

¹⁰ Man ni'pa i je ukirom i Ajwal, ke'ok ni pa tinimit Sion ru' b'ix re kikotemal, xaq arewi kekikot na. Lik kkiriq ni kikotemal xaq utz olem, xaq ksach ni uwach o'ej xaq i k'axk'olil.