ISAÍAS 22 - Wuj Pa K'ubultzij

Tzijonik re i Ajwal chrij i Jerusalén

¹ Tzijonik re i Ajwal chrij i ta'aj ipa kb'ix wi xaq k-il wi wach kk'ulmaxik: ¿Wach ktijin uk'ulmaxik chi konojel ke'el b'i puwi i ja le?

² I tinimit lik nojnaq che i ch'oqowik xaq che i sik'inik, tinimit chi lik qus kril i kikotsanel ib', i kamnaq xetzaq ti rumal i ch'ich' chi o uware k'ulala, xekam ti rumal i ch'oj;

³ i je awaj-atzil konojel pa'anem xe'anmajik, xaq are xe'anmaj chwach i ch'ab', xetz'apix prexil. I je awinaq chi lik ko kiwach, naj xe'anmajik, xwiri xetz'apix prexil.

⁴ Rumali xinb'ij: Chixel chinwach man kwaj kinsik'in che o'ej, mikub'saj taq ink'ux rumal wach i k'ax kutij intinimit.

⁵ Man i Ajwal chi ronojel ktiki che lik ub'im chi kuriqa ni jun ij re xib'rikil, re wulijsanik xaq i sachanik no'oj chwa ta'aj chila ipa kkil wi wach kk'ulmaxik. Ketijin chuwulijsaxik i tapial nim uwach xaq i sik'inik kupon k'a tzam taq jyub'.

⁶ I je aj Elam xkiyijb'a i kich'ab', te'uri xe'an pa taq kareta, rij taq kaway, i je aj Kir xkesaj li tob'al kib'.

⁷ I k'iyal taq ta'aj chi mas chom nojnaq che i kareta xaq i k'iyal taq kaway chi je annaq i winaq chkij, xe'ok chu'anik ch'oj chwach i okb'al re i tinimit.

⁸ I tob'al re i tinimit Judá, xo'tax kanoq. Che taq i ij le yix lik xikoj retalil ipa k'oltal wi i anb'al ch'oj pa Ja chila pa Nimaq taq Che'.

⁹ Xkil k'iyal taq b'e chi o putinimit ma David xaq xkinojsaj i yab'al ya chi o chuxe'.

¹⁰ Xkisolij i k'iyal taq ja re i tinimit Jerusalén xaq xkiwulijsaj jujun, re kkiyijb'a i tapial nim uwach yab'al ucho'ab'.

¹¹ Chuxol i keb' tapial nim uwach xki'an jun k'otom k'olb'al re i ya chi o chupam i nim laj k'olb'al ya chi ax o wi. Xwiri xkikoj ti retalil pachin x-anaw ronojel ni'pa i jub'an chi lik ujer antalik.

¹² Che taq i ij le i Ajwal chi ronojel ktiki che kixusik'ij yix re kixo'ik, xaq re kitz'uyunej, re ki'an tz'um che ijolom xaq re kikoj i'u' chi lik as, k'utb'al re uk'axk'olil i k'ax.

¹³ Xwiri are i olik, are i kikotsanel ib' xaq i kikotemal, re kkamsax i chikop xaq i chij, re utijawik ti'ij xaq i utu'ik i uwa'al uva muqb'am. “Chojwa'oq xaq chojtu'anoq man chweq kojkamik.” Kixcha.

¹⁴ I Ajwal chi ronojel ktiki che xuk'ut rib' chwe xaq lik xusaqij chwe pinxikin: “Lik kinkuy ti imak atzalal le, chuxe'el ile kixkam ni yix.” Ile lik are utzij i Ajwal chi ronojel ktiki che.

Chrij i chajinel chi o chuqul i nim laj rachoch i ajawinel

¹⁵ I Ajwal chi ronojel ktiki che xub'ij chwe: Jat chrilik ma Sebna chi aj-atzil re i nim laj rachoch i ajawinel, xaq chab'ij che:

¹⁶ ¿Wach atrat yet o waral, pachin xyaw chawe chi ka'an jun muqb'al akamnaq waral, chi ka'an taq jun muqb'al akamnaq che i k'ijib'al naj uwi xaq kawor taq upam ab'aj re jun k'ijib'al re uxlanb'al?

¹⁷ I Ajwal katujab'ij k'a naj, pacha ku'an jun achi chi lik o ucho'ab'. Katuchap ni ru' nim laj ucho'ab',

¹⁸ katub'alk'atij na pacha k-an che wolol xaq katujab'ij ni che jun nim laj ulew. Chila na katkam wi, chila na kk'is wi kiwach i kareta chi o te'eq a'ij kumal, xaq lik atyol ni k'ix pa nim laj rachoch i ajawinel.

¹⁹ Yin katwesaj ni che apatan chi at o wi, xaq lik katwesaj ni che achak chi o chaqul.

²⁰ Che taq i ij le kinsik'ij ni wajpatan, chi are ma Eliaquim uk'ojol ma Hilcías,

²¹ Kinwiq ni ru' a'u' naj raqan, kinkoj ni paqb'al apam che chi yab'al u'ij xaq kinya ni a'atb'al tzij pu'ab'. Lik pacha kiqajaw ni'pa je jeqel pa Jerusalén xaq chke ni'pa je jeqel pa tinimit Judá.

²² Lik pu'ab' ma Eliaquim kinya wi i lawe re rachoch ma David; mijun ktiki chutz'apixik wach kujaq ire, xaq mijun ktiki chujaqik wach kutz'apij ire.

²³ Ire are ni pacha jun kub'ib'al chi o u'ij chke i ralk'uwal uqajaw. Yin kin-an ni che chi lik kjeqi puk'ijib'al, pacha jun klawux.

²⁴ Che ire ktzayb'ax wi ronojel ni'pa o u'ij chkixol ralk'uwal uqajaw xaq chkixol konojel umuq uxikin, ronojel i jalajuj taq chapb'al pa ja tupu ch'utiq, kjeqan li ru' i b'as k'a ru' i xar.

²⁵ Che taq i ij le i klawux chi kojtal puk'ijib'al, kb'oqtaj na xaq ktzaq na, xaq ronojel ni'pa i b'iroxik chi tzayb'am te'eq che, ketzaq na loq xaq kepax na. Keje ile kub'ij i Ajwal chi ronojel ktiki che.