ISAÍAS 23 - Wuj Pa K'ubultzij

Tzijonik re i Ajwal chrij i Tiro xaq i Sidón

¹ Tzijonik re i Ajwal chrij i Tiro: Konojel i winaq chi je o pa taq barco aj Tarsis lik kejilawik, man wulijnaq chik i k'ijib'al ipa ke'el wi te'eq. Xaq i k'ijib'al ipa keupon wi te'eq chila pa Chipre lik xsach uwach.

² I winaq je aj Tiro xaq i je ajyakolab' re i tinimit Sidón, ike le lik kkilap taj wach xkik'ulmaj. I ajyakolab' kki'axuj i mar.

³ Xaq i nimaq taq ya le kech'akan chrij i b'iroxik b'a'il chi k'ayij re i tinimit Sihor xaq i molonik re i raqana Nilo, kek'ayinik xaq kelo'on pa nimaq taq tinimit.

⁴ Tinimit Sidón, lik chat-ol ni chupam i nim laj k'ixb'alil, chi at ucho'ab' te'eq i mar, man lik kab'ij ni keje iri: “Lik nti chik uk'axk'ol i tujanik chwe xaq kinalan ti chik. Lik nti chik wak'al alab'om xaq altom keink'itsaj.”

⁵ I aj Egipto are kkita utzijol, lik kek'iji ni pa b'is rumal wach xuk'ulmaj i tinimit Tiro.

⁶ Kkib'ij na: “Jix pa tinimit Tarsis, chixjilaw ni yix chi ix jeqel chila chi taq mar.”

⁷ ¿Are tinimit ile chi ax o wi ujer, xaq lik qus kril i kikotsanel ib'? ¿Are tinimit ile chi to' k-e b'i che jun nim laj tinimit naj?

⁸ ¿Pachin xb'iw iri chrij i tinimit Tiro, chi are nim laj utinimit i ajawinel, i ajyakolab' je kik'ojol i ajawinelab' chi lik je are ajyakolab' chi mas nim ki'ij chwach ulew?

⁹ I Ajwal chi ronojel ktiki che xub'ij: Chi kuqajsaj ki'ij ni'pa i lik nim kki'an che kib' xaq lik kuqajsaj ni ki'ij ni'pa i nimaq ki'ij chwach ulew.

¹⁰ Yet, chi at tinimit Tarsis, chattukun chwach ulew, man ya xsach uwach i k'ijib'al ipa ke'el wi i barco.

¹¹ I Ajwal xuji u'ab' puwi i mar, xeuyikya i nimaq taq tinimit xaq xutaq uwulijsaxik i tapial nim uwach re i tinimit Canaán.

¹² Xaq xub'ij che i tinimit Sidón: “Chamayij ukikotsaxik awib', ali chi xatchap pa cho'ab'. Tupu katzukuj wach ik'awik ka'ano re katupon k'a pa Chipre, xwiri xaq chila kariq ti uxlanem.”

¹³ Chiwila pe ulew le chi are ulew re kokb'al i barco. I je aj Caldea xkiwalijsaj tak' taq ja chila xaq xkiwulijsaj i nim laj rachoch i ajawinel re i tinimit Sidón, xki'an wulijnaq taq ja che. Ile kimak ike, kimak ti aj Asiria.

¹⁴ Barco aj Tarsis, chixjilaw rumal i k'ax, man ni'pa ikowib'al yix xsach uwach.

¹⁵ Che taq i ij le i tinimit Tiro ksach ni chk'uxij lajuj oxwinaq (70) junab', are junab' ile chi kk'asi jun ajawinel. Are kk'is i lajuj oxwinaq (70) junab' le k-ani ni che i tinimit Tiro pacha kub'ij i b'ix chrij ixoq chi chwach uch'akul kuch'ak wi umer:

¹⁶ Ixoq chi chwach ach'akul kach'ak wi amer chi at sachnaq chik chk'uxij, chak'ama i arpa, chatb'in chupam ronojel i tinimit, cha'ana chomiq taq son, chab'ixaj k'iyal taq b'ix, ilb'al re we k'a katk'un chkik'ux.

¹⁷ Are kk'is i lajuj oxwinaq (70) junab', i Ajwal te'uri kukoj tan chik pajil i tinimit Tiro. I winaq re i tinimit le kkijeq uk'ayixik kich'akul chke konojel i winaq chwach i jyub' ta'aj.

¹⁸ Xwiri ni'pa kkich'ak chrij kik'ay le, kjachi ni pu'ab' i Ajwal, re ti kk'olik xaq re ti kmol uchi', are i k-ani che kya' chke ni'pa je ajpatan chrij i Ajwal, re kkilo'b'ej k'iyal taq wach kkitijo xaq re lo'b'al chomiq taq ki'u' paqal rajil.